হোশেয় 9 - Chakma Bible

ইস্রায়েলর সাজা

¹ ও ইস্রায়েল, অন্য জাদ্‌‌‌তুনো ধোক্ক্যেন তুই হুজির্ উৎসব ন-গুরিচ্। তুই দঅ তর্ গোজেনরে ছাড়িনে তা উগুরে অবিশ্বেজি ওইয়োচ্; পত্তি খামারত্ তুই বেশ্যের্ পাওনা পেইনে হুজি ওইয়োচ্।

² ইয়েনর্ পরেদি খামার আর আংগুর মাড়েদে জাগানিয়ে মানুচ্চুনোরে হানা ন-দিবাক্; তারা নূয়ো আংগুর-রস ন-পেবাক্।

³ তারা লগেপ্রভুর দেজত্ ন-থেবাক্; ইফ্রয়িমে মিসরত্ ফিরি যেবঅ আর আসিরিয়ার অসিজি হানা হেবঅ।

⁴ তারা লগেপ্রভুর নাঙে আংগুর-রসচোই পানীয়-উৎসর্ব ন-গুরিবাক্ আর তারার্ য়েমান-উৎসর্বগানিয়ো তারে হুজি ন-গুরিবাক্। সেবাবোত্যে উৎসর্ব তারা ইধু আবিলেচ্‌গুরিয়্যেগুনো হানা ধোক্ক্যেন অবঅ; যিগুনে সিয়েন হেবাক্ তারা বেক্কুনে অসিজি অবাক্। সে হানাগান তারার্ নিজোর পেট্‌পরা মারেবাত্তে অবঅ, সিয়েন লগেপ্রভুর ঘরত্ ন-এবঅ।

⁵ তারার্ পরবর্ দিনোত্ আর লগেপ্রভুর উৎসব-দিনোত্ তারা কি গুরিবাক্?

⁶ যেক্কেনে তারা ভস্ত অইদ্যে আঢত্তুন্ ধেই যেবাক্ সেক্কেনে মিসরে তারারে এগত্তর্ গুরিবো আর মোফ শঅরত্ তারারে গোর্ দিবো। তারার্ তুবেয়্যে রূবো আর তারার্ থেবার ঘরানি হেরপদনা আরি কাদাগাজে ঢাগি ফেলেব।

⁷ ইস্রায়েল যেন হবর্ রাগায়, সাজার্ দিন্নো এই যেইয়্যে, ইজেব-নিকেশর্ দিন্নো এইচ্চ্যে। তারার্ পাপ জনেদি বোউত্ আর তারা গোজেনরে এদক্ ঈচ্ গরনদে যে, তারা ভাববাদীগুনোরে বেদমা আর গোজেনর আত্মায় পেইয়্যে মান্‌জ্যরে পাগল্ মনে গরন্।

⁸ ভাববাদিবো মর্ গোজেন লগে ইফ্রয়িমর চুগিদার অলেয়ো তার্ বেক্ পথ্‌তানিত্ রোইয়্যেদে ফাল্ আর তার গোজেন ঘরত্ রোইয়্যেদে তা বিরুদ্ধে শত্রুতা।

⁹ গিবিয়ার সময়োত্ যেবাবোত্যে এলঅ সেবাবোত্যে ইস্রায়েলীয়গুনে অন্যেয় ইধু ডুবি যেইয়োন। গোজেনে তারার্ পাজির্ কধানি ইদোত্ তুলিবো আর তারার্ পাপত্তে সাজা দিবো।

¹⁰ লগেপ্রভু কত্তে, “ধূল্যেচর-চাগালাত্ আংগুর ফল পাইদ্যে ধোক্ক্যেন গুরি ইস্রায়েলরে মুই তোগেইনে পেইয়োং; পত্তমবার ফল দিয়্যে ডোমোর্ গাজর্ আগাম ফল ধোক্ক্যেন তমা পুরোণি মানুচ্চুনোরে দেখ্যং। মাত্তর্ তারা বাল-পিয়োর ইধু যেইনে সেই লাজ্ গরেপারা মূত্তিবো ইধু নিজোরে দি দুয়োন্ আর তারার্ কোচ্‌‌পেইয়্যে মূত্তি ধোক্ক্যেন তারা জঘন্য ওই পোজ্যন্।

¹¹ ইফ্রয়িমর বাঈনী গোজ্যে পেগো ধোক্ক্যেন উড়ি যেবঅ; সেক্কে পুয়ো-ছার্ জর্ম ন-অবাক্, কনজনে পিদিলী ন-অবাক্ আর কনজনে পুয়ো-ছা পেদত্ ন-ধুরিবাক্।

¹² যুনি বা কনজনে পুয়ো-ছা পালান্ তো সেই পুয়ো-ছাগুনোরে মুই মারে ফেলেম; তারার্ একজনঅ ন-থেবাক্। অভিশাব্ পোড়োক্ তারার্, যেক্কেনে মুই তারাত্তুন্ যেম্বোই।

¹³ ইফ্রয়িমরে মুই সোর ধোক্ক্যেন দোল্ জাগাত্ লাগেয়্যে দেখ্যং। মাত্তর্ ইফ্রয়িমে তা পুয়ো-ছাগুনোরে নিগিলেনে নেযেব তাইদু যে তারারে মারে ফেলেব।”

¹⁴ ও লগেপ্রভু, মুই এ মানুচ্চুনোত্তে কি চেইম্? তুই তারারে কি দিবে? তুই তারার্ পুয়ো-ছা বর্‌বাত ওই যেবার পেট্ আর শুগুনো বুগ্ দে।

¹⁵ লগেপ্রভু কত্তে, “গিল্‌গলে তারা তারার্ পাজিগানি আরাম্ভ গোজ্যন, আর সিদু মুই তারারে ঈচ্ গরা ধুরিলুং। তারার্ পাপত্তে মঅ মানুচ্চুনো ভিদিরেত্তুন্ মুই তারারে ধাবেইনে নিগিলে দিম। মুই তারারে আর কোচ্‌‌ ন-পেইম্; তারার্ নেতাগুন বেক্কুন্ উল্লোমী।

¹⁶ ইফ্রয়িমে ক্ষয় ওই যার্, তা শিঙোরান্ শুগেই যেইয়্যে, সিয়েনত্ ফল ন-ধরন্। যুনি বা তা মানুচ্চুনে পুয়ো-ছার্ জন্ম দুয়োন তো মুই তারার্ কোচ্‌পেইয়্যে পুয়ো-ছাগুনোরে মারে ফেলেম।”

¹⁷ মর্ গোজেনে তারারে এলাফেলা গুরিবো, কিত্যে তারা তার্ বাধ্য ন-অন্; তারা নানান্ জাদ ভিদিরে ঘুরি বেড়েবাক্।