ইব্রীয় 4 - Chakma Bible

গোজেনর্ মানুচ্চুনোত্যে জিরেন্

¹ গোজেনর দিয়্যে জিরেবার জাগানত্ যেবার যে এগেমান্ এলঅ সেই এগেমান্ আমাত্যেয়ো খাদে। সেনত্যে আমার উজিয়ার উয়ো পরিবো, যেন কেঅ সেই এগেম্ গোজ্জ্যে বর্ পানার্ যোগ্য নয় বিলি দেগা ন-যায়।

² ইস্রায়েলীগুনো ইধু যেধোক্ক্যেন গম হবর্ ফগদাং গরা ওইয়্যে সেধোক্ক্যেন গুরি আমা ইধুয়ো গরা ওইয়্যে। মাত্তর্ সেই গম হবরত্ ইস্রায়েলীগুনোর্ কনঅ লাভ ন অয়, কিয়া তারা সিয়েনি শুনিনে বিশ্বেজ্ ন-গরন।

³ মাত্তর্ আমি বিশ্বেজ্ গোজ্জ্যেই আর তার সেই এগেম্ গোজ্জ্যে জিরেবার্ জাগানত্ এচ্চ্যেই। এই জিরেনাগান পৌইদ্যেনে গোজেনে কোইয়্যেদে, “সেনত্যে মুই রাগে শমক্ হেইনে কোইয়োঙে, ‘মর্ দিয়্যে জিরেবার জাগানত্ তারা যেই ন-পারিবাক্।’ ” মাত্তর্ ইয়েনত্ কনঅ ভুল নেই যে, জগৎতান্ সৃট্টির পরেদি গোজেনর্ কামানি থুম্ ওইনে জিরেনা থুম্ ওইয়্যে।

⁴ পবিত্র বোইবোর এক জাগাত্ সাত দিনো পৌইদ্যেনে কুয়ো ওইয়্যে, “গোজেনে সাত দিনোত্ জিরেল কনঅ সৃট্টির কাম ন-গুরিলো।”

⁵ তে আরঅ কোইয়্যেদে, “মর্ দিয়্যে জিরেবার জাগানত্ তারা যেই ন-পারিবাক্।”

⁶ ইক্কিনে এ কধাগান ঠিগ্ যে, কিজু মান্‌জ্যে তার দিয়্যে জিরেবার জাগানত্ যেই পারিবাক; মাত্তর্ যে ইস্রায়েলীগুনো ইধু আগে গম হবর্ ফগদাং গরা ওইয়্যে তারার্ অবাধ্যতার্ কারনে তারা গোজেনর্ দিয়্যে জিরেবার জাগানত্ যেই ন-পারন্।

⁷ ইয়েনত্যে গোজেনে যেবাবোত্যে গুরি ইস্রায়েলীয়গুনো ইধু কোইয়্যে ঠিগ সেবাবোত্যেগুরি ভালোক দিন পরেদি রাজা দায়ুদোরে দিইনে আরঅ কোইয়্যেদে, আহা, এচ্চ্যে যুনি তুমি তা কধানি শুনো! তে কোইয়্যেদে, “তমা মনানি তুমি আগাত্যে ন-গোজ্জ্য।” এই কধাগান কোইনে তার্ দিয়্যে জিরেবার জাগানত্ যেবাত্যে গোজেনে আর এক্কান সময় ঠিগ গোজ্জ্যে আর তে সিয়েনর্ নাঙান্ দিয়্যেদে এচ্চ্যে।

⁸ যুনি যিহোশূয় ইস্রায়েলীয়গুনোরে সেই জিরেবার জাগানত্ নেযেদ সালে গোজেনে পরেদি আর এক্কান সময়োর্ কধা ন-কদঅ।

⁹ সালে দেগা যায়, গোজেন মানুচ্চুনোত্যে জিরেবার জু আঘে,

¹⁰ কিয়া গোজেনে যেধোক্ক্যেন গুরি তার্ সৃট্টির কামানি থুম্ গুরিনে জিরেয়্যে ঠিগ্ সেধোক্ক্যেন গুরি যে মানুচ্চো গোজেনর দিয়্যে জিরেবার জাগানত্ যায়, তেয়ো তা কামত্তুন্ জিরেন পায়।

¹¹ ইয়েনত্যে এজঅ, আমি সেই জিরেন্ পেবাত্যে গমেডালে আয়োজি ওই। কেঅ যেন সেই অবাধ্য ইস্রায়েলীগুনো ধোক্ক্যেন গোজেনরে অমান্য গুরিনে তার্ দিয়্যে জিরেনত্তুন্ বাদ ন-পড়ন্।

¹² গোজেনর্ কধানি খেমতাবলা আর কামগরে আর দ্বি' কিত্ত্যেদি ধার্ আঘে এমন্‌ ছুরিত্তুন্-অ বেশ্ ধারেয়্যে। এ কধানি মান্‌জ্যর রিবেঙ-আত্মা আর আহ্‌র্-মগজ মূঢ়োত্ সং যায় আর মান্‌জ্যর রিবেঙর্ বেক্‌ আওজ্‌‌চানি আর চিদে চজ্জানি পোরোক্ষ্যে গুরি চায়।

¹³ সৃট্টির কিচ্চু গোজেন ইধু লুগেইয়্যে নেই। যিবে ইধু আমার ইজেব দিয়্যে পরিবো তা চোগো মুজুঙোত্ বেক্কানি মেল্যে আর ফগদাং পেইয়্যে।

যীশুই আজল্ ধর্মগুরু

¹⁴ সেনত্যে এজঅ, আমি খুলোমেলা গুরি গোজেনর্ পুয়ো যীশু খ্রীষ্ট উগুরে আমা বিশ্বেজ্‌‌চান স্বীগের্ গুরি যেই, কিয়া তেয়ই আমার দাঙর্ ধর্মগুরু যিবে স্বর্গত যেইনে ইক্কিনে গোজেন মুজুঙোত্ আঘে।

¹⁵ আমা দাঙর্ ধর্মগুরুবো এমন্‌ কেঅ নয় যিবে আমা বল্‌পোজ্যেগানিত্যে আমা সমারে পিড়ে ন-পায়, কিয়া আমা ধোক্ক্যেন গুরি তেয়ো বেক্কানিত্তুন্ পাপ পোরোক্ষ্যে মুজুঙোত্ থিয়্যেইয়্যে অদচ পাপ ন-গরে।

¹⁶ সেনত্যে এজঅ, আমি সাহচ্‌ গুরিনে গোজেনর্ দোয়্যের্ সিংহাসন মুজুঙোত্ উজেই যেই, যেন দরকার মজিম সিয়েনত্তুন্ আমি তার্ মেয়্যে আর দোয়্যে পেই পারিই।