ইব্রীয় 8 - Chakma Bible

যীশুই নুয়ো সুদোমর্ দাঙর্ ধর্মগুরু

¹ আমি যিয়েন কোর্ সিয়েনর আজল্ কধাগান অলঅ ইয়েন, আমার এমন্‌ এক্কো দাঙর্ ধর্মগুরু আঘে যিবে স্বর্গত্ দাঙর্ গোজেন সিংহাসনর্ ডেন্ ধাগেদি বৈচ্চ্যে।

² তে দাঙর্ পবিত্র জাগানত্, অত্তাৎ আজল্ উবোসনা-তাম্বুলোত্ গোজেনর্ সেবা গরের্। সেই উবোসনা-তাম্বুলান্ মান্‌জ্যে ন-টাঙান্, সিয়েন প্রভুই টাঙেয়্যে।

³ পত্তি দাঙর্ ধর্মগুরু এ্যামান-উৎসর্ব আর অন্য জিনিচ্‌ উৎসর্ব গুরিবাত্যে নেযা অয়, সেনত্যে এই দাঙর্ ধর্মগুরুগুনোর্‌অ কনঅ কিজু উৎসর্ব গুরিবার দরকার্।

⁴ মাত্তর্ তে যুনি ইক্কিনে এ জগদত্ থেদঅ সালে ধর্মগুরু ওই ন-পারিদো, কিয়া ইধু রীদি-সুদোম মজিম উৎসর্ব গুরিবাত্যে ধর্মগুরু দঅ আঘে।

⁵ ধর্মগুরু ইজেবে তারার্ এ কামান্ স্বর্গ কামর বানা এক্কান আরুক্ আর ছাবা ধোক্ক্যেন। সেনত্যে মোশি যেক্কে সেই উবোসনা-তাম্বুলান বানেবাত্যে যার্ সেক্কে গোজেনে ইয়েন কোইনে মোশিরে উজিয়ার্ গোজ্জ্যে, “সিনাই মূড়োবো উগুরে তরে যে নমুনাগান দেগা অলঅ ঠিগ্ সেবাবোত্যেগুরি যেন বেক্কানি বানা অয় সিয়েন চেইজ্।”

⁶ মাত্তর্ ইক্কিনে আমি দেগির্, যীশু যে ধর্মগুরুর্ কামান পেয়্যে সিয়েন সেই ধর্মগুরুগুনোর্ কামত্তুন্‌অ বোউত্ উগুরে, যেধোক্ক্যেন গুরি যে সুদোমানর্ সংমধ্যে তে ওইয়্যে সেই সুদোমান আগ বেবস্থাত্তুন্অ বোউত উগুরে; কিয়া এ সুদোমান আরঅ গম্ গম্ এগেম উগুরে নির্ভর গরের্।

⁷ পত্তম বেবস্থাগান যুনি থুদো নেইয়্যে অদঅ সালে দঅ দ্বি-লম্বর বেবস্থাগানর্ কনঅ দরকার ন-অদঅ।

⁸ মাত্তর্ গোজেনে তা মানুচ্চুনোরে দুষ্ দেগেবাত্যে পবিত্র বোইবোত্ কোইয়্যেদে: প্রভু কত্তে, “সময় এজের্ যেক্কে মুই ইস্রায়েল আর যিহূদা মানুচ্চুনোত্যে এক্কান নূয়ো বেবস্থা থিদেবর্ গুরিম।

⁹ মিসর দেজত্তুন্ মুই তারার্ পূরোণি মানুচ্চুনোরে আঢত্ ধুরি নিগিলেই আনিবার অক্তত্ তারাত্যে যে বেবস্থাগান থিদেবর্ গোজ্জ্যং এ নূয়ো বেবস্থাগান সেই বেবস্থাগান ধোক্ক্যেন ন-অবঅ। তারা মর্ সেই সুদোম মজিম ন-চলন্ বিলি মুই তারা ইন্দি মনযোগ ন-দুয়োং।” প্রভু এই কধাগান কয়।

¹⁰ প্রভু আরঅ কয়, “যেরেদি মুই ইস্রায়েলীয়গুনোত্যে যে বেবস্থাগান থিদেবর্ গুরিম। সিয়েন অলঅ, মর্ আইন-কানুনানি মুই তারার্ মন ভিদিরে থোম্ আর তারার্ রিবেঙত্অ সিয়েনি লিগি রাগেম। মুই তারার্ গোজেন ওম্, আর তারা মঅ মানুচ্‌ অবাক্।

¹¹ নিজোর্ পাড়াল্ল্যেগুনোরে আর নিজোর্ ভেইয়োরে কেঅ ইয়েন কোইনে আর কনদিন্অ শিক্ষ্যে ন-দিবাক্, ‘প্রভুরে চিনিবাত্যে শিগো,’ কিত্যে বেক্কুনে মরে চিনিবাক্।

¹² সেনত্যে মুই তারার্ অন্যেয়ানি ক্ষেমা গুরিম, তারার্ পাপ্‌‌পানি আর কনদিনঅ মনত্ ন-রাগেম।”

¹³ গোজেনে এই বেবস্থাগানরে নূয়ো ফগদাং গুরিনে আগ বেবস্থাগানরে পূরোণ বিলিনে অচল্ গুরি দিলো। যিয়েন পূরোণ আর ভালোক্ দিনোর বিলিনে বর্‌‌বাত্ ওই যার্ সিয়েন যাদিমাদি লুগি যেবঅ।