যিশাইয় 21 - Chakma Bible

বাবিলো বিরুদ্ধে আগাম্ কধা

¹ ধূল্যেচর-দাঙর্ সাগর পৌইদ্যেনে আগাম্ কধা: নেগেভত্ যেবাবোত্যে গুরি তুঠ্যে বোইয়্যের্ বেঈ যায় সেবাবোত্যেগুরি ধূল্যেচর-চাগালাত্তুন্, সেই দর্‌‌গরেপারা দেজ্‌‌ছানত্তুন্ এক্কান দজা এজের্।

² এক্কান দর্‌গরেপারা দর্শন মরে দেগা ওইয়্যে-বেঈমান্নো বেঈমানি গোজ্যে, আর লুদেয়্যেবো লুদেয়্যে। ও এলম, আক্রমণ গর্; মাদিয়া, ঘিরি ফেলা। বাবিলে যেদক্কানি দুঘ্-কষ্ট ঘোদেয়্যে সিয়েন মুই বন্ধ গুরি দিম্।

³ মুই পেট সুলোনিলোই অমকদ দুঘ্ পাঙর্, মিলেগুনোর পুয়ো পুদোনা ধোক্ক্যেন পিড়েয় মরে ধোজ্যে। মুই এমন্ পিড়ে পাঙর্, ন-শুনোঙর্ এমন্ দরাঙর, ন-দেগঙর্।

⁴ মঅ মনান্ ধুক্ ধুক্ গরের্; অমকদ দর্ বুগ লাগিনে যারকাদা ছারি উদোন্। যে সাজোন্যেগানত্তে মুই বাজ্জেই থেদুং সিয়েন ইক্কিনে মইদু দর্‌গরেপারা ওইয়্যে।

⁵ তারা হানা সাজাদন্, পাদি বিজাদন্ আর হানা-দানা গত্তন্। ও সেনাপতিগুন, উদো, ঢালত্ তেল বাজেই দো।

⁶ প্রভু মরে কোইয়্যে, “তুই যেইনে এক্কো চুগিদার্ নেযা। তে যিয়েনি চেবঅ সিয়েনির হবর্ যেন তে দে।

⁷ তে যেক্কে জড়া জড়া ঘড়া চালেয়্যে দেগিবো আর গাধা বা উদো পিদোত্ চোজ্যে মানুচ্চুনোরে দেগিবো, সেক্কে যেন তে উজিয়ার্ অয়, যদবদে উজিয়ার্ অয়।”

⁸ সেক্কে সেই চুগিদার্‌বো রঅ ছাড়িনে কবঅ, “ও মর্ প্রভু, দিনকে দিন অজল্ চুগিদার-ঘরত্ মুই থিয়্যেই থাং; মুই পত্তি রেদোত্ মর্ চুগি দেদে জাগানত্ থাং।

⁹ চঅ, জড়ায় জড়ায় ঘোড়া চালেয়্যে এজদন্।” সে পরেদি তে কবদে, “বাবিলোর পতন ওইয়্যে, পতন ওইয়্যে। তার বেক্ দেবেদাগুনোর মূত্তিগুন্ চুরমার ওইনে মাদিত্ পড়ি আগন্।”

¹⁰ ও মঅ মানুচ্চুন্, খেত-খেত্তি ধোক্ক্যেন্ তমারে দঅ মাড়া ওইয়্যে। বেগত্তুন্ খেমতাবলা লগেপ্রভু ইত্তুন্, ইস্রায়েলর গোজেন ইত্তুন্ মুই যিয়েনি শুন্ন্যং সিয়েনি তমারে জানেলুং।

ইদোম বিরুদ্ধে আগাম্ কধা

¹¹ দূমা, অত্তাৎ ইদোম পৌইদ্যেনে আগাম্ কধা ইয়েন; সেয়ীরত্তুন্ কনজনে মরে ডাগিনে কলঅ, “চুগিদার্‌বো, রেত্তো আর কদক্কন্ আঘে?”

¹² চুগিদার্‌বো জোব্ দিলো, “বেন্যেমাদান পহ্‌‌র ওই এজের্, মাত্তর্ সে পরেদি রেদ্‌‌অ এজের্। যুনি আরঅ পুজোর্ গুরিবার চাজ্ সালে ফিরি এইনে আরঅ পুজোর্ গর্।”

আরব বিরুদ্ধে আগাম্ কধা

¹³ আরব পৌইদ্যেনে আগাম্ কধা ইয়েন: ও দদানীয় যেইয়্যে দল্লো, তুমি যিগুনে আরবর্ ধূল্যেচর-চাগালাত্ তাম্বুল টাঙ,

¹⁴ তুমি পানি তিরেস্ পেইয়্যে মানুচ্চুনোত্তে পানি আন। ও টেমা দেজর্ আদাম্মেগুন্, তুমি ধেই যেইয়্যে মানুচ্চুনোত্তে হানা আন।

¹⁵ তারা তলোয়ার মুজুঙেত্তুন্, খুলো তলোয়ার মুজুঙোত্তুন্, বেঙা ধনু মুজুঙোত্তুন্ আর দর্‌গরেপারা যুদ্ধোর মুজুঙোত্তুন্ ধেই যাদন্।‌‌

¹⁶ প্রভু মরে কোইয়্যেদে, “চুক্তি গোজ্যে চাগরে যেধোক্ক্যেন্ বজরুন গুণোন্ সেধোক্ক্যেন গুরি ঠিগ্ এক বজর ভিদিরে কেদরর বেক্ সয়সাগজ্যেগানি থুম্ ওই যেবঅ।

¹⁷ কেদরর ধনুবলা যোদ্ধোগুনো ভিদিরে কয়েক্কো মান্‌জ্যে বাঁজি থেবাক্। ইস্রায়েলর গোজেন লগেপ্রভু এ কধাগান কোইয়্যে।”