হোশেয় 6 - Chakma Bible

আগাত্যে মনা ইস্রায়েল

¹ আঢঅ, আমি লগেপ্রভু ইধু ফিরি যেই। তেয়ই আমারে কট্টা কট্টা গোজ্যে, তে আমারে গম্অ গুরিবো; তেয়ই আমারে আঘাত্ গোজ্যে, তে আমারে ঘাগানি বানিয়ো দিবো।

² কয়েকদিন পরে তেয়ই আরঅ আমারে বাজেব, আর আমারে আগ অবস্থাত্ ফিরেই আনিবো যেনে আমি তা মুজুঙোত্ বজত্তি গুরি পারিই।

³ আঢঅ, আমি লগেপ্রভুরে স্বীগের্ গুরি নেযেই; তারে হবর্ পেবাত্তে তা পিজেদি যেই। বেলান্ উধেদে ধোক্ক্যেন তে হামাক্কায় ফগদাং অবঅ; ঝড় ধোক্ক্যেন গুরি, বসন্তকালত্ মাদি ভিজেদে ঝড় ধোক্ক্যেন গুরি তে এবঅ।

⁴ লগেপ্রভু কত্তে, ও ইফ্রয়িম, মুই তরে নিইনে কি গুরিম? ও যিহূদা, তরে নিইনে বা মুই কি গুরিম? তর্ বিশ্বেজ্‌‌‌‌চান বেন্যেমাদান কুয়ো ধোক্ক্যেন, সিয়েন বেন্যেমাদান শিরো পানি ধোক্ক্যেন যিয়েন যাদিমাদি শুগেই যায়।

⁵ সেনত্তে মঅ ভাববাদীগুনোরে দিইনে মুই তমারে কট্টা কট্টা গুরি কাপ্যং, মঅ মুয়ো কধালোই তমারে মারে ফেল্যং; মর্ বিচেরর্ রায় তমা উগুরে কারেন ধোক্ক্যেন ঝিমিলেই উঠ্যে।

⁶ মুই বিশ্বেজ্‌চান্ চাং, য়েমান উৎসর্ব নয়; পূজ্যে-উৎসর্বত্তুন্ বেশ্ মুই চাং যেন মানুচ্ ঘেচ্চেকগুরি গোজেনরে চিনোন্।

⁷ তুমি আদম ধোক্ক্যেন মর্ থিদেবর্ গোজ্যে সুদোমান অমান্য গোজ্য; তুমি মঅ উগুরে অবিশ্বেজি ওইয়ো।

⁸ গিলিয়দ অলঅ সেই পাজি মানুচ্চুনোর্ শঅর্ যিয়েনত্ রোইয়্যে তারার্ লো বাস্যে টেঙ চাপ।

⁹ ডাগেত্তুনে যেবাবোত্যে মান্‌‌‌‌‌জ্যরে উৎ পাদিনে বাজ্জেই থান্, সেবাবোত্যেগুরি উৎ পাদিনে থান্ ধর্মগুরুগুনোর দলুন্; তারা শিখিমোত্ যেবার পদথ্ মানুচ্ খুন গরন আর অমকদ অন্যেয় কাম্ গরন।

¹⁰ ইস্রায়েল ভিদিরে মুই এক্কান জঘন্য বেপার দেখ্যং। সিয়েনত্ ইফ্রয়িমে বেভিচের্ গোজ্যে আর ইস্রায়েল অসিজি ওই যেইয়্যে।

¹¹ ও যিহূদা, তত্তেয়ো খেত্-খেত্তি কাবিবার সময় ঠিগ্ গরা ওইয়্যে।