হবক্কূক 2 - Chakma Bible1 মুই মর্ চুগিদার-জাগানত্ থিয়্যেম্, দেবাল উগুরে জাগা নেযেম্; তে মরে কি কবঅ আর মঅ আবিত্তিগানর্ কি জোব্ দিবো সিয়েনত্তে বাজ্জেই থেইম্। লগেপ্রভুর জোব্ দেনা 2 সেক্কে জোবত্ লগেপ্রভু কলঅ, এ দর্শনানর কধাগান লেগ্ আর পাত্তর ফলগ উগুরে খুনিনেই গমেডালে গর্ যেনে সিয়েন সহজে পড়া যায়, 3 কিত্যে এ দর্শনানর্ কধাগান পূরোণ অবার্ সময় এজঅ বাগী আঘে, মাত্তর্ সিয়েন যাদিমাদি উজেই এজের্ আর সে দর্শনান্ মিজে প্রমান্ ন-অবঅ। দিরি অলেয়ো সিয়েনত্তে বাজ্জেই থাগঅ; সিয়েন ঠিগ্ সময়োত্ হামাক্কায় পূরোণ অবঅ। তুই এ কধাগান লেগ্: 4 বাড়্বো গুরিয়্যে বাবিলান্ গম্ নয়, মাত্তর্ যিবেরে নিদ্দুজি বিলিনে মানি লুয়ো অর্ তে তার বিশ্বেজ্চান্দোই বাঁজি থেবঅ। 5 বাড়্বো গোজ্যে বাবিলান লগে আংগুর-রস্চানে বেঈমানী গোজ্যে, তারে থির্ নেইয়্যে গুরি তুল্যে। তে মরন জাগান ধোক্ক্যেন লুভী আর মরনান ধোক্ক্যেন কনদিন্অ ঈল্ ন-অয়; তে বেক্ জাদরে নিজো ইধু এগত্তর্ গরে আর তারারে বন্দী গুরিনে নেযায়। 6 তারা বেক্কুনে তারে ঠাট্টা-মশ্কারী গুরিবাক্ আর কবাক্, অভিশাব্ পোড়োক্ তার্, যে অন্যগুনো পযাপিরানি নিজোত্তে থুবোয় আর জামিনো পযাপিরালোই তাগোয়্যে অয়। আর কয়দিন এবাবোত্যে চলিবো? 7 তর্ পাওনাদারুনে কি একদিন অদাদৎ ন-উদিবাক্? তারা জাগি উদিনে কি তরে ফুলেই ন-তুলিবাক্? সেক্কে তুমি অবা তারা ইধু লুদেয়্যে মাল ধোক্ক্যেন্। 8 তুই ভালোক্ জাদর্ ধন-সোম্বোত্তিগানি লুদেয়োচ্ বিলি সেই বেক্ জাদর্ বাঁজি থেইয়্যে মানুচ্চুনে তর্ ধন-সোম্বোত্তিগানি লুদেবাক্। ইয়েনর্ কারনান্ অলঅ, তুই মান্জ্যর লো ঝোরেয়োচ্; তুই নানান্ দেজ্, শঅর্ আর সিয়েনি ভিদিরে বেক্ মানুচ্চুনোরে অত্যেচার গোজ্যস্। 9 জাদ্তুনে কবাক্, অভিশাব্ পোড়োক্ তার্, যে অন্যেয় গুরিনে লাভবান্ ওইনে তার্ থেবার ঘরান্ তুলে যেনে তে গমেডালে থেই পারে আর দযাত্তুন্ রোক্ষ্যে পায়। 10 তুই ভালোক্ জাদরে ভস্ত গুরিনে নিজো পরিবার উগুরে লাজানাগান আন্যস্ আর বাঁজিবার অধিকারান্ আরেই ফেলেয়োচ্। 11 তঅ ঘরর্ দেবাল শীলুনে তঅ বিরুদ্ধে আবিত্তি জানেবাক্ আর ঘরর্ খুদোগুনে সেই কধানর্ সমত্তন্ দিবাক্। 12 জাদ্তুনে কবাক্, অভিশাব্ দিই তারে, যে লো ঝোরেইনে শঅর্ বানায় আর অন্যেয় কাম্বোই আদামান্ থিদেবর্ গরে। 13 বেগত্তুন্ খেমতাবলা লগেপ্রভু থির্ গোজ্যেদে যে, জাদ্তুনোর কামর্ ফল আগুনোত্ পুড়ি যেবঅ আর তারা মিজে মিজে নিজোরে বল্পোজ্যে গুরিবাক্। 14 সাগরান্ যেবাবোত্যে পানিলোই ভরা থায় সেবাবোত্যেগুরি পিত্থিমীগান লগেপ্রভুর মহিমার জ্ঞানে ভর্পুনোং অবঅ। 15 জাদ্তুনে কবাক্, অভিশাব্ দিই তারে, যে রাগ গুরিনে তা পাড়াল্যেগুনোরে দগ্ দগ্ মদ খাবায় আর মাত্তল্ গুরি ফেলায় যেনে তে তারারে লাংদা দেগে। 16 তুই সর্মানর্ বদলে লাজে পরিপূরোণ অবে। এবেরা তর্ পালা। তুই মদ হেইনে লাংটা-বাংটা অ। লগেপ্রভুর ডেন্ আঢর্ রাগর্ গলস্ছো তন্দি এজের্; অসর্মানে তঅ সর্মানান্ ঢাগা যেবঅ। 17 লেবানন উগুরে তুই যে অত্যেচার গোজ্যস্ সেই অত্যেচারান্ পুরোপুরি গুরিনে তঅ উগুরে এবঅ আর সিদুগোর্ য়েমানুনোরে মারে ফেলেয়োচ্ বিলিনে ইক্কিনে য়েমানুনে তরে দর্ লাগেবাক্। তুই দঅ মান্জ্যর্ লো ঝোরেয়োচ্ আর দেজ্, শঅর্ আর সিদুগোর্ বেক মানুচ্চুনোরে অত্যেচার গোজ্যস্। 18 আড়ুগোর্ কনঅ দাম নেই, কিত্যেই মান্জ্যে দঅ তারে খুনিনেই বানেয়োন্। ছাজিনে ঢাল্যে মূত্তির্অ মূল্য নেই, কিত্যে সিয়েনত্তুন্ মান্জ্যে মিজে শিক্ষ্যে পান্। যে সিবে বানায় তে কিত্তে তা আঢে বানেয়্যে জিনিস্ছো উগুরে বিশ্বেজ্ গরে? সেই মূত্তি দঅ কধা কোই ন-পারে। 19 “জাদ্তুনে কবাক্, ‘অভিশাব্ দিই তারে, যে তক্তাগানরে জেদা অবাত্তে কয় বা পরাণ নেইয়্যে শিল্লোরে জাগি উদিবাত্তে কয়।’ সিগুনে কি তারে শিক্ষ্যে দি পারন? সিগুন্ দঅ সনা আর রূবো দিইনে বেড়েয়্যে; সিগুনো ভিদিরে নিজেস্ নেই। 20 মাত্তর্ লগেপ্রভু তার্ সুদ্ধো-সাংগ ঘরত্ আঘে; বেক্ পিত্থিমীগান তা মুজুঙোত্ জুরোগুরি থোক্।” |
Copyright © 2021 Bangladesh Bible Society
Bangladesh Bible Society