হোশেয় 4 - Chakma Bible

ইস্রায়েল বিরুদ্ধে আবিত্তি

¹ ও ইস্রায়েলীয়গুন, তুমি লগেপ্রভুর কধানি শুনো, কিত্যে যিগুনে দেজত্ বজত্তি গরন্ তারা বিরুদ্ধে লগেপ্রভুর এক্কান আবিত্তি আঘে। সিয়েন অলঅ, দেজত্ বিশ্বেজ্ আর গভীন্ কোচ্‌পানা নেই আর গোজেনরে কনজনে সত্য গুরি ন-জানন্;

² আগে বানা শমক্ ভাঙানা, মিজে কধা কনা, খুন্ গরানা, চুর্ গরানা আর বেভিচের্ গরানা। তারা আইন অমান্য গরন আর লো ঝরানা উগুরে লো ঝরান্।

³ ইয়েনত্তে দেজ্‌চানে আবিলেচ্ গরের আর যিগুনে দেজ ভিদিরে বজত্তি গত্তন্ তারা শেজ্ ওই যাদন আর য়েমান, পেগ্ আর মাছ মুরি যাদন্।

⁴ লগেপ্রভু কত্তে, কনজনে কার বিরুদ্ধে আবিত্তি ন-গোরোক্, কনজনে কাররে দুষি ন-গোরোক্, কিত্যে তুমি সেই মানুচ্চুনো ধোক্ক্যেন ওইয়ো যিগুনে ধর্মগুরুগুনো বিরুদ্ধে আবিত্তি গরন্।

⁵ ধর্মগুরুগুন, তুমি দিনোত্ আর রেদোত্ উজোত্ খর্ আর তমা লগে উজোত্ খাদন্ ভাববাদীগুনে। সেনত্তেই মুই তমা মাবো ইস্রায়েলরে ভস্ত গুরি দিম।

⁶ গোজেন পৌইদ্যেনে জ্ঞানর্ অভাবে মঅ মানুচ্চুন ভস্ত ওই যাদন্। তুমি সেই জ্ঞানানরে এলাফেলা গোজ্য বিলি মুইয়ো মর্ ধর্মগুরু ইজেবে তমারে এলাফেলা গুরিলুং। তুমি তমার্ গোজেনর রীদি-সুদোম্ ভুলি যেইয়ো, সেনত্তে মুইয়ো তমা ঝি-পুয়োগুনোরে ভুলি যেইম্।

⁷ ধর্মগুরুগুন জনেদি যেদক্ বাড়দন্ সেদক্ তারা মঅ বিরুদ্ধে পাপ গত্তন্, সেনত্তে মুই সর্মানর্ বদলে তারারে অসর্মানিত গুরিম।

⁸ মঅ মানুচ্চুনোর পাপর কারনে তারা লাভবান অন্ বিলিনে তারা মঅ মানুচ্চুনোরে পাপ গুরিবাত্তে উচ্চোমি দুয়োন্।

⁹ যেবাবোত্যেগুরি মানুচ্চুনোরে সেবাবোত্যে ধর্মগুরুগুনোরেয়ো সাজা দিয়্যে অবঅ; তারার্ আচার-বেবহারত্তে তারারে বেক্কুনোরে মুই সাজা দিম আর তারার্ কাম মজিম্ ফল দিম।

¹⁰ তারা হেবাক্ মাত্তর্ ঈল্ ন-অবঅ; তারা বেভিচের্ গুরিবাক্ মাত্তর্ জনেদি ন-বাড়িবাক্, কিয়া তারা মূত্তি পূজোর্ কারনে লগেপ্রভুরে ছাড়ি যেইয়োন।

¹¹ বেভিচের্ আর নূয়ো, পুরোণ আংগুর-রসে মঅ মানুচ্চুনোর বুদ্ধিগানি বর্‌বাত গোজ্যন্।‌

¹² তারা গাজ মূত্তিগুনো ইধু সল্লা চান্ আর গাজ লুদিক্কুনে তারারে উগুম দে, কিয়া বেভিচার মনানে তারারে ভান্ন্যেই পধেদি নেযেয়্যে; তারা তারার্ গোজেন ইধু অবিশ্বেজি ওইয়োন্।

¹³ মুড়ো তোগোনোত্ তারা য়েমান উৎসর্ব গরন্ আর মুড়ো উগুরে অলোন, লিব্‌‌‌নী আর এলা গাজর্ তলে যিয়েনত্ ছাবালোই আরাম দে সিয়েনত্ তারা আগর্‌বাট্টি জ্বালান। সেনত্তে তমা মিলেগুন বেশ্যে অন্ আর ফুদো বৌগুনে বেভিচের্ গরন।

¹⁴ তমা মিলেগুন বেশ্যে অলে আর ফুদো বৌগুন্ বেভিচের্ গুরিলে মুই সাজা ন-দিম, কিয়া মরত্তুন্ নিজে বেশ্যেগুনো ইধু যান্ আর মন্দির-বেশ্যেগুনো লগে য়েমান উৎসর্ব গরন। এই বুদ্ধিনেইয়্যে জাদে ভস্ত ওই যেবঅ।

¹⁵ “ও ইস্রায়েল, তুই যুনিয়ো বেভিচের্ গরর্ তো যিহূদা যেন একই দুষে দুষী ন-অয়। তুমি গিল্‌‌‌‌গলত্ ন-যেইয়ো; বৈৎ-আবনে ইধু ন-যেয়ো; ‘জেদা লগেপ্রভুর নাঙে’ শমক্ ন-গোজ্য।

¹⁶ ইস্রায়েলীয়গুন এক বুস্যে গোরু ধোক্ক্যেন্। সেনত্তে মাদত্ ভেড়া ছঅগুনো ধোক্ক্যেন লগেপ্রভু কেধোক্ক্যেন গুরি তারারে চোরেব?

¹⁷ ইফ্রয়িমে মূত্তিগুনো লগে মিজেয়্যেগোই; তারে সিয়েনই গুরিবাত্তে দুয়ো।

¹⁸ যেক্কেনে তারার্ মদ হানা শেজ্‌ ওই যায় সেক্কেনে তারা সিনেলী গরা ধরন্; তারার্ শাজন্‌গুরিয়্যেগুনে লাজ্‌‌গরেপারা আচার-বেবহার খুব গম্ পান।

¹⁹ সাজাগানে বোইয়্যের ধোক্ক্যেন গুরি যেন তারারে উরেই নেযেব; তারার্ উৎসর্বর অনুষ্ঠানানিত্তে তারা লাজ্ পেবাক্।”