যিশাইয় 19 - Chakma Bible

মিসর দেজ্‌‌‌ছান পৌইদ্যেনে লগেপ্রভুর কধা

¹ মিসর দেজ্‌ছান পৌইদ্যেনে লগেপ্রভুর কধা ইয়েন:‌‌ চঅ, লগেপ্রভু এক্কান যাদিমাদি যাইদে মেঘত্ গুরিনে মিসর দেজত্ এজের্। তা মুজুঙোত্ মিসর মূত্তিগুন্ গির্‌গিরেবাক্, আর মিসরীয়গুনো মনত্ সাহস ন-থেবঅ।‌‌

² লগেপ্রভু কোইয়্যেদে, “মুই এক মিসরীয়রে অন্য মিসরীয় বিরুদ্ধে উত্তেজিত গুরি তুলিম্; সেক্কে ভেই ভেইয়োর্ বিরুদ্ধে, পাড়াল্ল্যে পাড়াল্ল্যের্ বিরুদ্ধে, শঅর্ শঅরর্ বিরুদ্ধে, আর রেজ্য রেজ্যর্ বিরুদ্ধে যুদ্ধো গুরিবো।

³ মিসরীয়গুনে মন বল্ আরেবাক্, আর মুই তারার সল্লাগান্ নিষ্ফল গুরি দিম্। তারা মূত্তি আর মরাগুনোর্ আত্মার্ ইধু, ভূদো ইধু, আর ভান্ন্যেই আত্মাগুনো সমারে মিজেয়্যে রোক্ক্যেগুরিয়্যেগুনো ইধু সল্লা চেবাক্।

⁴ এক্কো কড়া গিরোজ আঢত্ মুই মিসরীয়গুনোরে তুলি দিম্; এক্কো দর্‌‌‌‌গরেপারা রাজা তারারে শাজন্ গুরিবো।” ইয়েন অলঅ বেগত্তুন্ খেমতাবলা প্রভু লগেপ্রভুর্ কধা।

⁵ য়্যেল্ গাঙর্ পানিগান শুগেই যেবঅ, আর গাঙান সংমোধ্যে চর্ পড়িনে সিয়েন ফাদি যেবঅ।

⁶ নালাগুনোত্ পজাবাজ্ অবঅ; মিসরর গাঙানি চিগোন ওইনে শুগেই যেবঅ; নল আর খাগড়াগানি শুগেই যেবঅ;

⁷ য়্যেল্ গাঙ পারর বেক্ গাজ্-বাশ্‌চুন শুগেই যেবাক্। গাঙ পারর্ বীজ্ ফেলেয়্যে খেত্‌‌তানি শুগেই যেবঅ; চারাগুন শুগেইনে উড়ি যেবঅ, কিচ্চু ন-থেবঅ।

⁸ জাল্যেগুনে হায় হায় গুরিবাক্ আর য়্যেল্ গাঙত্ যিগুনে বুজ্জি ফাদন্ তারা আবিলেচ্ গুরিবাক্। যিগুনে পানিত্ জাল্ ফেলান তারা বল্‌‌পোজ্যে অবাক্।

⁹ যিগুনে মসীনার সুদো যুক্কোল্ গরন যিগুনে পাদল্ কাবড় বুনোন্ তারা আশা আরেবাক্।

¹⁰ জগৎ সংসারর্ বেক গড়াগান্ ভাঙি পুরিবো আর দিন-মজুর বেক্কুনে মনত্ দুঘ্ পেবাক্।

¹¹ সোয়নর দাঙর্ পোজিশনর্ কামগুরিয়্যেগুনে এক্কুবারে ভুল্ বেদমা; ফরৌনর জ্ঞানী সল্লাদিয়্যেগুনে অত্তনেইয়্যে উপদেজ্ দুয়োন্। তুমি ফরৌণরে কেধোক্ক্যেন গুরি কোই পার, “মুই জ্ঞানী মানুচ্চুনো ভিদিরে একজন আর খুব পুরোনা দিনো রাজাগুনোর বংশধর্”?

¹² তর্ জ্ঞানী মানুচ্চুন্ ইক্কিনে কুদু? মিসর বিরুদ্ধে বেগত্তুন্ খেমতাবলা লগেপ্রভু যিয়েনি ঠিগ্ গোজ্যে সিয়েনি তারা নিজে জানদোক্ আর তরে কোদোক্।

¹³ সোয়নর দাঙর্ পোজিশনর্ কামগুরিয়্যেগুনে ভুল্-বেদমা ধোক্ক্যেন ওইয়োন্, আর নোফর নেতাগুনে ঠোক্ক্যন্; মিসরর আজল্ নেতাগুনে মিসরর ভান্ন্যেই পধেদি নেযেয়োন।

¹⁴ লগেপ্রভু তারা ভিদিরে যাগুলুগ্ ভাব গুরি দিলো, সেক্কে মাত্তলে ধোজ্যেবো যেধোক্ক্যেন তার অগলেদে কামত্ টলমল গরে সেধোক্ক্যেন বেক কামানিত্ তারা মিসরানরে টলমল গরাদন্।

¹⁵ মিসর ভিদিরে মাঢা বা লেজ, খাজোরো বাগল্ বা নল-খাগাড়া, কনজনে কিচ্চু গুরি ন-পারিবাক্।

¹⁶ সেদিন্যে মিসরীয়গুনে মিলে ধোক্ক্যেন অবাক্। তারা বিরুদ্ধে বেগত্তুন্ খেমতাবলা লগেপ্রভু আঢ্ তুলিবো আর সিয়েন দেগিনে তারা দরে গির্‌গিরেবাক্।‍

¹⁷ মিসরীয়গুনো ইদু কনজনে যিহূদা দেজর্ নাঙান গিনিলে সিয়েন তারার্ তপ্পেদি অমকদ দর্‌‌গরেপারা অই। বেগত্তুন্ খেমতাবলা লগেপ্রভু তারা বিরুদ্ধে যিয়েনি গুরিবো বিলি ঠিগ্ গোজ্যে সিয়েনত্তে তারা দোরেবাক্।

¹⁸ সেদিন্যে মিসরর্ পাচ্ছান্ শঅরত্ কনানর ভাষা কবাক্ আর বেগত্তুন্ খেমতাবলা লগেপ্রভু উগুরে বিশ্বেজ্ থেবঅ বিলিনে শমক্ গুরিবাক্। সে শঅরানি ভিদিরে এক্কানরে কুয়ো অবঅ ভস্ত ওইয়্যে শঅর।‌

¹⁹ সেদিন্যে মিসর দেজ ভিদিরে লগেপ্রভুর নাঙে এক্কো পূজো আর তা দুযিত্ এক্কো খুদো থেবঅ।

²⁰ ইয়েনি অবঅ মিসর দেজত্ বেগত্তুন্ খেমতাবলা লগেপ্রভুর নাঙে এক্কান চিহ্নো আর সাক্ষি। তারার্ অত্যেচার গুরিয়্যেগুনোর্ কারনে তারা যেক্কে লগেপ্রভু ইদু কানিবাক্ সেক্কে তে তারা ইদু এক্কো উদ্ধোর্ গুরিয়্যে আর রোক্ষ্যেগুরিয়্যে পাধেই দিবো আর তে তারারে উদ্ধোর্ গুরিবো।

²¹ এবাবোত্যেগুরি লগেপ্রভু মিসরীয়গুনো ইদু নিজোরে ফগদাং গুরিবো আর সেদিন্যে তারা লগেপ্রভুরে স্বিগের্ গুরিবাক্। তারা এ্যামান-উৎসর্ব আর শোজ্য উৎসর্ব গুরিনে তারে উবোসনা গুরিবাক্ আর লগেপ্রভু ইদু মানত্ গুরিনে সিয়েনি ছিড়েবাক্।

²² লগেপ্রভু মিসরানরে আঘাত্ গুরিবো; তে তারারে আঘাত্ গুরিবো আর গম্‌অ গুরিবো। তারা লগেপ্রভু ইন্দি ফিরিবাক্, আর তে তারার কোজোলীগান্দোই রিনি চেবঅ আর তারারে গম্ গুরিবো।

²³ সেদিন্যে মিসরত্তুন্ ধুরি আসিরিয়া সং এক্কান রাজপথ অবঅ। আসিরিয়গুনে মিসরত্ আর মিসরীয়গুনে আসিরিয়াত এজানা-যানা গুরিবাক্। মিসরীয় আর আসিরিয়গুনে এক সমারে উবোসনা গুরিবাক্।

²⁴ সেদিন্যে মিসর, আসিরিয়া আর ইস্রায়েল মিলিনে এক্কো দল অবাক্ আর তারা অবাক্ পিত্‌থিমীগান ইধু এক্কো বর্‌পেইয়্যে।

²⁵ বেগত্তুন্ খেমতাবলা লগেপ্রভু তারারে ইয়েন কোইনে বর্ দিবো, “মঅ মানুচ্চুনে মিসর, মঅ আঢে বানেয়্যে আসিরিয়া আর মর্ অধিকার ইস্রায়েলে বর্‌‌‌পেইয়্যে ওক্‌।”