ইব্রীয় 1 - Chakma Bible

পুয়োবো স্বর্গদূত্‌তুনোত্তুন্ দাঙর্

¹ ভালোক্ দিন আগে ভাববাদীগুনোরে দিইনে গোজেনে আমা পূরোণি মানুচ্চুনো ইধু নানান্ ধগে ভালোক্ বার এক্কেনা এক্কেনা গুরি কধা কোইয়্যে।

² মাত্তর্ এ দিনুনোর্ শেজদি তে তার্ পুয়োবোরে দিইনে আমা ইধু কধা কোইয়্যে। গোজেনে তা পুয়োবোরে বেক্কানির অধিকারী অবাত্যে বেঈ লোইয়্যে। পুয়োবোরে দিইনে তে বেক্কানি সৃট্টি গুরিলো।

³ গোজেনর্ বেক্‌ গুণানি সেই পুয়োবো ইধু আঘে; পুয়োবোই গোজেনর্ পুরো ফোটু ধোক্ক্যেন। পুয়োবো তার্ খেমতাবলা কধালোই বেক্কানি ধুরি রাগেইনে পরিচালনা গরে। মান্‌জ্যর পাপ্পানি দূর্ গরানার্ পরে পুয়োবো স্বর্গত্ মহান গোজেনর্ ডেন্ ধাগেদি বজিলো।

⁴ তা বাবত্তুন্ তে যে নাঙান্ পেয়্যে সিয়েন যেধোক্ক্যেন স্বর্গদূত্‌তুনোর্ নাঙানিত্তুন্ দাঙর্, সেধোক্ক্যেন গুরি তে নিজেয়ো স্বর্গদূত্‌তুনোত্তুন বোউত বেচ্‌ দাঙর্ ওইয়্যে।

⁵ গোজেনে কনদিন্অ কি কনঅ স্বর্গদূতরে এ কধাগান কোইয়্যে, “তুই মর্ পুয়ো, এচ্চ্যে মুই তর্ বাব্ অলুং”? আরঅ তে কি কোইয়্যে, “মুই ওম্ তার্ বাপ আর তে অবঅ মর্ পুয়ো”?

⁶ না, তে সিয়েন ন-কয়। গোজেনে তার্ আজল্ পুয়োবোরে এ পিত্‌থিমীত দিপাধেবার অক্তত্ কোইয়্যেদে, “গোজেনর্ বেক্ দূত্‌‌তুনে তারে গোজেনর্ সর্মান দিইনে সালাম গোরোদোক্।”

⁷ স্বর্গদূত্‌‌তুনো পৌইদ্যেনে গোজেনে কত্তে, “তে বোইয়্যেরানরে তার্ দূত বানেয়্যে; জ্বোল্-জোল্যে আগুনানরে গোজ্জ্যেদে তার্ চাগর্।”

⁸ মাত্তর্ পুয়োবো পৌইদ্যেনে গোজেনে কোইয়্যেদে, “ও গোজেন, তর্ সিংহাসনান্ উমরত্যে; তর্ শাসনান্ ন্যায়র্ শাসন।

⁹ তুই ন্যায়ানরে কোচ্‌পেইয়োচ অার অন্যেয়ানরে ঈচ্ গরচ্; সেনত্যে গোজেন, তর্ গোজেন, তঅ সমাজ্জ্যেগুনোত্তুন্ বোউত্ বেশ্ হুজি তেল ধোক্ক্যেন গুরি তঅ উগুরে ঢালি দিয়্যে।”

¹⁰ গোজেনে আরঅ কোইয়্যেদে, “প্রভু, তুই বোউত্ দিন আগে পিত্‌থিমীর গড়াগান গাড়েয়োচ্, দাঙর্ আগাজ্‌‌চান তঅ আঢে বানেয়োচ্।

¹¹ সিয়েনি ভস্ত ওই যেবঅ, মাত্তর্ তুই উমরত্যে থেবে। কাবড় ধোক্ক্যেন সিয়েনি পূরোণ ওই যেবঅ।

¹² সিয়েনিরে তুই কাবড় ধোক্ক্যেন গুচ্চ্যেই থবে, আর কাবড় ধোক্ক্যেন সিয়েনিরে বদলা অবঅ। মাত্তর্ তুই আগ ধোক্ক্যেন্ থেবে, আর তর্ জিংকানিগান কনদিনঅ থুম্ ন-অবঅ।”

¹³ গোজেনে কনদিন্অ কি কনঅ স্বর্গদূতরে এ কধাগান কোইয়্যে, “যেদক্কন সং মুই তঅ শত্রুগুনোরে তঅ টেঙত্ তলে ন-রাগাং, সেদক্কন সং তুই মঅ ডেনেদি বস্”?

¹⁴ স্বর্গদূত্‌‌‌তুনে কি বেক্কুনে সেবাগুরিয়্যে আত্মা নয়? যিগুনে পাপত্তুন্ উদ্ধোর্ পেবাক্ তারারে সেবা গুরিবাত্যে দঅ তারারে দিপাধা অয়।