যিশাইয় 22 - Chakma Bible

যিরূশালেম পৌইদ্যেনে লগেপ্রভুর্ কধা

¹ দর্শন-কলগ পৌইদ্যেনে লগেপ্রভুর কধাগান ইয়েন: তর্ ইক্কিনে কি ওইয়্যেদে যে, তর্ বেক মানুচ্চুনে ছাল উগুরে উঠ্যন্?

² ও যাগুলুগে ভরা শঅরান্, ও কোজ্যে বাজেয়্যে আর রঅ ছাজ্যে শঅরান্, তঅ মরা মানুচ্চুনে দঅ তলোয়ার আঘাতে ন-মরন্ বা যুদ্বোত্অ ন-মরন্।

³ তঅ নেতাগুন বেক্কুনে একসমারে ধেই যেইয়োন্; ধনু বেবহার ন-গুরিনে তারারে ধরা ওইয়্যে, যুনিয়ো তারা দূরোত্ ধেই যেইয়োন্ তো তারারে বেক্কুনোরে একসমারে বন্দী গুরিনে নেযা ওইয়্যে।

⁴ সেনত্তে মুই কলুং, “মঅ কায়-কুরেত্তুন যগোই; মরে যদবদে কানিবাত্তে দুয়ো। মঅ মানুচ্চুন ভস্ত ওইয়োন বিলিনে মরে বুঝেবার চেষ্ট্যা ন-গোজ্জ্য।”

⁵ বেগত্তুন্ খেমতাবলা প্রভু লগেপ্রভুত্তুন্ দর্শন-কলগত্ অমকদ দর্‌গরেপারা, টেঙোই মাড়িবার আর যাগুলুগোর এক্কো দিন এচ্চ্যে। সিবে দেবালান্ ভাঙি ফেলেবার আর মুড়ো-মুড়ি ইদু কানিবার্ এক্কো দিন।‍‍

⁶ এলমর মানুচ্চুনে সেল্ থবার্ কাল্লোঙো তুলি নেযেয়োন; তারা সমারে রথ আর ঘড়া চালেয়্যেগুনোর দল্লো আঘে। কীরোর মানুচ্চুনে ঢাল্লোই যুক্কোল্ ওইয়োন।

⁷ তর্ বেঈ লোইয়্যে কলগ্‌কানি রথ্‌তোই ভুরি যেইয়্যে, আর শঅর-গেট্‌তুনোত্ ঘড়াগুনোরে যুক্কোল্ রাগা ওইয়্যে।

⁸ যিহূদার রোক্ক্যের্ বেবস্থাগান দূর গরা ওইয়্যে। সেদিন্যে তুমি ঝার-কুটিরোর্ আত্যেরানি উগুরে বিশ্বেজ্ গোজ্য।

⁹ তুমি দায়ূদ-শঅরর্ দেবালানি ভিদিরে বোউত্ ফাদামারা দেখ্য আর তলেদি পুয়োরো পানিগান জোমেয়ো।

¹⁰ তুমি যিরূশালেমর ঘরানি গুণ্য আর দেবালানি দরমর গুরিবাত্তে সিয়েনি ভাঙ্য।

¹¹ পুরোণ পোরো পানিগান রাগেবাত্তে তুমি দি দেবাল সংমোধ্যে এক্কান জাগা বানেয়ো। মাত্তর্ যিবে এ অবস্থাগান ঘোদেয়্যে তুমি তান্দি ন-চেলা, বা ভালোক্ দিন আগে যিবে এ বেক্কানি পরিকল্পনা গোজ্যে তা উগুরে তমার্ ভোক্তি ন-এলঅ।

¹² সেদিন্যে বেগত্তুন্ খেমতাবলা প্রভু লগেপ্রভু কানিবার্ বা আবিলেচ্ গুরিবাত্তে, মাঢাবো চুলানি মুড়েবাত্তে আর বস্তা পাদা পিনিবাত্তে তমারে ডাক্ক্যে।

¹³ মাত্তর্ চঅ, সিয়েনত্ রঙ্গ ফুত্তি আর রঅ রঅ ছঅ ছঅ চলের্, আর গোরু ভেড়া কাবিনে আহ্ য়েরা আর আংগুর-রস হানা চলের্। তুমি কত্তে, “এজঅ, আমি হানা-দানা গুরিই, কিত্তে কেল্যে আমি মুরি যেবং।”

¹⁴ বেগত্তুন্ খেমতাবলা প্রভু লগেপ্রভু মঅ ইদু এ কধাগান ফগদাং গোজ্যে, “ তমার্ মরণ সময়োত্অ এ পাপ্পান খেমা গরা ন-অবঅ। মুই বেগত্তুন্ খেমতাবলা প্রভু লগেপ্রভু এ কধাগান কঙর্।”

¹⁵ বেগত্তুন্ খেমতাবলা প্রভু লগেপ্রভু কোইয়্যেদে, তুই রাজার সেই ভান্ডারীবো ইদু, রাজঘরর্ ভারান্-পেইয়্যে শিব্‌‌নর ইদু যেইনে কঅ,

¹⁶ তুই ইদু কি গরর্? আর ইদু নিজোর গোরান্ কুড়িবাত্তে, অজল্ জাগাত তঅ গোরান্ ঠিগ্ গুরিবাত্তে, মুড়ো কাবিনে জিরেবার-জাগায়ান্ বানেবাত্তে কন্না তরে অধিকার দিয়্যে?

¹⁷ উজিয়ার্, ও বোলী মানুচ্চো, লগেপ্রভু তরে দরমর গুরি ধুরিনে মেলা মারিবাত্তে যার্।

¹⁸ তে তরে দরমর গুরি গুজেইনে বল ধোক্ক্যেন্ গুরি এক্কান দাঙর্ দেজত্ ফেলেই দিবো। সিয়েনত্ তুই মুরি যেবে, আর তর্ দোল্ দোল্ রথ্‌তানি সিয়েনত্ পড়ি থেবঅ। তুই তঅ গিরোজ্‌‌‌সো রাজঘরান অসর্মান গোজ্যস্।

¹⁹ তঅ পোজিশনানত্তুন্ মুই তরে সোরেই দিম্; তঅ জাগানত্তুন্ তরে তলেদি লামেই দিয়্যে অবঅ।

²⁰ “ ‘সেদিন্যে মঅ চাগর্‌বো হিল্কিয়োর পুয়ো ইলীয়াকীমরে মুই ডাগিম্। ‌‌‌

²¹ তারে মুই তঅ পোজাক্কান উরেই দিম্ আর তঅ কাম ভারান তা আঢত্ তুলি দিম্। তে যিরূশালেমর আদাম্মেগুনোর আর যিহূদা বংশর বাব ধোক্ক্যেন অবঅ।

²² তা কানাত্ মুই দায়ূদো বংশর চাবিগান রাগেম; তে যিয়েনি খুলিবো সিয়েনি কনজনে নাঢি রাগেই ন-পারিবো, আর যিয়েনি বন্ধ গরে সিয়েনি কনজনে খুলি ন-পারিবো।

²³ এক্কান দরমর জাগাত্ মুই তারে খুদো ধোক্ক্যেন গুরি লাগেই দিম্, তা বাব বংশবোত্তে তে অবদে এক্কান সর্মানর মানুচ্।

²⁴ তা বংশবোর বেক্ কামানি তা কানাত্ থেবঅ। নানান্ বাবোত্যে চিগোন-চাগন্ পিলে যেধোক্ক্যেন খুদোত্ দুলোন সেধোক্ক্যেন তার ঝি-পুয়োগুন আর বংশধরুন তা কানাত্ দুলি দুলি থেবাক্।

²⁵ যে খুদোবো দরমর জাগাত্ লাগেই দিয়্যে ওইয়্যে সেদিন্যে সিবে খুলি এবঅ; সিবে পড়ি যেবঅ আর তা উগুরে যে ভারান্ দুলি দুলি আঘে সিয়েন কাবি ফেলা অবঅ।’ ” ইয়েন অলঅ বেগত্তুন্ খেমতাবলা লগেপ্রভুর কধা। ইয়েনি ঘুদিবো, কিত্তে লগেপ্রভু নিজেই সিয়েনি কোইয়্যে।