ইব্রীয় 9 - Chakma Bible

জগদর্ উবোসনা-তাম্বুলান্

¹ গোজেনর্ সেবা আর উবোসনাত্যে পত্তম বেবস্থাগানত্ কদক্কানি সুদোম দিয়্যে ওইয়্যে আর এ জগদত্ উবোসনাত্যে বিশেষ এক্কান জাগার্ কধায়ো সিয়েনত্ এলঅ।

² আর সেই মজিম এক্কান তাম্বুল্ বানা ওইয়্যে। সেই তাম্বুলানর্ পত্তম ভাগত্ থেদঅ চেরাগ টগ্, টেবিল আর মুজুঙো-রুটি। এই পত্তম ভাক্কানর্ নাঙান্ এলঅ পবিত্র জাগা।

³ দ্বি-লম্বর্ পর্দাগানর্ পিজেদি তাম্বুলানর্ আর এক্কান ভাগ্ এলঅ; সিয়েন নাঙান এলঅ দাঙর্ পবিত্র জাগা।

⁴ এ ভাগ্‌কানত্ আগর্‌বাট্টি জ্বালেবাত্যে সনার্ ডালিপূজো আর সাক্ষ্য সুন্দুক এলঅ। সিবের্ চেরোকিত্যেদি সনালোই বেড়েয়্যে এলঅ। সিবে ভিদিরে এলঅ সনার্ পিলেত্ থোইয়্যে মান্না, হারোণর যে লুদিক্কোত্ ফুল ফুট্যে সেই লুদিক্কো, আর বেবস্থা-লেগা দ্বিয়েন পাত্তর আরুগ্।

⁵ সেই সিন্দুক্কো উগুরে গোজেনর্ মহিমালোই ভোজ্যে দ্বিবে সনার্ করূব এলঅ। তারার্ ডুয়োগানি সেই সিন্দুগোর ঢাগনি উগুরে মেল্যে এলঅ। এই ঢাগনিগান উগুরে পাপ ঢাগি দিয়্যে অদঅ। খালিক্ ইয়েনির্ টুগিটাগির্ কধা কনা ইক্কিনে সম্ভব নয়।

⁶ এবাবোত্যে গুরি বেক্কানি যুক্কোল্ অনার পরেদি ধর্মগুরুগুনে প্রায়ই তাম্বুলানর্ পত্তম ভাক্কানত্ সুমিনে গোজেনর্ সেবা গুরিদাক্;

⁷ মাত্তর্ দ্বিলম্বর ভাক্কানত্, অত্তাৎ দাঙর্ পবিত্র জাগানত্ বানা দাঙর্ ধর্মগুরুবো সুমিদো। বজরে বানা একবার তে উৎসর্ব-গোজ্জ্যে য়েমান লো-লোই সিয়েনত্ সুমিদো। তার্ নিজো পাপত্যে আর মানুচ্চুনে কোই ন-পারিনে যেদক্কানি পাপ গোজ্জ্যন সিয়েনত্যে তে এই লো-গান উৎসর্ব গুরিদো।

⁸ ইয়েনত্ পবিত্র আত্মাগানে দেগেই দেত্তে যে, যেদক দিন এই উবোসনা তাম্বুলান থেবঅ সেদক দিন সেই দাঙর্ পবিত্র জাগানত্ সুমিবার পথ্‌তান খুলো ন-থেবঅ।

⁹ বত্তমান কালত্যে ইয়েন এক্কান চিহ্নো যিয়েনে আমারে কোই দেত্তে যে, উৎসর্ব-গোজ্জ্যে য়েমান আর অন্য জিনিজে উবোসনা গুরিয়্যেবোর্ বিবেগরে সাব্ গুরি ন-পারে।

¹⁰ সিয়েনি বানা কিয়্যের্ বেপার, অত্তাৎ বানা হানা-দানা আর ধর্মর্ সুদোম মজিম সিজি অনার্ বেপার। বানা বেক্কানি সুধরেবার্ সময় সং সিয়েনি কামত্ লাক্ক্যে।

খ্রীষ্টর্ লো-গান

¹¹ মাত্তর্ খ্রীষ্ট এচ্চ্যেদে ভবিচ্চদর্ বেক্‌ ভালেদি পৌইদ্যেনে দাঙর্ ধর্মগুরু ওইনে। মহৎ আরঅ গম্ উবোসনা-তাম্বুলোত্ গোজেনর্ সেবা গুরিবাত্যে তে এচ্চ্যে। এই তাম্বুলান মান্‌জ্যর আঢ্‌তোই বানেয়্যে নয়, অত্তাৎ সিয়েন জগদর্ কনঅ জিনিচ্‌ নয়।

¹² ছাগল আর গোরু ছঅ লো-লোই খ্রীষ্ট সেই দাঙর্ পবিত্র জাগানত্ ন-সমায়। তে নিজোর্ লো-লোগান্দোই একবার সিয়েনত্ সোম্মেগোই। এবাবোত্যে গুরি তে উমরত্যে পাপত্তুন্ উদ্ধোরর্ পথ্‌তান্ গুরিলো।

¹³ যিগুনে অসিজি অদাক্ সিগুনো উগুরে ছাগল আর বলদর্ লো বা গোরুছ-পুজ্জ্যে ছেই ছিদেনা অদঅ; সিয়েন্দোই তারার্ বারেদি কিয়্যেগান বানা সিজি ওইনে সাব্ অদঅ।

¹⁴ মাত্তর্ যে উমর্‌অ পবিত্র আত্মালোই গোজেন ইধু নিজোরে থুদো নেইয়্যে উৎসর্ব ইজেবে দান গুরিলো সেই যীশুর লো-গানে আমা বিবেগরে ফল-নেইয়্যে কামত্তুন্ আরঅ কত্তমান বেশ্ গুরি সিজি গুরিবো, যেনে আমি জেদা গোজেনর্ সেবা গুরি পারিই!

¹⁵ গোজেনে যিগুনোরে ডাগিনে উমরত্যে অধিকার দিবার্ এগেম্ গোজ্জ্যে তারা যেন সিয়েন পান্ সেনত্যে খ্রীষ্ট এক্কান নূয়ো বেবস্থাগানর্ উগিল্ ওইয়্যে। এই অধিকারান পানা মান্‌জ্যত্যে সম্ভব ওইয়্যে, কিয়া পত্তম বেবস্থা অদেঅদে থেবার সময়োত্ মান্‌জ্যে যেদক্কানি পাপ গোজ্জ্যন সেই বেক্ পাপর্ আঢত্তুন্ মান্‌জ্যরে উদ্ধোর্ গুরিবার দাম ইজেবে খ্রীষ্ট পরাণান্ দিয়্যে।

¹⁶ দান কবলা কামত্ লাগেবার অলে দান কবলাগান্ যে গোজ্জ্যে সিয়েনর্ মরণর্ প্রমাণর্ দরকার,

¹⁷ কিয়া মানুচ্ মুরিলে পরেদি দান কবলাগান্ কামত্ লাগা যায়। যে দান কবলাগান্ গোজ্জ্যে তে বাঁজি থাগদে সেই দান কবলাগান্ কামত্ লাগা ন-যায়।

¹⁸ ঠিগ্ সেবাবোত্যে গুরি পত্তম বেবস্থাগান্অ লো ছাড়া কামত্ লাগা ন-অয়।

¹⁹ বেক্‌ মানুচ্চুনো ইধু রীদি-সুদোমর্ পত্তি উগুম ফগদাং গরানার্ পর্ মোশি গোরু ছঅ আর ছাগলর্ লো ললঅ আর সিয়েন সমারে পানি মিজেইনে রাঙা রঙে রাঙেইয়্যে ভেড়ার কেশ্ আর এসোব গাজর্ ডেলালোই সিয়েন রীদি-সুদোমর্ বোইয়ো উগুরে আর মানুচ্চুনো উগুরে ছিদি দিলো।

²⁰ সিয়েন গুরিবার অক্তত্ তে কোইয়্যেদে, “ইয়েন সেই বেবস্থার লো, যে বেবস্থাগান মজিম কাম গত্তে গোজেনে তমারে বর্ দিয়্যে।”

²¹ উবোসনা-তাম্বুলান আর উবোসনা কামত্ বেবহার গুরিবার বেক্‌ জিনিজো উগুরেয়ো মোশি সেই এক্কুই গুরি লো ছিদি দিয়্যে।

²² মোশির্ রীদি-সুদোম মজিম প্রায় পত্তি জিনিচ্ লো-লোই সিজি গরা অয় আর লো ন-ঝুরিলে পাপর্ ক্ষেমা ন-অয়।

²³ যিয়েন স্বর্গীয় জিনিজোর্ বানা নকল সিয়েনি য়েমান উৎসর্বলোই সিজি গরানা দরকার এলঅ মাত্তর্ যিয়েনি আজলে স্বর্গীয় জিনিচ্‌ সিয়েনি সিজি গুরিবাত্যে আরঅ দাঙর্ উৎসর্বর দরকার।

²⁴ আজল পবিত্র জাগানর নকল ইজেবে মান্‌জ্য আঢে বানেয়্যে কনঅ পবিত্র জাগানত্ খ্রীষ্ট ন-সমায়, বরং সিয়েনর্ বদলে তে স্বর্গত্ সোমেয়্যে যেনে তে আমার্ ওইনে গোজেন মুজুঙোত্ ইক্কিনে আঝিল্ ওই পারে।

²⁵ দাঙর্ ধর্মগুরুবো য়েমান লো-লোই যেবাবোত্যে গুরি পত্তি বজর্ দাঙর্ পবিত্র জাগানত্ সমায়, খ্রীষ্ট নিজোরে বারবার্ উৎসর্ব গুরিবাত্যে সেবাবোত্যে গুরি স্বর্গত্ ন-সমায়।

²⁶ সিয়েনই যুনি গরা পত্ত সালে পিত্‌থিমী সৃট্টির লক্কেত্তুন ধুরি আরাম্ভ গুরি তাত্তুন্ ভালোক্‌বার্ দুঘ্ পেইনে মরা পত্ত; মাত্তর্ ইক্কিনে বেক্‌ যুগ্‌কুনোর পরেদি তে এক বারই ফগদাং পেয়্যে যেনে নিজোরে উৎসর্ব গুরি তে পাপ ধাবেই পারে।

²⁷ গোজেনে ঠিগ্ গুরি থোইয়্যেদে যে, পত্তি মানুচ্‌ একবার্ মুরিবো আর সে পরেদি তার্ বিচের্ অবঅ।

²⁸ ঠিগ্ সেবাবোত্যেগুরি ভালোক্কুন মান্‌জ্যর পাপর্ বুধি ভুগিবাত্যে খ্রীষ্টরেয়ো একবার উৎসর্ব গরা ওইয়্যে। তে দ্বিপল্লা এবঅ, মাত্তর্ সেক্কে পাপর্ কারনে মুরিবাত্যে ন-এবঅ, বরং যিগুনে তাত্যে আওজ্ গুরিনে বাজ্জেই আঘন তারারে পুরোপুরি গুরিনে উদ্ধোর্ গুরিবাত্যে এবঅ।