যিশাইয় 23 - Chakma Bible

সোরর বিরুদ্ধে লগেপ্রভুর কধা

¹ সোর পৌইদ্যেনে লগেপ্রভুর কধাগান ইয়েন: ও দাঙর্ দাঙর্ তর্শীশ-জাহাজ্‌ছানি, আবিলেচ্ গর, কিত্তে সোর ভস্ত ওই যেইয়্যে; সিয়েনত্ ঘরঅ নেই, বন্দর্‌অ নেই। সাইপ্রাস দ্বিবোত্তুন্ তুমি এ হবরান্ পেইয়ো।

² ও সাগর পার মানুচ্চুন্, ও সীদোনর বেপারিগুন্, তুমি অলর্ অ। তমা নাবিক্কুনে সাগর পার ওই যেদাক্।

³ শীহোর গাঙর্, অত্তাৎ য়েল্ গাঙ পারর্ শোজ্যগানি দাঙর্ সাগর উগুরেদি এদঅ; সোরর আয় এলদে সে গাঙ পারর্ খেত-খেত্তিগানি, আর সোর ওই উদিলোদে বেক্ জাদ্‌তুনোর বাজার।‌‌‌

⁴ ও সীদোন, লাজেস্, কিত্তে সাগর, সাগরর্ ঘরানে এ কধাগান কত্তে,“মর্ পুয়ো-পুদেবাত্তে পীড়েয়ো ন-অয়, মুই জর্ময়ো ন-দুয়োং। মুই পুয়োগুনোরে মানুচ্অ ন-গরং আর মিলেগুনোরে দাঙর্ ন-গরং।”

⁵ মিসরত্ এ হবরান্ গেলে পরেদি মিসরীয়গুনে সোরর হবরান্দোই মনত্ দুঘ্ পেবাক্।

⁶ ও সাগর পার মানুচ্চুন্, আবিলেচ্ গরঅ; তুমি পার্ ওইনে তর্শীশোত্ যঅ।

⁷ ইয়েন কি তমার্ সেই ফুত্তি গুরিবার শঅর্, সেই পুরোণ, অমকদ পুরোণ শঅর্, যিগুনোর মানুচ্চুনে দূর্ দেজত্ বজত্তি গুরিবাত্তে যেদাক্?

⁸ যে সোর অন্যগুনোর মুকুট পিনেদ, যিবের বণিককুনে রাজপুরুষ আর বেবসায়ীগুনে পিত্‌থিমীত নাঙ্-গোজ্যে, তা বিরুদ্ধে কন্না এ পরিকল্পনাগান গোজ্যে?

⁹ তার বেক্ দেমাগ্‌কানে ভস্ত গুরিবাত্তে আর পিত্‌থিমীর নাঙ-গোজ্যে মানুচ্চুনোরে তলে ফেলেবাত্তে বেগত্তুন্ খেমতাবলা লগেপ্রভু এ পরিকল্পনাগান গোজ্যে।

¹⁰ ও তর্শীশোর মানুচ্চুন্, য়েল্ গাঙর পানিগান যেবাবোত্যেগুরি পারানি ভাঙি যায় সেবাবোত্যেগুরি তুমিয়ো দেজত্ ছিদি পড়; তমারে আক্‌‌সোই রাগাইদ্যে ধোক্ক্যেন আর কনজন নেই।

¹¹ লগেপ্রভু বড়্ সাগর উগুরে তা আঢ্‌তান বাবেই দিয়্যে আর রেজ্যগানিরে ভূজোল ধোক্ক্যেন গোজ্যে। তে কনান দেজ পৌইদ্যেনে এক্কান উগুম জারি গোজ্যে যেনে তার ঘরানি ভস্ত গরা অয়।

¹² তে কোইয়্যেদে, “ও সীদোনর মানুচ্চুন্, তমার্ ফুত্তিগানি থুম্ ওইয়্যে, কিত্তে তুমি দঅ অত্যেচারিত ওইয়ো। উদো, পার্ ওইনে সাইপ্রাস দ্বিবোত্ যঅ; সিদুয়ো তুমি জিরেন্ ন-পেবা।”

¹³ বাবিল দেজ্‌ছান ইন্দি রিনি ছঅ‍; এক সময়োত্ তা মানুচ্চুনো পৌইদ্যেনে কনজনে হবর্ ন-পেদাক্। আসিরিয়গুনে বাবিলানরে ধূল্যেচর-চাগালার পরাণবলাগুনোর জাগা বানেয়োন, মাত্তর্ বাবিলীয়গুনে সোররে আক্রমণ গুরিবাত্তে চুগিদার-ঘর ধোক্ক্যেন অজল্ অজল্ রথ বানেয়োন, তার দাঙর্ দাঙর্ ঘরানি লুদেয়োন আর তারে এক্কান ভস্তর্ কুড়্ বানেয়োন।

¹⁴ ও দাঙর্ দাঙর্ তর্শীজ-জাহাজ্‌ছানি, তুমি আবিলেচ্ গরঅ, কিত্তে তমা আশ্রয়-বন্দরানি ভস্ত ওই যেইয়্যে।

¹⁵ সে সময়োত্ এক্কো রাজার জিংকানিগান, অত্তাৎ সত্তুর্ বজরত্তে সোররে ভুলি যাহ্ পুরিবো। মাত্তর্ সে সত্তুর্ বজর শেজত্ বেশ্যে মিলের গান ধোক্ক্যেন সোরর অবস্থা এ বাবোত্যে অবঅ:

¹⁶ ও ভুলি যেইয়্যে বেশ্যে মিলে, বীণালোই শঅরত্ আঢি আঢি বেড়া। গমেডালে বীণা বাজা; ভালোক্কুন গীদ্ গাহ্ যেনে তরে আরঅ ইদোত্ রাগা যায়।

¹⁷ সত্তুর্ বজর পার্ ওই যানার্ পরেদি লগেপ্রভু সোর ইন্দি মনান্ দিবো। সেক্কে তে তার বেবসা কামত্ ফিরি যেইনে পিত্‌‍‍থিমীর বেক্ রেজ্যগানি লগে বেবসা চালেব।

¹⁸ মাত্তর্ তার লাভ আর আয় লগেপ্রভুর নাঙে যুদো গুরি রাগা অবঅ; সিগুন জোমেই রাগানা বা থুবোনা ন-অবঅ। যিগুনে লগেপ্রভু মুজুঙোত্ আঢাউদো গরদন্ তারার্ হানা-দানাত্তে আর দোল্ দোল্ কাবড়-চুগোরত্তে তার সে লাভ্‌‍‍‍পুন খরচ্ গরা অবঅ।