হোশেয় 1 - Chakma Bible

¹ যিহূদার রাজা উষিয়, যোথম, আহস আর হিষ্কিয়র রাজাগিরির্ সময়োত্ আর ইস্রায়েলর রাজা যোয়াশর পুয়ো যারবিয়ামর সময়োত্ বেরির পুয়ো হোশেয় ইধু লগেপ্রভুর কধানি ফগদাং অলঅ।

হোশেয় মোক্কো আর ঝি-পুয়োগুন্

² হোশেয়র্ মাধ্যমে পত্তমবার্ কধা কবার সময়োত্ লগেপ্রভু তারে কলঅ, “তুই যেইনে এক্কো বেশ্যে মিলেরে লঅ। তার বেশ্যেমি গরানার পুয়ো-ছাগুনোরেয়ো মানি লবে, কিত্যে এ দেজ্‌‌চান লগেপ্রভুত্তুন্ সুরি যেইনে বেগত্তুন্ জঘন্য বেশ্যের্ দুষে দুষী ওইয়্যে।”

³ সেনত্তে হোশেয় দিব্‌লায়িমর ঝি গোমররে ললঅ আর গোমরে পিদিলী ওইনে হোশেয়ত্তে এক্কো পুয়োর্ জর্ম দিলো।

⁴ সেক্কে লগেপ্রভু হোশেয়রে কলঅ, “তুই তা নাঙান্ যিষ্রিয়েল রাগা, কিত্যে যিষ্রিয়েল শঅরত্ বোউত মান্‌জ্যরে যেহূ মারে ফেলেয়্যে বিলি মুই তা বংশবোরে যাদিমাদি সাজা দিম আর ইস্রায়েল রেজ্যগানরে শেজ্ গুরি দিম।‌‌

⁵ সেদিন্যে মুই যিষ্রিয়েলর কলগত্ ইস্রায়েলর ধনুগান ভাঙি ফেলেম।”

⁶ পরেদি গোমরে আরঅ পিদিলী অলঅ সেক্কে তার এক্কো ঝি অলঅ। সেক্কে লগেপ্রভু হোশেয়রে কলঅ, “তুই ঝিবোর্ নাঙান্ লো-রুহামা রাগা (যিয়্যেনর ভেদ্‌তান্ ‘দোয়্যে ন-পেইয়্যে’), কিত্যে ইস্রায়েল মানুচ্চুনোরে আর মুই দোয়্যে ন-গুরিম, কনঅ বাবদে তারারে খেমা ন-গুরিম।

⁷ মাত্তর্ যিহূদার মানুচ্চুনোরে দোয়্যে গুরিম আর তারারে উদ্ধোর্ গুরিম। সেই উদ্ধোর ধনুগান, লাম্বা ছুরিগান্ বা যুদ্ধো বা ঘোড়াবলা দিইনে ন-অবঅ, বরং মুই তারার্ গোজেন লগেপ্রভু তারারে উদ্ধোর্ গুরিম।”

⁸ লো-রুহামারে দুধ হানাগান্ ছাড়ি দিবার পরেদি গোমরর আর এক্কো পুয়ো অলঅ।

⁹ সেক্কে লগেপ্রভু কলঅ, তুই তা নাঙান্ লো-অম্মি রাগা (যিয়েনর্ ভেদ্‌তান্ মঅ মানুচ্ নয়), কিয়া তুমি মঅ মানুচ্ নয় আর মুইয়ো তমার গোজেন নয়।

¹⁰ তো ইস্রায়েলীয়গুন সাগর-পার ধূল্যেচর ধোক্ক্যেন অবাক্, যিয়েনি মাবা ন-যায়, গোণায়ো ন-যায়। যে জাগানত্ তারারে কুয়ো ওইয়্যে, তুমি মঅ মানুচ্ নয়, সিয়েনত্ তারারে কুয়ো অবঅ, জেদা গোজেনর পুয়ো-ছা।

¹¹ যিহূদা আর ইস্রায়েল মানুচ্চুনে আরঅ মিজেবাক্ আহ্ তারা উগুরে এক্কো নেতারে নেযেবাক্। তা আগেদি যে দেজত্ তারা বন্দী এলাক্ সিয়েনত্তুন্ তারা এবাক্, কিত্যে যিষ্রিয়েলর সেই দিন্নো অবঅ মহৎ।