হবক্‌‌‌‌কূক 1 - Chakma Bible

¹ ভাববাদী হবক্‌‌‌কূক ইধু দর্শনর মাধ্যমে গোজেনর কধানি ফগদাং অলঅ।

হবক্‌‌‌কূকর পত্তম্ আবিত্তি

² ও লগেপ্রভু, আর কয়দিন এযালত্তে মুই তরে ডাগিম আর তুই ন-শুনিবে? কয়দিন “অত্যেচার চলের্” বিলি তইদু কানাকুদি গুরিম আর তুই উদ্ধোর্ ন-গুরিবে?

³ কিত্তে তুই মরে পাজিগানি চাদে বাধ্য গরর্? কিত্তে তুই অন্যেয়ানি সোজ্য গরর্? মঅ মুজুঙোত্ ভস্ত আর অত্যেচার অর্ আর আমিঝে কোল্-কোজ্যে আহ্ মারামারি চলের্।

⁴ সুদোমানি খেমতানেইয়্যে ওই পোজ্যে আর কনদিন্‌অ ন্যায়বিচের্ ন-অর্। গম্ মানুচ্চুনোত্তুন্ পাজিগুনোর্ খেমতা বেশ্ বিলি বিচের্ উগুদো অর্।

লগেপ্রভুর্ জোব্ দেনা

⁵ জোবত্ লগেপ্রভু কোইয়্যেদে, “তুমি জাদ্‌তুনো ইন্দি রিনি চঅ, সেক্কে তুমি এক্কুবারে আমক্ অবা, কিত্যেই তমা সময়োত্ মুই এমন্ এক্কান্ কিজু গুরিবাত্তে যাঙর্ যিয়েনর্ কধা তমারে কলেয়ো তুমি বিশ্বেজ্ ন-গুরিবা।‌ ‌ ‌

⁶ মুই বাবিলীয়গুনোরে যুক্কোল্ গরঙর্; তারা সেই চিৎনপুজ্যে জাদ্, যিগুনে অন্যগুনোর দেজ্‌‌চানি গজক্ গুরিবাত্তে পুরো পিত্‌‌থিমীর বেক্ জাগায়ানি ইধু যান।

⁷ তারারে দেগিনে মান্‌‌জ্যে অমকদ দরান্। তারা নিজেই নিজো সুদোমানি বানান্ আর কারঅ তলে থেবাত্তে ন-চান।

⁸ তারার্ ঘোড়াগুন হোক্যে বাঘত্তুন্অ বেশ্ যান, সিগুন সাজোন্যে নেকড়ে বাঘত্তুন্অ বেশ্ দর্‌‌‌গরেপারা। তারার্ ঘোড়া চালেয়্যেগুনে দূরত্তুন্ দাবা এজন্; গিলিবাত্তে তারা শকুনো ধোক্ক্যেন যাদিমাদি এজন্।

⁹ তারা বেক্কুনে অত্যেচার্ গুরিবাত্তে এজন্। তারার্ বিরেট্ দল্লো উজেই এজের্ আর ধূল্যে ধোক্ক্যেন গুণি ন-ফুরেইয়্যে মান্‌‌‌‌জ্যরে বন্দী গরন্।

¹⁰ তারা রাজাগুনোরে ঠাট্টা-মশ্‌‌‌‌কারি গরন্ আর শাজন্‌গুরিয়্যেগুনোরে ঈচ্ গরন্। তাম্বুলানি দেগিনেই তারা আজন্; তারা দেবাল্ পার অবাত্তে পাত্তর কুড়্ বানেইনে সে তাম্বুলানি গজক্ গুরি নেযান্।

¹¹ সে পরেদি তারা বোইয়্যের্ ধোক্ক্যেন যান্। সে মানুচ্চুনে দুষী, কিত্যে তারা ইধু তারার্ খেমতাগান্ অলঅ তারার্ দেবেদা।”

কবক্‌‌‌‌‌কূকর দ্বিলম্বর্ আবিত্তি

¹² ও লগেপ্রভু, মর্ গোজেন, মর্ সুদ্ধো-সাংগ মানুচ্চো, তুই কি উমরত্তে নয়? আমি এক্কুবারে ভস্ত ন-অবং। ও লগেপ্রভু, আমারে সাজা দিবাত্তে তুই বাবিলীয়গুনোরে নেযেয়োচ্; ও আশ্রয়-মুড়োবো, তুই আমারে সাজা দিবাত্তে তারারে নেযেয়োচ্।

¹³ তুই এদক্ আজল্ যে, তুই ভান্ন্যেয়দি রিনি চেই ন-পারচ্ আর অন্যেয় সোজ্য গুরি ন-পারচ্। সালে তুই কেধোক্ক্যেনগুরি সেই বেঈমানীগুনোরে গম্ চোগেদি দেগর্? পাজিগুনে যেক্কে তারাত্তুন্অ বেশ্ গম্ মানুচ্চুনোরে গিলোদন্ সেক্কে কিত্তে তুই জুরো গুরি থাচ্?

¹⁴ কিত্তে তুই মানুচ্চুনোরে সাগর মাছ আর বুগেদি-আঢি যাইদ্যে পরাণবলাগুনো ধোক্ক্যেন শাজন্‌গুরিয়্যে নেইদ্যে অবস্থায় রাগেয়োচ্?

¹⁵ বাবিলীয়গুনে বুজ্জিলোই তারারে বেক্কুনোরে টানিনে তুলোন্ বা জাল্লোই তারারে ধরন বা টান্যে-জাল্লোই তারারে এগত্তর্ গরন্; আর সেনত্তে তারা ফুত্তি গরন, হুজি অন্।

¹⁶ সেনত্তে তারা তারার্ জালানর্ নাঙে য়েমান্ উৎসর্ব গরন্ আর টানা-জালর্ নাঙে আগর্‌বাট্টি জ্বালান্, কিত্যে তারার জালানিলোই তারা বোউত্ লাভ গরন্ আর গম্ গম্ হানা হান্।

¹⁷ তারা কি বার্ বার্ তারার্ জালান্ খালি গুরি দোয়্যে ন-দেগেইনে জাদ্‌‌‌‌‌‌তুনোরে ভস্ত গরা ধুরিবাক্?