যিশাইয় 29 - Chakma Bible

যিরূশালেমর দুদ্দজা

¹ হায়, অরীয়েল, অরীয়েল, দায়ূদোর থেবার জাগায়ানর শঅরান্! তুই বজরর্ পর্ বজর্ পার্ গুরি যর্ আরি তঅ পরব্‌পুন ঘুরি ঘুরি এত্তন্।

² মাত্তর্ মুই অরীয়েল উগুরে দজা আনিম্। তে দুঘ্ পেবঅ আর আবিলেচ্ গুরিবো; তে মইদু এক্কো অরীয়েল ধোক্ক্যেন্, অত্তাৎ এক্কো পূযো ধোক্ক্যেন্ অবঅ।

³ মুই তঅ চেরোকিত্তে তঅ বিরুদ্ধে তাম্বুল ফেলেম্, তাম্বুল ঘর্ তুলিনে তরে ঘিরিম্, আর তঅ বিরুদ্ধে অজল্ গুরি বিদে বানেম্।

⁴ তরে তলে লামা অবঅ আর তুই মাদিত্তুন্ কধা কবে; ধূল্যেত্তুন্ লেবেরা-জেবেরা গুরি তঅ কধানি শুনো যেবঅ। ভূদো রঅ ধোক্ক্যেন্ মাদিত্তুন্ তঅ রবো এবঅ; ধূল্যেত্তুন্ তঅ কধানি এক্কেনা এক্কেনা গুরি শুনো যেবঅ।

^5-6 মাত্তর্ তর্ সেই শত্রুগুন ধূল্যে ধোক্ক্যেন্ গুড়ি অবাক্, সেই চিৎনপুজ্যে দলুন্ অবাক্ উড়ি যেইয়্যে তুজো ধোক্ক্যেন্। আদিক্ক্যেন্‌গুরি, এক সময়োত্ বেগত্তুন্ খেমতাবলা লগেপ্রভু মেঘ গুজুরোনি, ভূজোল্, দাঙর্ রঅ, তুট্ট্যে বোইয়্যের্, বড়্ ঝড় আর আগুনো লেবেয়্যে জিল্লোই তারারে সাজা দিবো।

⁷ সেক্কে বেক জাদত্তুন্ যে দলুনে অরীয়েল বিরুদ্ধে যুদ্ধো গত্তন্, অত্তাৎ যিগুনে তারে আর তা ঘরানিরে আক্রমণ গোজ্যে আর তারে দজাত্ ফেল্যন্ তারা অবাক্ স্ববন ধোক্ক্যেন্ আর রেদো অক্তত্ দর্শন ধোক্ক্যেন্।

⁸ যিগুনে সিয়োন মুড়োবো বিরুদ্ধে যুদ্ধো গোজ্যন্ সেই বেক জাদর্ দলুনোর্ অবস্থা এবাবোত্যে অবঅ-পেট্ পুজ্যে মানুচ্ যেধোক্ক্যেন্ হানার্ স্ববন দেগন্ মাত্তর্ ঘুমোত্তুন্ জাগিলে তার পেট্ পুরোনাগান্ থেই যায়; আরঅ পানি তিরেস্ পেইয়্যে মানুচ্ যেধোক্ক্যেন্ পানি হেবার্ স্ববন দেগন্ মাত্তর্ তার তিরেস্ থায় আর তে বল্‌পোজ্যে অবস্থায় জাগি উদে।

⁹ তুমি আমক্ ওইয়ো; চোগ্ খাদিনে কান্ মান্‌জ্য ধোক্ক্যেন অ; মাত্তল্ অ, মাত্তর্ আংগুর-রস হেইনে নয়; দুলি পড়, মাত্তর্ মদ হেইনে নয়;

¹⁰ কিত্তে লগেপ্রভু তমা উগুরে এক্কান্ ঘুর্‌ঘুজ্যে ঘুম আন্যে; তমা চোগ্‌কুন যে ভাববাদীগুনে, তমার্ সেই চোগ্‌কুন তে নাঢি দিয়্যে আর তমার্ মাঢাগুন যে রিনিচেইয়্যে গুনে, তমার্ সেই মাঢাগুন্ তে ঢাগি দিয়্যে।

¹¹ এই পুরো দর্শনান্ তমা ইদু বানা সীলমহ্‌র দিয়্যে বোইয়ো ধোক্ক্যেন্ ওইয়্যে। যে পড়ি জানে তারে যুনি সে বোইবো দিইনে কুয়ো অয়, “দোয়্যে গুরি এ বোইবো পড়্,” সালে জোবত্ তে কবঅ, “মুই ন-পারিম্, কিত্তে ইবে সীলমহ্‌‌র গরা ওইয়্যে‌‌”

¹² বা যে পড়ি ন-জানে তারে বোইবো দিইনে যুনি কুয়ো অয়, “দোয়্যে গুরি ইবে পড়্,” সালে জোবত্ তে কবদে, “মুই পড়ি ন-জানং।”

¹³ প্রভু কোইয়্যেদে, “এ মানুচ্চুনে মুয়োদি মরে উবোসনা গরন্ আর মুয়োদি মরে সর্মান গরন্, মাত্তর্ তারার্ মনানি মত্তুন্ দূরোত্ থায়। তারা বানা মান্‌জ্যর শিগেয়্যে সুদোম্বোই মরে উবোসনা গরন্।

¹⁴ সেনত্তে মুই আরঅ দোল্ আমক্ অবার কাম্‌বোই এ মানুচ্চুনোরে হতভম্ব গুরিম; সেক্কে জ্ঞানীগুনোর্ জ্ঞানানি বর্‌বাত ওই যেবঅ আর বুদ্ধিবলাগুনোর্ বুদ্ধিগানি লুগি যেবগোই।” ‌‌

¹⁵ অভিশাব্ পোড়োক্ সেই মানুচ্চুনোর্, যিগুনে লগেপ্রভু ইত্তুন্ তারার্ পরিকল্পনাগানি লুগেবাত্তে জদবদে চেট্ট্যা গরন্। তারা আন্ধারত্ তারার্ কামানি গরন্ আর ভাবন্, “কন্না আমারে দেখ্যে? কন্না কোই পারিবো?”

¹⁶ তমার্ কেজান্ উগুদো বুদ্ধি! তুমি দঅ কুমোর্ আর মাদিগানরে এক্কুই মনে গোজ্য! যে বানেয়্যে তার্ বানেয়্যে জিনিস্‌‌‌‌‌ছানে কি তা পৌইদ্যেনে কোই পারে, “তে মরে ন-বানায়”? পিলেবো কি কুমোর পৌইদ্যেনে কবঅ, “তে কিচ্ছু হবর্ ন-পায়”?

¹⁷ কয়েক্ দিনো ভিদিরে দঅ লেবাননর্ ঝার্ এক্কান বোল্‌বোল্যে ওই উদিবো আর বোল্‌‌‌‌‌‌বোল্যে ভূইয়ান ঝার ধোক্ক্যেন মনে গুরিবা।‌‌‌‌‌

¹⁸ সেদিন্যে কান্ বরাগুনে সেই জড়া লাগেয়্যে বোইবোর্ কধা শুনিবাক্, আর ঘুর্‌ঘুজ্যে আন্ধারত্ থেইয়্যে কানুনে দেগিবাক্।

¹⁹ নম্র মানুচ্চুনে আরঅ লগেপ্রভুরে দেগিনে হুজি অবাক্, আর যিগুনে অমকদ নাঢা তারা ইস্রায়েলর সেই পবিত্র মানুচ্চোরে নিইনে ফুত্তি গুরিবাক্।

²⁰ চিৎনপুজ্যেগুনে আর্ ন-থেবাক্; ঠাট্টা-মশ্‌কারী গুরিয়্যেগুনে শেজ্ ওই যেবাক্, আর যিগুনে ভান্ন্যেই কাম্ গুরিবার্ চান্ তারারে ভস্ত গুরি ফেলা অবঅ।

²¹ তারা মিজে কধালোই মান্‌জ্যরে দুষি গরন্, শঅর-গেদোত্ নিদ্দুযির তপ্পেদি থেইয়্যে মানুচ্চোরে ফালত্ ফেলান্ আর মিজে সাক্ষি দিইনে নিদ্দুযিবোরে ন্যায়বিচের্ পেবাত্তে ন-দুয়োন।

²² সেনত্তে অব্রাহামর্ উদ্ধোর্‌গুরিয়্যে লগেপ্রভু যাকোব বংশ পৌইদ্যেনে কোইয়্যেদে, “যাকোবে আর্ লাজ্ ন-পেবঅ; তারার্ মুয়োনি আর্ কালাচদামু ন-অবঅ।

²³ যেক্কে তারা তারা ভিদিরে মঅ আঢ কামানি, অত্তাৎ তারার্ ঝি-পুয়োগুনোরে দেগিবাক্ সেক্কে তারা মরে পবিত্র বিলিনে মানিবাক্। যাকোবর্ সেই পবিত্র মানুচ্চোরে তারা পবিত্র বিলি স্বিগের্ গুরিবাক্ আর ইস্রায়েলর্ গোজেনরে ভোক্তিগুরিনে দোরেবাক্।

²⁴ যিগুনে গমেডালে বুঝি ন-পারন্ তারা গমেডালে বুঝি পারিবাক্, আর যিগুনে অখুজিগান্ ফগদাং গরন্ তারা শিক্ষ্যে লবাক্।”