যিশাইয় 3 - Chakma Bible

যিহূদা আর যিরূশালেমর বিচের

¹ ইক্কিনে চঅ, যেদক্কানি জিনিস আর মানুচ্চুনো উগুরে বিশ্বেজ্ গরন্ সেই বেক যিরূশালেমান্ আর যিহূদাত্তুন্ বেগত্তুন্ খেমতাবলা প্রভু লগেপ্রভু দূর্ গুরি দিবাত্তে যার্। তে তারার্ বেক হানাগানি আর পানিগান দূর্ গুরি দিবো।

² ইয়েনি বাদেয়ো তে বীর আর যোদ্ধাগুনোরে, শাজন্‌গুরিয়্যে আর ভাববাদীগুনোরে, গোণেয়্যে আর বুড়ো নেতাগুনোরে,

³ পঞ্চাশ জন সৈন্যর্ সেনাপতি আর সর্মানিত মানুচ্চুনোরে, সল্লাদিয়্যেগুনোরে, চালাগ্ যাদুগুরিয়্যেগুনোরে আর মন্ত্র-কোইয়্যেগুনোরে দূর্ গুরি দিবাত্তে যার্।

⁴ তারা উগুরে তে বয়জ কম্ বলা পুয়োগুনোরে সদ্দার্ বানেব; বুদ্ধি কম্ গাবুজ্যে পুয়োগুনে তারার্ শাজন্‌গুরিয়্যে অবাক্।

⁵ মানুচ্ মান্‌জ্যরে, পাড়াল্যে পাড়াল্যেরে অত্যেচার গুরিবাক্; চিগোনুনে বুড়োগুনো বিরুদ্ধে উদিবাক্, আর নাঢা মানুচ্চুনে সর্মান পেইয়্যে মানুচ্চুনো বিরুদ্ধে উদিবাক্।

⁶ মান্‌জ্যে নিজো বংশর একজনরে ধুরিনে কবাক্, “তর্ কাবড় আঘে, তুই আমার শাজন্‌গুরিয়্যে অ, এই ভস্ত ওই যেইয়্যে দেজর্ ভারান্ লঅ।”

⁷ মাত্তর্ সেদিন্যে তে আবিত্তি গুরিনে কবঅ, “দেজত্ গম্ কাম গরেদে ধোক্ক্যেন মর্ কিচ্চু নেই। মঅ ঘরত্ কনঅ হানা বা কাবড় নেই; তুমি মরে মানুচ্চুনোর শাজন্‌গুরিয়্যে ন-বানেয়ো।”

⁸ যিরূশালেমে উজোত্ হেইয়্যে আর যিহূদা পড়ি যেইয়্যে, কিত্তে তারার্ কধা আর কামানি লগেপ্রভুর বিরুদ্ধে; তারা গোজেন মুজুঙোত্ তা মহিমাগানরে এলাফেলা গরন্।

⁹ তারা মুয়ো চেঙারাগানিয়ে তারা বিরুদ্ধে স্বাক্ষি দে; তারা সদোম ধোক্ক্যেন্ তারার্ পাপ কামানি ফগদাং গরন, ন-ঢাগন্। হায়, সেই মানুচ্চুন! তারা নিজো উগুরে ভস্ত অনাগান্ ডাগি আন্যন্।

¹⁰ তুমি গম্ মানুচ্চুনোরে কঅ, তারার্ ভালেদি অবঅ, কিত্তে তারা তারার্ কামর সুফল ভোগ্ গুরিবাক্।

¹¹ হায়! পাজিগুন্! তারা উগুরে দজা এবঅ। তারা যিয়েনি গোজ্যন্ তারা সিয়েনির পাওনাগান্ পেবাক্।

¹² যিগুনে মঅ মানুচ্চুনোরে অত্যেচার গরন্ তারা চিগোন গুরো ধোক্ক্যেন্, আর যিগুনে তারারে শাজন্‌ গরন্ তারা মিলে ধোক্ক্যেন্। ও মঅ মানুচ্চুন্, তমারে পথ দেগেবার মানুচ্চুনে তমারে ভান্ন্যেই পধেদি নেযায়; তারা গম্ পধত্তুন্ তমারে ভান্ন্যেই পধেদি নেযায়।

¹³ লগেপ্রভু আদালদত্ তা জাগায়ান্ নেযেয়্যে; তে নানান্ জাদরে বিচের গুরিবাত্তে থিয়েইয়্যে।

¹⁴ লগেপ্রভু তা মানুচ্চুনো ভিদিরে বুড়ো মানুচ্চুনোরে আর নেতাগুনো বিরুদ্ধে বিচের গুরিনে কোইয়্যেদে, “তুমি মঅ আংগুর খেদ্‌তান বর্‌বাত্ গোজ্য; নাঢা মানুচ্চুনোর পযাপিরানি লুদেইনে নিজো ঘরত্ রাগেয়ো।

¹⁵ তুমি কিত্তে মঅ মানুচ্চুনোরে শেজ্ গোজ্য আর নাঢা মানুচ্চুনোরে মারে ফেল্য?” এ কধাগান্ বেগত্তুন্ খেমতাবলা প্রভু লগেপ্রভু কোইয়্যে।

¹⁶ লগেপ্রভু আরঅ কলঅ, “সিয়োনর মিলেগুন্ বাড়্‌বো। তারা মাঢাবো উজু গুরি আঢি বেড়ান্ আর চোগেদি ইজিরে দুয়োন্; টেঙ নূপুরোর্ রুম্‌ঝুম রঅবো তুলিনে তারা পাদল্ টেঙানিলোই কায়দা গুরিনে আঢন্।

¹⁷ সেনত্তে লগেপ্রভু সিয়োনর মিলেগুনো মাঢাত্ ঘা গুরি দিবো আর সিয়েনত্ টাক্ পুরিবো।”

¹⁸ সেদিন্যে প্রভু তারার্ দোল্ দোল্ সনা-রুবোনি কাড়ি নিবো। তে তারার্ নূপুর, মাঢার্ মাফালারানি, চন্দ্রহার,

¹⁹ কানর্ দুল, হারু, জালি পর্দা,

²⁰ মাঢাবোর গঙদাগান্, টেঙত্ হবা, কমর রেশমী ফিতে, তুম্বাজ শিশি, তাবিজ,

²¹ আংটি আর নাক্ফুল,

²² দোল্ দোল্ লাম্বা সিলুম, উগুরে সিলুম, শাল, টেঙা থৈল্যে,

²³ আনা, মসীনা ভিদিরে কাবড়ান্, পাগড়ি আর ওড়নাগানি কাড়ি নিবো।

²⁴ তুম্বাজ বদলে পজা বাজ্, কমর বিজোনি বদলে দুড়ি, দোল্ গুরি আজুজ্যে চুলান্ বদলে টাক্, মংগা কাবড় বদলে বস্তার চট্, আর দোলান বদলে পুজ্যে দাগ থেবঅ।

²⁵ তমা মানুচ্চুনে তলোয়ারর্ আঘাতে আর যোদ্ধাগুনে যুদ্ধোত্ মারা পুরিবাক্।

²⁶ সিয়োনর গেট্‌টুন্ বিলেপ আর আবিলেচ্ গুরিবাক্; সিয়োনানে বেক্কানি আড়েইনে মাদিত্ বজিবো।