যিশাইয় 18 - Chakma Bible

কূশ দেশর্ বিরুদ্ধে আগাম্ কধা

¹ হায়! কূশ দেশর্ গাঙানির্ উপারত্ এমন এক্কান দেশ আঘে যিয়েনত্ ডুয়ো ধোক্ক্যেন ঝি ঝি রঅ শুনো যায়।

² সেই দেজ্‌‍‍‍চান পানি উগুরেদি নল্লোই বানেয়্যে নোকোলোই দূত পাদায়। ও যাদিমাদি যেইয়্যে দূত্‌তুন, যে জাদ্‌‍‍‍‍‍তো লাম্বা আর নরম চামাড়াবলা, যে জাদ্‌তোরে কায়-কুরে আর দূরোর্ মানুচ্চুনে দরান্, যে খেমতাবলা জাদ্‌‍‍‍‍‍তো অন্যগুনোরে টেঙোই মাড়ে আর যিবের দেজ্‌‍‍‍‍‍চান গাঙে-ছড়ালোই ভাগ্‌গোজ্যে, তুমি তাইদু ফিরি যঅ।‍‍

³ ও জগদর্ মানুচ্চুন্, ও পিত্‌‍‍‍‍থিমীত বজত্তিগুরিয়্যে বেক্ মানুচ্চুন্, তুমি চঅ, কক্কে মুড়ো-মুড়ি উগুরে বাবতা তুলো অবঅ, আর শুনো, কক্কে তূরী বাজা অবঅ।

⁴ লগেপ্রভু মরে কোইয়্যেদে, “তেল্‌তেল্যে আগাজত্ রোদো তেজ ধোক্ক্যেন্, হরান্যেত্ খেত্-খেত্তি কাবিবার অক্তত্ খুয়ো মেঘ ধোক্ক্যেন্ মুই জুরো গুরিনে মঅ থেবার জাগানত্তুন্ চেই থেম্।”

⁵ খেত্-খেত্তি কাবিবার আগেদি যেক্কে ফুল আর ন-থেবঅ আর সে ফুল্লো আংগুর ওইনে পাগিবো সে অক্তত্ ছুরিলোই তে কুজি ডেলাগুন কাবি ফেলেব আর ছিদি পোজ্যে ডেলাগুন সোরেই দিবো।

⁶ মুড়ো-মুড়ির্ শকুন আর ঝার এ্যামানুন ইদু তারারে বেক্কুনোরে ফেলেই রাগা অবঅ; পুরো গরমকাল্লোত্ শকুনুনে তারারে হেবাক্ আর ঝার্‌‌বো এ্যামানুনে হেবাক্ পুরো যার্‌‌কাল্লো ধুরি।

⁷ সে সময়োত্ বেগত্তুন্ খেমতাবলা লগেপ্রভু ইদু সেই লাম্বা আর নরম চামাড়ার্ জাদ্‌‌‌তুনো ইত্তুন্ বক্‌‌শিজ্ এবঅ। ইবে সেই জাদ্ যিবেরে কায়কুরে আর দূরো মানুচ্চুনে দরান্। ইবে সেই খেমতাবলা জাদ্ যে অন্যগুনোরে টেঙোই মাড়ে আর যিবের দেজ্ গাঙে-ছড়ালোই ভাগ্ গোজ্যে। সে জাদর্ বক্‌‌‌শিজ্‌চানি সিয়োন মুড়োবোত, বেগত্তুন্ খেমতাবলা লগেপ্রভুর থেবার্ জাগানত্ আনা অবঅ।