ইব্রীয় 11 - Chakma Bibleবিশ্বেজ পৌইদ্যেনে 1 আমি যিয়েন পেবং বিলিনে আজা গুরি আঘিই সিয়েন যে আমি পেবং এই ঘেচ্চেকগুরিগান অলঅ বিশ্বেজ্। আর সেই বিশ্বেজ্চান্দোই আমি নিচ্চিত গুরি বুঝি পারিই যে, আমি যিয়েন ন-দেগির্ সিয়েন আসলে আঘে। 2 বিশ্বেজত্যে আমা পূরোণি মানুচ্চুনে গোজেনর্ বাঈনী পেইয়োন। 3 বিশ্বেজ্সোই আমি বুঝি পারিই যে, গোজেন মুয়োর্ কধালোই এই জগদ্তান সৃট্টি ওইয়্যে। সিয়েন্দোই বুঝো যায়, যিয়েন আমি দেগির্ সিয়েন কনঅ দেগা জিনিজোত্তুন্ সৃট্টি ন-অয়। 4 বিশ্বেজত্যে কয়িনোত্তুন্ হেবলর্ উৎসর্বগান গোজেন চোগেদি আরঅ গম এলঅ। তার্ বিশ্বেজত্যে গোজেনে তা উৎসর্বগান মানি লোইনে তা পৌইদ্যেনে এ সাক্ষ্যগান দিয়্যেদে, তে নিদ্দুজি। যুনিয়ো হেবলে মুরি যেয়্যে তো তার্ বিশ্বেজ্চান্দোই তে এজঅ কধা কর্। 5 বিশ্বেজত্যে হনোকে মুরি ন-যায়; তারে স্বর্গত্ তুলি নেযা ওইয়্যে। গোজেনে তারে নেযেয়্যে বিলিনে তারে তোগেই পাহ্ ন-যায়। হনোকরে নেযেবার আগে গোজেনে এ সাক্ষ্যগান দিয়্যেদে যে, হনোকে তারে হুজী গোজ্জ্যে। 6 বিশ্বেজ্ বাদে গোজেনরে হুজি গরানা অসম্ভব, কিয়া গোজেন ইধু যে যায়, তাত্তুন্ বিশ্বেজ্ গরা পরিবোদে, গোজেনে আঘে আর যিগুনে তার্ আওজ্ মজিম চলন্ তারা তা আঢত্তুন্ তারার্ পাওনা পান্। 7 যিয়েন সেক্কেয়ো দেগা ন-যায় সেই পৌইদ্যেনে গোজেনে নোহরে উজিয়ার্ গোজ্জ্যে। নোহ গোজেন-ভক্ত এলঅ বিলি গোজেনর্ কধা বিশ্বেজ্ গুরিনে এক্কান জাহাজ বানেয়্যে, যেনে তা ঘোর্বোবু রোক্ষ্যে পায়। নোহ তার্ বিশ্বেজ্চান্দোই জগদ্তানরে দুষি বিলিনে প্রমাণ গোজ্জ্যে আর গোজেন ইধু নিদ্দুজি বিলিনে মানি লবার্ অধিকার পেয়্যে, যিয়েন বানা বিশ্বেজর্ কারনে পাহ্ যায়। 8 গোজেনে যেক্কে অব্রাহামরে ডাক্ক্যে সেক্কে বিশ্বেজত্যে তে গোজেনর্ কধার্ বাধ্য ওইয়্যে আর সোম্বোত্তি ইজেবে যে জাগায়ান তার্ পেবার্ কধা এলঅ সেই জাগানত্ তে যেয়্যে। যুনিয়ো সেক্কে বুঝি ন-পারে তে কুধু যার্ তো তে লদ্ দিয়্যে। 9 গোজেনে যে দেশ্চান অব্রাহামরে দিবার এগেম্ গোজ্জ্যে তে বিশ্বেজত্যে বিদেশী ইজেবে সিধু বজত্তি গোজ্জ্যে। তা সমারে যিগুনে সেই একই এগেমর্ আশিদ্বাদর্ ভাগী এলাক্ সেই ইস্হাক আর যাকোব ধোক্ক্যেন গুরি তেয়ো তাম্বুলোত্ বজত্তি গুরিদো; 10 কিয়া যে শঅ্রান্ উমরত্যে দরমর তে সেই শঅরানরে বাজ্জ্যেই রোইয়্যে। সেই শঅ্রানর্ নক্শা বানানা আর গাধেই তুলিবার কামান্ গোজেনে গোজ্জ্যে। 11 যুনিয়ো সারার পুয়ো অবার্ বয়জ্চান পার্ ওই যেইয়্যে তো বিশ্বেজর্ কারনে তে অব্রাহামর্ পুয়োবো পেদত্ ধুরিবার খেমতা পেয়্যে, কিয়া তে বিশ্বেজ্ গোজ্জ্যেদে, যিবে এগেম্ গোজ্জ্যে তে বিশ্বেজ্বলা। 12 ইয়েনত্যে বয়জর্ কারনে অকেজো কিয়্যেলোই অব্রাহামে আগাজ তারা ধোক্ক্যেন আর সাগর পারর্ কোড়োলি ধোক্ক্যেন ভালোক্কুন্ পুয়ো-ছার্ বাপ্ ওইয়্যে। 13 এই মানুচ্চুনে বিশ্বেজ্ গুরিনে জিংকানি কাদেইনে মুরি যেইয়োন। গোজেনে তারারে যিয়েন দিবার এগেম্ গোজ্জ্যে সিয়েন তারা ন-পান্, মাত্তর্ দূরোত্তুন্ সিয়েন দেক্ক্যন আর হুজিয়ো ওইয়োন। এই পিত্থিমীত্ যে তারা বিদেশী আর পরদেজত্ বজত্তি গুরিয়্যে সিয়েন তারা স্বীগের্অ গোজ্জ্যন্। 14 যিগুনে সিয়েন স্বীগের্ গরন্ তারা গমেডালে বুঝোন্দে যে, তারা নিজোত্যে এক্কান দেশ তগাদন্। 15 যে দেজত্তুন্ তারা নিগিলি এচ্চ্যন্ যুনি সেই দেজর্ কধা তারা চিন্তে গুরিদাক্ সালে দঅ সেই দেজত্ ফিরি যেবার্ বেক্ ঝুগানি তারা পেদাক্। 16 মাত্তর্ তারা আরঅ গম এক্কান দেজর্, অত্তাৎ স্বর্গগানরে তগাদন্। সেনত্যে গোজেনে নিজোরে তারার্ গোজেন কধে ন-লাজায়, কিয়া তে তারাত্যে এক্কান শঅর্ বানেয়্যে। 17 অব্রাহামরে যগা চেবার্ অক্তত্ তে গোজেন উগুরে বিশ্বেজত্যে ইস্হাকরে উৎসর্ব গোজ্জ্যে। যিবে ইধু গোজেনে এগেম্ গোজ্জ্যে তেয়ই তার্ বানা এক্কো গুরি পুয়োরে উৎসর্ব গুরিবাত্যে যার্। 18 ইবে সেই পুয়ো যিবে পৌইদ্যেনে গোজেনে কোইয়্যেদে, “ইস্হাকর্ গুট্টিবোরে তর্ গুট্টি বিলিনে ধরা অবঅ।” 19 অব্রাহামে তারে উৎসর্ব গুরিবাত্যে রাজী অলঅ, কিয়া তে বিশ্বেজ্ গুরিদো গোজেনে মরা মান্জ্যরে জেদা গুরি পারে। আর কধে কি, অব্রাহামে দঅ মরণ দুয়োরত্তুন্ ইস্হাকরে ফিরি পেইয়্যে। 20 বিশ্বেজ্ গুরিনে ইস্হাকে ভবিচ্চদত্যে যাকোব আর এষৌরে বর্ দিয়্যে। 21 বিশ্বেজ্ গুরিনে যাকোবে মুরি যেবার সময়োত্ যোষেফর দ্বিবে পুয়োরে বর্ দিয়্যে আর লুদিগো উগুরে ভর্ দিইনে গোজেনর্ উবোসনা গোজ্জ্যে। 22 বিশ্বেজ্ গুরিনে যোষেফে মুরি যেবার্ সময়োত্ মিসর দেজত্তুন্ ইস্রায়েলীয়গুনোরে যেবার্ কধা কোইয়্যে আর তা মরা কিয়্যেগানরে কি গরা পরিবো সিয়েন কোইয়্যে। 23 মোশির জর্মর্ পরেদি তার মা-বাবে বিশ্বেজ্ গুরিনেই তিন মাস তারে লুগেই রাগেয়্যে, কিয়া তারা দেক্ক্যন্দে পুয়োবো দোল্ আর তারা রাজার উগুমানরে ন-দোরেলাক্। 24 বিশ্বেজত্যে মোশি দাঙর্ অনার্ পরেদি ন-চেলদে, কেঅ তারে ফরৌণ ঝিবোর্ পুয়ো বিলিনে ডাগন্। 25 তে পাপর্ কানক্কন্ন্যে হুজি বাদ্ দিইনে গোজেন মানুচ্চুনো সমারে অত্যেচার ভুগোনা বেঈ ললঅ। 26 তে মিসরর্ ধন-সোম্বোত্তিত্তুন্ খ্রীষ্টত্যে অগমান্ অনার্ দামান বোউত বেশ্ বিলি মনে গুরিলো, কিয়া তা চোগ্কো এলদে বক্শিজ ইন্দি। 27 গোজেন উগুরে তার্ বিশ্বেজত্যে তে রাজার্ রাগ্কানরে ন-দোরেইনে মিসর দেশ্চান ফেলে যেইয়্যে, কিয়া যিবেরে দেগা ন-যায় তারে যেন দেগর্ সেবাবোত্যে গুরি তে ধৈয্য ধোজ্জ্যে। 28 তে বিশ্বেজ্ গুরিনে উদ্ধোর্-পরব্ আর লো ছিদিবার সুদোমান পালন গোজ্জ্যে, যেনে যে ভস্ত গুরিয়্যে স্বর্গদূত্তো পত্তম পুয়োগুনোরে মারে ফেলেব তে ইস্রায়েলীয়গুনোরে ন-ধরে। 29 বিশ্বেজ্ গুরিনে ইস্রায়েলীয়গুনে শুগুনো মাদি উগুরেদি আঢি যাইদ্যে ধোক্ক্যেন গুরিনে লোহিত সাগরান্ পার্ ওইয়োন মাত্তর্ মিসরীয়গুনে সিয়েন গুরিবাত্যে যেইনে ডুবিনে মুরিলাক্। 30 বিশ্বেজ্ গুরিনে ইস্রায়েলীয়গুনে সাত দিন ধুরিনে যিরীহো শঅরর্ দেবাল চেরোকিত্যেদি ঘুরোনার পরেদি সিয়েন পড়ি গেলঅ। 31 বিশ্বেজত্তে রাহব বেশ্যে মিলেবো যিরীহো শঅরত্ বজত্তি গুরিয়্যে অবাধ্য মানুচ্চুনো সমারে ভস্ত ন-অয়, কিয়া তে সেই চড়ুনোরে সমাজ্জ্যে ধোক্ক্যেন মানি লোইয়্যে। 32 ইয়েনত্তুন্ বেশ্ মুই আর কি কোম? গিদিয়োন, বারক, শিম্শোন, যিপ্তহ, দায়ূদ, শমূয়েল আর ভাববাদীগুনোর্ কধা কবার্ সময় মর্ নেই। 33 বিশ্বেজর্ মাধ্যমে তারা রেজ্য জিত্যন্, দোল্ বিচের্ গোজ্জ্যন, গোজেন এগেমর্ পূর্ণতাগান লাভ গোজ্জ্যন, সিংহগুনো মুয়োন বন্ধ গোজ্জ্যন্, 34 জদবদে আগুনোর্ তেজ্চান কোমেই দুয়োন্, ছুরির্ আঘাদত্তুন্ রোক্ষ্যে পেইয়োন, বল্-পোজ্জ্যে অলেয়ো বোলী ওইয়োন, যুদ্ধোত্ বল্ দেগেয়োন আর বিদেশী সৈন্যদলুনোরে ধাবেই দুয়োন্। 35 মিলেগুনে তারার্ মরা মানুচ্চুনোরে আরঅ জেদা অবস্থায় ফিরি পেইয়োন। অন্যগুনে নিজোর্ আওজ্ মজিম জেলোত্তুন্ ছড়ান্ পেলেয়ো আর দুঘোত্ ভুগ্কোন, যেনে তারা মরণত্তুন্ জেদা ওইনে আরঅ গম জিংকানির্ অধিকারী অন্। 36 আরঅ অন্যগুনে ঠাট্টা-তামাজা আর ভারী মারপিঠ্, এন্ কি, আঢ্কড়া আর জেল্ খাদানা সং সোজ্জ্য গোজ্জ্যন্। 37 মান্জ্যে তারারে পাত্তর্ মাজ্জ্যন্, আড়ালোই দ্বিকট্টা গুরি কাপ্প্যন্ আর ছুরিলোই খুন্ গোজ্জ্যন। তারা অত্যেচার আর ভান্ন্যেই বেবহার পেইয়োন, আর রাদত্ পড়িনে ভেড়া আর ছাগল চাম্ পিনিনে ঘুরি বেড়েদাক্। 38 তারা ধূল্যেচড়ত্তুন্ ধূল্যেচড়ত, মুড়োত্তুন্ মুড়োত, সুরুঙোত্তুন্ সুরুঙোত আর গাঢত্তুন্ গাঢত্ ধেই ধেই বেড়েদাক্। এ মানুচ্চুনোরে জাগা দেনার্ খেমতা জগদর্ ন-এলঅ। 39 বিশ্বেজত্যে তারা বেক্কুনে বাঈনী পেইয়োন, মাত্তর্ গোজেনে যিয়েন দিবার্ এগেম্ গোজ্জ্যে সিয়েন তারা ন-পান্; 40 কিয়া গোজেনে আমাত্যে আরঅ গম্ কিজু ঠিগ্ গুরি থোইয়্যে। তে ঠিগ্ গোজ্জ্যেদে যে, আমারে বাদ্ দিইনে তারারে পূর্ণতাগান দান গরা ন-অবঅ। |
Copyright © 2021 Bangladesh Bible Society
Bangladesh Bible Society