হোশেয় 13 - Chakma Bible

ইস্রায়েলর বিরুদ্ধে লগেপ্রভুর রাগ্

¹ ইফ্রয়িমে কধা কলে মান্‌‌‌‌জ্যে গির্‌‌‌‌গিরান; ইস্রায়েল গুট্টিগুনো ভিদিরে তে দাঙর্ ওইয়্যে। মাত্তর্ বাল দেবেদা পূজো গুরিবার দুষে দুষি ওইনে তে মোজ্যে।

² ইক্কিনে তা মানুচ্চুনে আরঅ বেশ্ গুরি পাপ গোজ্যন্; তারার্ রূবোগানিলোই তারা নিজোত্তে কাবিল আঢ্‌‌তোই বানেয়্যে মূত্তি, অত্তাৎ কাবিল্ আত্‌‌‌‌তোই মূত্তি বানেয়্যন; সিগুন বেক্কুন্ কালিগর কাম। এ মূত্তিগুনো পৌইদ্যেনে তারা কন্, “যিগুনে উৎসর্ব গরন্ তারা গোরু ছঅ-মূত্তিগুনোরে চুমোদোক্।”

³ সেনত্তে তারা অবাক্ বেন্যেমাদান কুয়ো ধোক্ক্যেন, অবাক্ অদাদৎ উরি যেইয়্যে বেন্যেমাদান শিরো পানি ধোক্ক্যেন, অবাক্ খামারত্তুন্ বোইয়্যেরে উড়ি যেইয়্যে তুজো ধোক্ক্যেন্, অবাক্ জানালাদি নিগিলি যেইয়্যে ধূমো ধোক্ক্যেন্।

⁴ লগেপ্রভু কত্তে, মিসরত্তুন্ তরে নিগিলেই আনিবার সময়ত্তুন্ ধুরি মুয়ই তর্ গোজেন লগেপ্রভু। মুই বাদে তর্ আর কনঅ গোজেন নেই; মুই বাদে তর্ আর কনঅ উদ্ধোর্ গুরিয়্যে নেই।

⁵ ধূল্যেচর-চাগালাত্, অমকদ শুগুনো দেজত্ মুয়ই তরে দেগাশুনো গোজ্যং।

⁶ মুই তঅ মানুচ্চুনোরে হাবানার্ পরেদি তারার্ ঈল্ অলঅ; ঈল্ ওইনে তারা বাড়্‌‌‌‌‌বো অলাক্, আর সে পরেদি তারা মরে ভুলি গেলাক্।

⁷ সেনত্তে মুই সিংহ ধোক্ক্যেন তারা উগুরে এইম্, হোক্ক্যে বাঘ ধোক্ক্যেন্ পধ পারত্ উৎ পাদি থেবাক্।

⁸ ছঅ চুর্ ওই যেইয়্যে ভাল্লুগো ধোক্ক্যেন মুই তারারে আক্রমণ গুরিনে তারা বুগ্‌‌‌‌‌কুন ছিনি ফেলেম। সিংহ ধোক্ক্যেন মুই তারারে গিলি ফেলেম; ঝার্‌‌‌‌‌বো য়েমান ধোক্ক্যেন মুই তারারে কট্টা কট্টা গুরি ছিনি ফেলেম।

⁹ ও ইস্রায়েল, তুই মর্ বিপক্ষে, অত্তাৎ তর্ সাহায্যগুরিয়্যের্ বিপক্ষে আগচ্ বিলি মুই তরে ভস্ত গুরিম।

¹⁰ তঅ রাজাবো কুদু যে তর্ বেক শঅরানিত্ তরে রোক্ষ্যে গুরি পারিবো? তর্ শাজন্‌গুরিয়্যেগুন কুদু যিগুনো পৌইদ্যেনে তুই কদে, মরে রাজা আর শাজন্‌গুরিয়্যেগুনোরে দে?

¹¹ সেনত্তে মুই অমকদ বেজার্ ওইনে তরে এক্কো রাজা দুয়োং আর মর্ রাগে তারে নেযেয়োংঅ।

¹² ইফ্রয়িমর দুষ, অত্তাৎ তার্ বেক্ পাপ্‌‌‌‌‌‌পানি লিগিনে বানি রাগা ওইয়্যে।

¹³ মিলেগুনোর্ পুয়ো-পুদোইদ্যে শূলোনী ধোক্ক্যেন্ তারে ধোজ্যে, মাত্তর্ তে দঅ বুদ্ধিনেইয়্যে গুরো; সময় এলে তে পেদ মুয়োত্ ন-এজে।

¹⁴ “মরণ জাগানর্ খেমতাত্তুন্ মুই মূল্য দিইনে তারে ছাড়েই আনিম। মরণত্তুন্ মুই তারে উদ্ধোর্ গুরিম। ও মরণান্, মর্ ভানাগানি বেক্কানি কুত্তুন্? ও মরণ জাগায়ান, কুদু তর্ ভস্ত? মুই কনঅ মেয়্যে ন-গুরিম। ‌ ‌

¹⁵ যুনিয়ো বা ইফ্রয়িমে তা ভেইয়ুনো ভিদিরে ফলায় তো লগেপ্রভুত্তুন্ এক্কান পূগো বোইয়্যের ধূল্যেচর-চাগালাত্তুন্ বেঈ এবঅ; তার্ পয়নালাবোত্ পানি ন-থেবঅ আর তার্ কুয়োবো শুগেই যেবঅ। তার্ ভান্ডালর্ বেক মংগা জিনিসচানি লুদো অবঅ।

¹⁶ শমরিয়ার মানুচ্চুনে তারার্ গোজেন বিরুদ্ধে উল্লোমী গোজ্যন বিলি দায়ী অবাক্। তারা যুদ্ধোত্ মুরি যেবাক্; তারার্ পুয়ো-ঝিগুনোরে মাদিত্ আছাড় মারিনে নিগুজ্ গরা অবঅ আর তারার্ পিদিলী মিলেগুনোর্ পেটতুন্ ফাদি ফেলা অবঅ।”