যিশাইয় 20 - Chakma Bible

মিসর আর কূশ দেজত্তে চিহ্নো

¹ আসিরিয়া দেজর রাজা সর্গোনর পাদেয়্যে সেনাপতি অস্‌‌দোদে এইনে সিয়েন আক্রমন গুরিনে গজক্ গুরিলো।‍

² যে বজর তে আক্রমন গোজ্যে সে বজরত্ লগেপ্রভু আমোসর পুয়ো যিশাইয়রে কোইয়্যেদে, “তঅ কিয়্যেগানত্তুন্ বস্তা পাদা আর টেঙত্তুন্ জদা খুলি ফেলা।” সেনে যিশায়ই লাংটা ওইনে সুদো টেঙোই ঘুরি বেড়া ধুরিলো।

³ সে পরেদি লগেপ্রভু কলঅ, “মঅ চাগর্ যিশাইয় যেধোক্ক্যেন গুরি মিসর আর কূশর বিরুদ্ধে এক্কান চিহ্নো আর আগাম্ লক্ষন ইজেবে তিন বজর সং লাংটা ওইনে সুদো টেঙোই ঘুরি বেড়য়্যে,

⁴ ঠিগ সেধোক্ক্যেন্‌গুরি আসিরিয়ার রাজা মিসররে লাজত্ ফেলেবাত্তে মিসরীয় আর কূশীয় বন্দীগুনোর পুয়ো-বুড়ো বেক্কুনোরে লাংটা অবস্থায়, সুদো টেঙোই আর পিজেদি-খুলো অবস্থায় নেযেব।

⁵ যিগুনে কূশ দেজ উগুরে বিশ্বেজ্ গোজ্যন আর মিসররে নিইনে বড়াই গোজ্যন্ তারা দোরেবাক্ আর লাজেবাক্।

⁶ সেদিন্যে সাগর পার আদাম্মেগুনে কবাক্, ‘চঅ, যিগুনো উগুরে আমি বিশ্বেজ্ গোজ্যেই আর বল্ পেবাত্তে আর আসিরিয়ার রাজা আঢত্তুন্ রোক্ক্যে পেবাত্তে যিগুনো ইদু যেইয়্যেই তারার অবস্থা কি ওইয়্যে। সালে আমি কেধোক্ক্যেন গুরি বাঁজিবোং?’ ”