যিশাইয় 14 - Chakma Bible

¹ লগেপ্রভু যাকোব উগুরে মেয়্যে গুরিবো; তে আরঅ ইস্রায়েলরে বেঈ লবঅ আর তারার্ নিজো দেজত্ বোজেই দিবো। বিদেশিগুনে তারা সমারে মিজেবাক্ আর তারা যাকোব বংশগুনো সমারে এগত্তর্ অবাক্।

² অন্য জাদ্‌তুনে তারারে নিইনে তারার্ নিজো দেজত্ লুমেই দিবাক্। লগেপ্রভুর দেজত্ অন্য জাদ্‌‌তুনে ইস্রায়েলীয়গুনোর চাগর্-চাগরানী অবাক্। যিগুনে তারারে বন্দী গোজ্যন্ ইক্কিনে সিগুনোরে তারা বন্দী গুরিবাক্ আর তারার অত্যেচার্ গুরিয়্যেগুনো উগুরে তারা নেতা অবাক্।

^3-4 ও ইস্রায়েল, লগেপ্রভু যেদিন্যে তরে সুলোনি, হাংগামা আর চিৎনপুজ্যে চাগর্ কাদানাত্তুন্ রেহাই দিবো সেদিন্যে তুই বাবিলো রাজার্ বিরুদ্ধে এবাবোত্যে গুরি ঠাট্টা গুরিনে কবে, একবুচ্চ্যে নেতাবো কিবাবোত্যেগুরি শেজ্ ওইয়্যে! তার দর্‌গরেপারা অত্যেচার আর্ নেই।

⁵ পাজিগুনোর্ লুদিক্কো আর শাজন্‌গুরিয়্যেগুনোর শাজন লুদিক্কো লগেপ্রভু ভাঙি দিবো।

⁶ অত্যেচারীবো অমকদ রাগ্ গুরিনে জাদ্‌তুনোরে নিত্য আঘাত্ গুরিদো, রাগে তে বার্‌বার তারারে অত্যেচার্ গুরিনে দোঙেদ।‌

⁷ ইক্কিনে বেক্ পিত্‌থিমীগানে রেহাই আর শান্তি পেইয়্যে; সেনত্তে তারা হুজিয়ে গান গাদন্।‌

⁸ এমন্ কি, বেরস আর লেবাননর্ এরস গাজ্‌‌ছোয়ো হুজিয়ে বাবিলোর রাজারে কত্তে, ইক্কিনে তরে মাদিত্ ফেলেই দিয়্যে ওইয়্যে বিলিনে কনঅ দার্‌‌‌বো কাবিয়্যে আর আমারে কাবিবাত্তে ন-এজন্।

⁹ তুই মরণ জাগাত্ এচ্চোস্ বিলিনে মরণ জাগার মানুচ্চুনে তঅ লগে দেগা গুরিবাত্তে অমকদ মাঢা ঠিগ্ নেইয়্যে ওইয়োন্। সেনত্তে মরাগুনোর্ আত্মাগান উদের্ যেন তারা তঅ লগে দেগা গুরি পারন্। যিগুনে এ সংসারর্ নেতা এলাক্ তারা বেক্কুনে উঠ্যন্; যিগুনে জাদ্‌তুনো উগুরে রাজা এলাক্ তারা বেক্কুনে তারা সিংহাসনত্তুন্ উঠ্যন্।

¹⁰ তারা বেক্কুনে তরে ডাগিনে কবাক্, তুইয়ো আমা ধোক্ক্যেন বল্ পোজ্যে ওইয়োচ্; তুই আমা ধোক্ক্যেন্ ওইয়োচ্।

¹¹ তর্ বেক্ সয়সাগোজ্যেগানি মরণ জাগাত্ লামেই আনা ওইয়্যে; সে লগে তর্ বেক্ বীণার রঅগুন লামা ওইয়্যে। তঅ তলেদি ছিদি পোজ্যে রোইয়োন্দে পুগ্ আর সিগুনে তরে নাঢি ফেল্যন্।

¹² ও শুকতারা, বেন্যেমাদানর্ পুয়োবো, তুই দঅ স্বর্গত্তুন্ পোজ্যস্। তুই একদিন জাদ্‌তুনোরে ওদেই দুয়োচ্ আর তরে ইক্কিনে পিত্‌‌‌থিমীত ফেলেই দিয়্যে ওইয়্যে।

¹³ তুই মনে মনে কোইয়োচ্চ্যে, মুই স্বর্গত্ উদিম্, গোজেন তারাগুনো উগুরে মঅ সিংহাসনান্ তুলিম্; যিয়েনত্ দেবেদাগুনে এগত্তর্ অন্ উত্তোরেদি সে মুড়োবো উগুরে মুই সিংহাসনত্ বুজিম্।

¹⁴ মুই মেঘ উগুরে উদিম্; মুই দাঙর্ গোজেন সং সং ওম্।

¹⁵ মাত্তর্ তরে মরণ জাগাত্ লামা ওইয়্যে, অয়, সে গাদ্‌তোত্ বেগত্তুন্ তলে জাগানত্ লামা ওইয়্যে। ‌‌

¹⁶ যিগুনে তরে দেগন্ তারা তন্দি চেই থান্। তারা তঅ অবস্থাগান্ দেগিনে কন্, যে পিত্‌‌‌‌থিমীগানরে লাড়েদ আর রেজ্যগানিরে জাগেরেদ ইবে কি সেই মানুচ্চো?

¹⁷ ইবে কি সিবে, যে সংসারানরে ধূল্যেচর ধোক্ক্যেন গুরিদো, শঅরানিরে উল্ল্যেই ফেলেদ, আর বন্দীগুনোরে ঘরত্ ফিরি যেবাত্তে ন-দিদো?

¹⁸ “জাদ্‌তুনোর বেক্ রাজাগুনে সর্মান সমারে যার্ যার্ গোরত্ পু‌‌‌ড়ি আগন্।

¹⁹ মাত্তর্ তরে গাজর্ বাদ দিয়্যে ডেলা ধোক্ক্যেন্ গোর বারেদি ফেলেই দিয়্যে ওইয়্যে। তলোয়ার্‌লোই যিগুনোরে মারে ফেলেইনে গোরর্ বেগত্তুন্ তলে জাগানত্ পাদা ওইয়্যে তারা কিয়্যেগানিলোই তুই নাঢা যেইয়োচ্। তুই টেঙোই মাজ্যে মরাকিয়্যে ধোক্ক্যেন্ ওইয়োচ্।

²⁰ তুই অন্য রাজাগুনো ধোক্ক্যেন্ গোর্ ন-পেবে, কিত্তে তঅ দেজ্‌ছানরে তুই ভস্ত গোজ্যস্ আর তঅ মানুচ্চুনোরে মারে ফেল্যচ্। পাজিগুনোর্ বংশধরুনোর কধা আর কনদিন্অ তুলো ন-অবঅ।

²¹ তারার্ পুরোণি মানুচ্চুনোর্ পাপত্তে তারার্ ঝি-পুয়োগুনোরে মারে ফেলেবাত্তে এক্কান জাগা ঠিগ্ গরঅ। দেজ্‌‌ছান গজক্ গুরিবাত্তে তারা আর্ ন-উদিবাক্; তারা পিত্‌থিমীগানরে আর তারার্ শঅরান্দোই পরিপুরোন্ গুরি ন-পারিবাক‌্।”

²² বেগত্তুন্ খেমতাবলা লগেপ্রভু কোইয়্যেদে, “মুই তারা বিরুদ্ধে উদিম্; বাবিলো নাঙান্ আর তার বাঁজি থেইয়্যে মানুচ্চুনোরে আর তা বংশধরুনোরে মুই এক্কুবারে শেজ্ গুরি দিম্।

²³ মুই তারে কুদুক্-কাদাগর্ জাগায়ান্ আর পানি জাগায়ান্ গুরি দিম্। ভস্ত অনা চোরোন্ দরালোই মুই তারে ছুরি দিম্। মুই বেগত্তুন্ খেমতাবলা লগেপ্রভু এ কধাগান্ কঙর্।”

আসিরিয়ার্ বিরুদ্ধে আগাম্ কধা

²⁴ বেগত্তুন্ খেমতাবলা লগেপ্রভু শমক্ গুরি কোইয়্যেদে, “ঘেচ্চেকগুরি, মুই যেবাবোত্যেগুরি ঠিগ্ গোজ্যং সেবাবোত্যেগুরি ঘুদিবো, আর সিয়েন থির্ থেবঅ।

²⁵ মঅ দেজ্‌‌ছান ভিদিরে মুই আসিরিয়ার্ রাজারে চুর্‌‌মার্ গুরিম আর মঅ মুড়ো-মুড়িগুনো উগুরে তারে টেঙোই উড়িম্। সেক্কে মঅ মানুচ্চুনো ইত্তুন্ তা জুঙোলান্ দূর্ ওই যেবঅ আর তারার্ কানাগানিত্তুন্ তা বুধিবো সুরি যেবঅ।”

²⁶ গোদা দুনিয়েগানত্তে এ সুদোমান্ ঠিগ্ গরা ওইয়্যে আর বেক জাদ্‌তুনো উগুরে এ আঢ্‌‌‌‌তান বাবেই দিয়্যে ওইয়্যে।‌

²⁷ বেগত্তুন্ খেমতাবলা লগেপ্রভু ইয়েনি ঠিগ্ গোজ্যে, সেনত্তে কন্না সিয়েন বিফল গুরি দি পারে? তা আঢ্‌তান বাবেইয়্যে আঘে, কন্না সিয়েন গুজেই রাগে দি পারে?‌‌

পলেষ্টীয়া বিরুদ্ধে আগাম্ কধা

²⁸ যে বজরত্ রাজা আহসে মুরি যেইয়্যে সে বজরত্ যিশাইয় এ আগাম্ কধাগান পেইয়্যে।

²⁹ ও পলেষ্টীয়া, যে লুদিক্কো তরে আঘাত্ গুরিদো সিবে ভাঙি যেইয়্যে বিলি তুমি কনজনে ফুত্তি ন-গোজ্য। সাপ গাদত্তুন্ নিগিলি এবঅ কেউটে সাপ, আর সেই সাপ্পোত্তুন্ নিগিলি এবঅ উড়্‌বো বিষবলা সাপ।

³⁰ বেগত্তুন্ নাঢা মানুচ্চুনে হানা পেবাক্ আর অভাবীগুনে গমেডালে ঘুম্ যেবাক্। মাত্তর্ তঅ শিঙোরানরে মুই ভানা দিইনে ভস্ত গুরিম, সেক্কে তর্ বাঁজি থেইয়্যে মানুচ্চুনে মুরি যেবাক্।

³¹ ও গেদ্‌টো, আবিলেচ্ গর্। ও শঅরান, কান্। ও পলেষ্টীয়া, তর্ বেক্কানি মিলেই যোক্। উত্তোরেত্তুন্ ধূমোর্ মেঘ এজের্, সে সৈন্যদলত্তুন্ এক্কো সৈন্যয়ো পিজেদি ন-যাদন্।‌‌

³² এ জাদর্ দূত্‌তুনোরে কি জোব্ দিয়্যে যেবঅ? তারারে কুয়ো অবঅ, “লগেপ্রভু সিয়োনানরে থিদেবর্ গোজ্যে আর সিয়েন ভিদিরে অত্যেচার্ ওইয়্যে তা মানুচ্চুনে আশ্রয় পেবাক্।”