ইব্রীয় 3 - Chakma Bible

যীশু মোশিত্তুন্অ বেশ্ দাঙর্

¹ সেনত্যে পবিত্র ভেইয়ুন, তুমি যিগুনে স্বর্গর্ অধিকারী অবাত্যে তা ডাগনিলোই মাত্য, তুমি যীশু পৌইদ্যেনে মনযোগী অ। যিবে উগুরে আমি বিশ্বেজ্ গোজ্জ্যেই তেয়ই গোজেনর্ সেই পাধ্য়্যে মানুচ্ আর সেই দাঙর্ ধর্মগুরুবো।

² গোজেন ঘোর্‌বোগুনোরে দেগাশুনো কামত্ মোশি যেধোক্ক্যেন বিশ্বেজি এলঅ সেধোক্ক্যেন যীশুরে যিবে বেঈ লোইয়্যে সেই গোজেন ইধু তেয়ো বিশ্বেজি এলঅ।

³ যে মানুচ্চো ঘর্ বানায় তে যেধোক্ক্যেন সেই ঘরানিত্তুন বেশ্ সর্মান পায়, সেই মজিম গোজেনে যীশুরে মোশিত্তুন্ বেশ্ আরঅ বাঈনী পেবার অধিকারী বিলিনে মনে গুরিলো।

⁴ পত্তি ঘর কেঅ না কেঅ বানেই থায়, মাত্তর্ গোজেনে বেক্কানি বানেয়্যে।

⁵ ঘেচ্চ্যেকগুরি মোশি গোজেনর্ ঘোর্‌বো সেবাগুরিয়্যে ইজেবে বিশ্বেজি এলঅ, যেন ভবিচ্চদে যিয়েনি কুয়ো অবঅ সিয়েনি পৌইদ্যেনে তে স্বাক্ষ্য দি পারে।

⁶ মাত্তর্ খ্রীষ্ট সেই পরিবারর্ ভারান-পেইয়্যে পুয়ো ইজেবে বিশ্বেজি-এলঅ। আমার ঘেচ্চ্যেকগুরি আজা আঘে বিলিনে মনত্ যে সাহচ্‌ আর হুজী এজে, সিয়েন্দোই যুনি আমি থুম্ সং থির্ থেই সালে দেগা যেবঅ, আমি গোজেন ঘোর্‌বো।

অবিশ্বেজ পৌইদ্যেনে উজিয়ার্ গরানা

⁷ সেনত্যে পবিত্র আত্মাগানে কোইয়্যেদে, “আহ্, এচ্চ্যে যুনি তুমি তা কধালোই কান্ দুয়ো!

⁸ তে কত্তে, তমা পূরোণি মানুচ্চুনো ধোক্ক্যেন তমা মনানি তুমি দরমর ন-গোজ্জ্য। তারা ধূল্যেচর-চাগালা ভিদিরে উল্লোমি ওইনে মরে পোরোক্ষ্যে গোজ্জ্যন্।

⁹ তমা পূরোণি মানুচ্চুনে সিধু মরে যাচাই গোজ্জ্যন, আর চল্লিচ্ বজর্ ধুরি সেই সময়ো মানুচ্চুনে মঅ কামানি দেক্ক্যন্।

¹⁰ মুই তারা উগুরে রাগে কোইয়োং, ‘এ মানুচ্চুনোর মনানি ভান্ন্যেই পধেদি ঘুরি বেড়ার্; তারা আমা পথ্‌তান হবর্ ন-পেলাক্।’

¹¹ সেনত্যে মুই রাগে শমক্ হেইনে কোইয়োঙে, ‘মুই দোঙে জিরেবার জাগানত্ তারা যেই ন-পারিবাক্।’ ”

¹² ভেইলগ্, উজিয়ার! তমা ভিদিরে কারঅ মন যেন ভান্ন্যেই আর অবিশ্বেজি ন অয়। এবাবোত্যে মনানি জেদা গোজেনত্তুন্ দূরোত্ সুরি যায়।

¹³ ইয়েনত্তুন্ যেদকদিন পবিত্র বোইবোর্ “এচ্চ্যে” কধাগান কুয়ো যায়, সিয়েনর পত্তি দিন তুমি একজন আরেকজনরে উচ্চোমি দুয়ো, যেনে তমার্ কারঅ মন পাপর্ ছলনাত পড়িনে আগাত্যে ন-অয়;

¹⁴ কিয়া পত্তমে যে নিচ্চয়তাগান আমার এলঅ, যুনি আমি সিয়েনত থুম্ সং থির্ থেই সালে দেগা যেবঅ যে, আমি খ্রীষ্ট সমারে ভাগীদার্ ওইয়্যেই।

¹⁵ এক্কেনা আগেদি কুয়ো ওইয়্যেদে, আহ্, এচ্চ্যে যুনি তুমি তা কধানি শুনো! তে কোইয়্যেদে, “তমা পূরোণি মানুচ্চুনো ধোক্ক্যেন তমা মনানি তুমি আগাত্যে ন-গোজ্জ্য।”

¹⁶ কন্না গোজেনর কধানি শুনিনেয়ো তারে তোচ্চ্যা লাগেয়োন? তারা কি সে মানুচ্চুন নয় যিগুনোরে মোশি মিসর দেজত্তুন্ নিগিলেই আন্ন্যে?

¹⁷ আর চল্লিশ বজর্ ধুরিনে গোজেনে কুগুনো উগুরে তোচ্চ্যা পেলঅ? সিগুনে কি সে মানুচ্চুন নয় যিগুনে পাপ গোজ্জ্যন আর যিগুনোর্ মরা কিয়্যেনি ধূল্যেচর-চাগালাত পোজ্জ্যে এলঅ?

¹⁸ আর কাইধু বা গোজেনে খাম হেইনে কোইয়্যেদে, তারা তার্ দিয়্যে জিরেবার জাগানত্ যেই ন-পারিবাক্? তারা কি সেই মানুচ্চুন নয় যিগুনে তারে অবিশ্বেজ গুরিনে অমান্য গোজ্জ্যন?

¹⁹ ইয়েনত্ দেগা যায় যে, তারার্ অবিশ্বেজর্ কারনে তারা গোজেনর্ দিয়্যে জিরেবার জাগানত্ যেই ন-পারন।