পত্থম 40 - Chakma Bibleবন্দিগুনোর স্ববনর্ অত্তগান্ 1 এ ঘটনানির্ পরেদি মিসর রাজার দ্বিজন চাগরে রাজার বিরুদ্ধে অন্যেয় গুরিলাক্। ইগুনো ভিদিরে এক্কো এলঅ রুটি বানেইয়্যেগুনোর্ নেতা আর এক্কো এলঅ পানিয় দিয়্যে। 2 ফরৌণে এ দ্বিজন উগুরে এমন্ রাগে ফুল্যেদে যে, 3 তে যোষেফর্ গিরোজ, অত্তাৎ সৈন্য-দল নেতাবোর্ ঘর জেলো ভিদিরে তারারে আক্সোই রাগেল। যোষেফেয়ো সে একই জাগাত্ বন্দি এলঅ। 4-5 রোক্ষ্যেদল নেতাবো এ দ্বিজন বন্দিগুনোর ভারান যোষেফ আঢত্ দিলো, আর যোষেফেয়ো তারারে দেগাশুনো গরা ধুরিলো। ভালোক্দিন পরেদি বন্দি অবস্থায় মিসর রাজার্ সে দ্বিজন চাগরে একই রেদোত্ এক্কানত্ ধরে স্ববন্ দেগিলাক্। তারার্ যার্ যার্ স্ববন অত্তগানি এলঅ। 6 বেন্যে অক্তত্ যোষেফে সে দ্বিজন ইধু যেইনে দেগিলোদে তারা খুব পিত্ত-মরা ওই আগন্। 7 সিয়েন দেগিনে যোষেফে তারারে পুযোর্ গুরিলো, তমারে এচ্চ্যে এদক্ কিত্তে পিত্ত-মরা দেগা যার্? 8 জোবত্ তারা তারে কলাক্, আমি দ্বিজনে এক্কান গুরি স্ববন দেক্ক্যেই, মাত্তর্ সিয়েন অত্তগান্ কোইদি পারন এবাবোত্যে মানুচ্ ইধু নেই। যোষেফে তারারে কলঅ, অত্তগান্ কোই দিবার্ খেমতা কি গোজেনর নেই? তমা স্ববনর্ কধাগান্ মরে কঅ । 9 সেক্কে সেই পানীয় দিয়্যেগুনোর নেতাবো যোষেফরে তা স্ববনর্ কধাগান্ কলঅ। তে কলঅ, “স্ববনত্ মুই মঅ মুজুঙোত্ এক্কো আংগুর গাজ্ দেখ্যং। 10 সিবের্ তিন্নো ডেলা। সেই ডেলাগুনোত্ বোল্ পুড়িবার্ লগে লগে ফুল্ ফুদিলাক্ আর থুবোত্ আংগুর ধুরিনে পাগিলাক্। 11 ফরৌণর্ আংগুর-রস গলচ্চো সেক্কে ম-আদত এলঅ। মুই সেই আংগুরুন্ নিইনে রস নিগিলেনে সিয়েন ফরৌণ আদত্ দিলুং।” 12 যোষেফে তারে কলঅ, “ইয়েন্ অলঅ তঅ স্ববনর্ অত্তগান। তিন্নো ডেলা অত্ত তিন দিন। 13 এ তিন দিনো ভিদিরে ফরৌণে তরে ইয়োত্তুন্ নিগিলেই নিইনে পুরোণি কামত্ অদে অদে লাগেব। পানীয় দিয়্যে ইজেবে তুই আগ ধোক্ক্যেন গুরি আরঅ ফরৌণ আদত্ গলচ্চো তুলি দিবে। 14 মাত্তর্ গম দিনুনোত্ মঅ-কধা ভুলি ন-যেবে। ইয়েন বদলে ফরৌণ মুজুঙোত্ তুই মঅ কধা কবে, যেনে তর্ বলে মুই এ জেল্খানাত্তুন্ নিগিলি পারং। 15 ঘেচ্চেকগুরি কদ চেলে, ইব্রীয়গুনো দেজত্তুন্ মরে জোর্ গুরি ধুরি আনা ওইয়্যে, আর এ দেজত্ এইনেয়ো মুই এমন্ কিজু ন-গরং যিয়েনত্তে মরে এ গাদ্তোত্ আক্সো রাগা যায়।” 16 রুটি বানেইয়্যে নেতাবো যেক্কে দেগিলো, পানীয় ভাগ গুরিদিয়্যেবোর্ স্ববনর্ এক্কান্ গম্ অত্ত আঘে সেক্কে তে যোষেফরে কলঅ, “মুইয়ো এক্কান্ স্ববন্ দেক্কোং। মুই দেগিলুং মঅ মাদাবো উগুরে তিন খাড়াং মোয়দ্যের্ রুটি আঘে। 17 উগুরে খাড়াঙোত্ এলঅ ফরৌণত্তে নানান্ বাবোত্যে রুটি আর পিদে। মাত্তর্ পেক্কুনে এইনে মঅ মাঢাবো উগুরে সেই খাড়াঙোত্তুন্ হা ধুরিলাক্।” 18 জোবত্ যোষেফে কলঅ, “ইয়েন্ অলঅ তঅ স্ববনর্ অত্তগান। তিননো বস্তার্ অত্ত তিন দিন। 19 এই তিন দিনো ভিদিরে ফরৌণে তঅ মাদাবো কাবি নেযেইনে কিয়্যেগান্ গাজত্ টাঙেই রাগেব, আর পেক্কুনে এইনে তঅ কিয়্যেগানত্তুন্ যেরা খুদি খুদি হেবাক্।” 20 এই তিন্ দিনোত্ ফরৌণে তা তলেদি যে মানুচ্চুনে কাম্ গুরিদাক্ তারারে এক্কো হানা হাবেল। সেদিন্যে এলঅ তার্ জর্মদিন। ফরৌণে সেদিন্যে তার্ পানীয় ভাগগুরি দিয়্যেগুনোর নেতাবোরে আর রুটি বানেয়্যেগুনোর নেতাবোরে নিগিলেনে সে মানুচ্চুনো মুজুঙোত্ আনিলো। 21 তে তার্ পানীয় ভাগগুরি দিয়্যে নেতাবোরে তা পুরোণি কামানত্ চাগরি দিলো, আর সে পরেত্তুন্ ধুরি তে তা আদত্ গলচ্চো তুলি দিয়্যে ধুরিলো। 22 মাত্তর্ রুটি বানেইয়্যে নেতাবো কিয়্যেগান্ তে গাজত্ টাঙেই রাগেল। যোষেফে তারা স্ববনর্ অত্তগান্ যেবাবোত্যে কোইয়্যে তারা উগুরে সিয়েন ঘুদিলো। 23 মাত্তর্ যোষেফ কধাগান্ সে পানীয় ভাগ গুরিদিয়্যে নেতাবোর্ মনত্ ন-থেলঅ; তা কধাগান তে এক্কুবারে ভুলি গেলঅ। |
Copyright © 2021 Bangladesh Bible Society
Bangladesh Bible Society