যিশাইয় 15 - Chakma Bible

মোয়াব পৌইদ্যেনে লগেপ্রভুর কধা

¹ মোয়াব পৌইদ্যেনে লগেপ্রভুর কধাগান ইয়েন: মোয়াব ভিদিরে আর্ নাঙে শঅরান্ আর মোয়াব ভিদিরে কীর শঅরান্ এক রেদো ভিদিরে ভস্ত ওই যেইয়্যে।

² মোয়াব মানুচ্চুনে কানিবাত্তে দীবোন মন্দিরোত্ আর পূজোর অজল্ জাগানত্ উদি যেয়োন। তারা নবো আর মেদবাত্তে আবিলেচ্ গত্তন্। তারার বেক্কুনোর্ মাঢাগুন্ মুড়ো ওইয়্যে আর দাড়িগানিয়ো কাবা ওইয়্যে।

³ তারা পধে পধে বস্তা পাদা পিনিনে বেড়াদন্। তারা বেক্কুনে ছাল উগুরে আর শঅর-সংমধ্যে আবিলেচ্ গত্তন্। তারা অমকদ কানাকুদি গত্তন্।

⁴ হিষ্‌বোন আর ইলিয়ালী কানের্; তারার মুয়ো রগুন্ যহস সং শুনো যার্। সেনত্তে মোয়াবর্ সৈন্যগুনেয়ো কানদন্ আর তারার মনানি দরে গির্‌‌‌গিরের্।

⁵ মোয়াবত্তে মঅ মনান কানের্; তা মানুচ্চুনে সোয়র ইন্দি ইগ্লৎ-শলিশীয়া সং ধেই যাদন্। তারা কানদে কানদে লূহীতোর মুড়োমুড়ি পথ্‌তানত্ উদি যাদন্; তারার জাগানি ভস্ত ওইয়্যে বিলিনে তারা আবিলেচ্ গত্তে গত্তে হোরণয়িমর পধেদি যাদন্।

⁶ নিম্রীমর বেক পানিগান বর্‌বাদ দিয়্যে ওইয়্যে আর ঘাস্‌ছানি শুগেই যেইয়্যে; গাজ-গাজ্‌ড়া নেই, য়েল্ বিলিনে আর কিচ্চু বাগি নেই।‌

⁷ সেনত্তে তারার্ তুবেয়্যে ধন-সোম্বোত্তিগানি তারা উইলো গাজর্ গঙারর্ উই কিত্তেন্দি নেযাদন্।

⁸ মোয়াব দুযিগানর্ চেরোকিত্তেদি তারার কানানি রগুন্ শুনো যার্; ইগ্লয়িম আর বের-এলিম সং তারার আবিলেচ্ গরাগান শুনো যার্।

⁹ দীমোনর পানিগান লো-লোই ভরা, তো মুই তা উগুরে আরঅ দুঘ্ আনিম্; মোয়াবর্ ধেই যেইয়্যে মানুচ্চুনো উগুরে, আর যিগুনে দেজত্ বাঁজি থেবাক্ তারা উগুরে মুই সিংহ আনিম।