যিশাইয় 17 - Chakma Bible

দামেস্কর বিরুদ্ধে আগাম্ কধা

¹ দামেস্ক পৌইদ্যেনে আগাম্ কধা ইয়েনি: লগেপ্রভু কোইয়্যেদে, “চঅ, দামেস্কগান্ আর শঅর ইজেবে ন-থেবঅ, সিয়েন অবদে এক্কান ভস্ত ওইয়্যে কুর্।

² অরোয়েরর আদামানি মানুচ্চুনে ফেলেই যেবাক্; য়েমান পালে সিয়েনি গজক্ গুরিবাক্। তারা সিয়েনিত্ পড়ি থেবাক্; কনজনে তারারে দর্ বুগ্ ন-লাগেবাক্।

³ ইফ্রয়িমত্ আর কনঅ ঘর ন-থেবঅ আর দামেস্কত্ রাজখেমতা ন-থেবঅ; অরামর বাঁজি থেইয়্যে মানুচ্চুনে ইস্রায়েলীয়গুনো ধোক্ক্যেন বাঈনী ন গোজ্যে অবাক্।” ইয়েন অলঅ বেগত্তুন্ খেমতাবলা লগেপ্রভুর কধা।

⁴ “সেদিন্যে যাকোবর্ বাঈনী গরানা কুমি যেবঅ; তা কিয়্যের্ তেলানি গুলি যেবঅ।

⁵ মান্‌জ্যে যেধোক্ক্যেন গুরি খেদর্ শোজ্যগানি কাবিনে তুবোন্, ইস্রায়েলীয়গুনোর অবস্থাগান সেধোক্ক্যেন্ অবঅ। রফায়ীমোর কলগত্ মান্‌জ্যে যেধোক্ক্যেন গুরি পড়ি থেইয়্যে শোজ্যগানি তুবোন্ তারার্ অবস্থাগান সেধোক্ক্যেন অবঅ।

⁶ তো কিজু শোজ্য পোজ্যে থেবঅ। যেবাবোত্যেগুরি জলপাই গাজ্‌চুন ঝাড়ানার্ পরেদি উগুরে ডেলাগুনোত্ দ্বিবে তিন্নো জলপাই থান্ আর যে ডেলাবোত্ বেশ্ গুরি গুলোগুলি ধরন সিয়োত্ চের্‌‍‍বো পাচ্চো গুলো থেই যান্, তারার্ অবস্থায়ো সেধোক্ক্যেন অবঅ।” ইস্রায়েলর গোজেন লগেপ্রভু এ কধাগান কোইয়্যে।

⁷ সেদিন্যে মান্‌জ্যে তারার গোজেন ইন্দি রিনি চেবাক্, ইস্রায়েলর সেই পবিত্র মান্‌জ্য ইন্দি চোগ্ ফিরেবাক্।

⁸ তারা নিজো আঢে বানেয়্যে ডালি পূজোবো ইন্দি রিনি ন-চেবাক্, আর তারার আঢে বানেয়্যে আশেরা-খুদি আর আগর্‌বাট্টি-পূজো উগুরে কনঅ মনযোগ্‌অ ন-দিবাক্।

⁹ সেদিন্যে তারার্ দরমর শঅরানি ঝার-জংগল ধোক্ক্যেন অবঅ। যেধোক্ক্যেন গুরিনে ইস্রায়েলীয়গুনোত্তে মান্‌জ্যে তারার্ শঅরানি ফেলেইনে ধেই যেইয়োন তারার্ অবস্থাগান সেধোক্ক্যেন অবঅ। তারার দেজ্‌ছান ভস্তর্ জাগা অবঅ।‍‍

¹⁰ তর্ উদ্ধোরগুরিয়্যে গোজেনরে তুই ভুলি যেইয়োচ্; সেই আশ্রয়-মুড়োবোরে তুই ইদোত্ ন-রাগাচ্। সেনত্তে যুনিয়ো তুই দোল্ দোল্ চারা আর বিদেশত্তুন্ আন্যে আংগুর লুদি লাগর্,

¹¹ আর সেদিন্যে তুই সিগুন দাঙর্ গরর্ আহ্ বেন্যে-বেল্যে সিগুনোত্ বোল্ ধরর্, তো পিড়ে আর অমকদ দুঘো দিনোত্ কাবিবাত্তে সেধোক্ক্যেন কনঅ খেত্-খেত্তি ন-থেবঅ।

¹² হায় হায়, বোউত্ মান্‌জ্যর রঅ শুনো যার্! গুজুরি উঠ্যে সাগর ধোক্ক্যেন জাদ্‌‍‍তুনে গুজুরোদন্। জাদ্‌তুনোর জদবদে রঅ ছাড়ানাগানি শুনো যার্। দর্‌‍‍‍‍গরেপারা বান পানির গুজুরোনি ধোক্ক্যেন তারা রঅ ছাড়দন্।‍

¹³ দর্‌‍‍গরেপারা বান পানি রঅ ধোক্ক্যেন যুনিয়ো মানুচ্চুনে গুজুরোদন্, তো তে ধমক্ দিলে তারা দূরোত্ ধেই যেবাক্। বোইয়্যের মুয়োত্ মুড়ো-মুড়ি উগুরেগান তুজো ধোক্ক্যেন, ঝড় মুয়োত্ ধূল্যে ধোক্ক্যেন তারারে ধাবেই দিয়্যে অবঅ।‍

¹⁴ সাজোন্যে অক্তত্ তারা অমকদ দোরেবাক্ আর বেন্যে পহ্‌‍‍‍র অবার্ আগেদি শেজ্ ওই যেবাক্। আমা লুদেয়্যেগুনোত্তে ইয়েন আঘে; ইয়েনই আমার লুদেয়্যেগুনোর ভাগ্য।