পত্থম 37 - Chakma Bible

যোষেফ আর তা ভেইয়ুন

¹ যাকোবে কনান দেজত্ বজত্তি গরা ধুরিলো। তা বাবেয়ো সিধু বজত্তি গুরিদো।

² ইয়েন্‌ অলঅ যাকোব পরিবার হিত্যে। যোষেফে তা ভেইয়ুনো লগে ছাগল আর ভেড়া ছাগল ঝাক্ চোরেদ। তার্‌ এ ভেইয়ুন এলাক তার্‌ সাদাঙা মা বিল্‌হা আর সিল্পার পুয়ো। তা বয়জ্‌ছান যেক্কে সতর বজর্‌ সেক্কে তে তার্‌ এ ভেইয়ুনো বজং বেবহার কধানি তা বাবরে জানেল।

³ বুড়ো বয়জর্ পুয়ো বিলিনে যোষেফরে ইস্রায়েলে তা অন্য পুয়ো গুনোত্তুন্‌ বেজ্ কোচ্‌পেদ। তে তারে এক্কো আত্‌পুরো লাম্বা সুলুম্‌ বানেই দিলো।

⁴ ভেইয়ুনে যেক্কে বুঝিলাক, বাব্‌পো তারাত্তুন্‌ যোষেফরে বেজ্ কোচ্‌পায় সেক্কে তারা তারে ইংসে গরা ধুরিলাক্। তারা কনঅ কধা তাল্লোই গমে ডালে ন-কদাক্‌।

⁵ একদিনে যোষেফে এক্কান্‌ স্ববন দেগিলো। তে সে কধাগান্‌ তা ভেইয়ুনোরে কোইনে তারা তারে আরঅ বেজ্ ইংসে গরা ধুরিলাক্।

⁶ যোষেফে তারারে কলঅ, শুনো, মুই এক্কান্‌ স্ববন্‌ দেক্কোং।

⁷ মুই দেগিলুং, “আমি খেদত্‌ কাপ্যে শোজ্য আঢি বানির্; মাত্তর্‌ আমক্‌ অবার্‌ ইয়েন্‌, মঅ আঢিবো অজল ওই ঠিয়েল। সে পরেদি তমা আঢিগুন্‌ মঅ আঢিবোরে ঘিরি ঠিয়েইনে জু জু জানেলাক্।”

⁸ সেক্কে তা ভেইয়ুনে তারে কলাক্, “তুই কি ঘেচ্চেক্‌গুরি চিদে-গরর্‌ তুই রাজা অবে আর আমা উগুরে উগুম গুরিবে?” ইঙিরিনে তা স্ববনান্ আর তা কধাত্তে তা ভেইয়ুনে তারে আরঅ বেজ্ ইংসে গরা ধুরিলাক্।

⁹ ইয়েন পরেদি যোষেফে আরঅ এক্কান স্ববন দেগিলো আর তা ভেইয়ুনোরে জানেল। তে কলঅ, “চঅ, মুই আরঅ এক্কান্‌ স্ববন দেক্কোং। মুই দেগিলুং বেলান, চান্নো আর এগারোবো তারা মরে জু জু জানাদন্।”

¹⁰ এ স্ববন কধাগান তে তা বাবরে আর ভেইয়ুনো মুজুঙোত্ কনার্‌ পরেদি তা বাবে তারে গেইল্‌ দিইনে কলঅ, “তুই ইয়েন কি বাবোত্যে স্ববন দেগিলে? তঅ মা, ভেইয়ুনে আর মুই কি ঘেচ্চেক্‌গুরি এইনে তঅ মুজুঙোত মাদিত্‌ মাঢা নিগিরিনে জু জু জানেবং?”

¹¹ ইয়েন পরেদি যোষেফ উগুরে তা ভেইয়ুনো মনানি ইংসেই ভুরি উদের্, মাত্তর্‌ তা বাবে কধানি মনত্‌ গাদেই রাগেল, কাররে ন-কলঅ।

¹² পরেদি যোষেফ ভেইয়ুনে তারা বাব দিন্যে ছাগলুন্ আর ভেড়াগুন্‌ চোরেবাত্তে শিখিমোত্‌ গেলাক।

¹³ সেক্কে একদিন্যে ইস্রায়েলে যোষেফরে কলঅ, “তঅ ভেইয়ুনে শিখিমোত্‌ ছাগল আর ভেড়া ছাগল ঝাক্ চরাদন্। মুই চাং যেন তুই তারা ইধু যাচ্।” যোষেফে কলঅ, “ঠিগ আঘে, মুই যেম্।”

^14-15 ইস্রায়েলে তারে আরঅ কলঅ, “তঅ ভেইয়ুনে আর ছাগল-ভেড়াগুন কি অবস্থাই আগন্‌ তুই যেইনে সে হবরান্‌ আন।” ইয়েন্‌ কোইনে তে যোষেফরে হিব্রোণ কিঝিঙোত্তুন্‌ পাদেল। যোষেফে যেক্কে শিখিমোত্‌ যেইনে লুমিলোগোই সেক্কে এক্কো মানুচ্‌ তারে মাঢ ভিদিরে ঘুরোঘুরি গত্যে দেগিনে পুযোর্‌ গুরিলো, “তুই কি তগর্?”

¹⁶ যোষেফে কলঅ, “মুই মঅ ভেইয়ুনোরে তগাঙর্। তুই কি হবর্ পাচ্‌ তারা কুদু ছাগল আর ভেড়া ঝাক্ চরাদন্‌?”

¹⁷ মানুচ্চ্য কলঅ, তারা ইয়োত্তুন্‌ যেয়োন্দোই। মুই তারা কুয়ো কি গত্তে শুন্যং, আদঅ, আমি দোথনত্‌ যেই। সেক্কে যোষেফে তা ভেইয়ুনোরে তোগেবাত্তে দোথনত্‌ যেইনে তারাল্লোই দেগা অলঅ।

¹⁸ ভেইয়ুনে দূরোত্তুন্‌ যোষেফরে দেগিলাক্ আর তারা ইধু যেইনে লুমিবার আগেদি তারা তারে মারে ফেলেবার্‌ বুদ্ধি গুরিলাক্।

¹⁹ তারা একজন্‌ আরেকজনরে কলঅ, “উইয়োবো চঅ, স্ববন্‌-দেক্কেবো এজের্।

²⁰ এজঅ, ইক্কিনে আমি তারে মারে ফেলেইনে এক্কো গাদ ভিদিরে ফেলেই দিই। পরেদি আমি কবং, কনঅ ঝাড়্‌বো য়েমানে তারে হেই ফেলেয়্যে, আর সে পরেদি আমি দেগিবোং তা স্ববন দজাগান্‌ কি অয়।”

²¹ মাত্তর্‌ রূবেণে এ কধাগান্‌ শুনিনে তারা আদত্তুন্‌ তারে উদ্ধোর গুরিবার্‌ আজায় কলঅ, “তারে পরানে ন-মাজ্য।”

²² তে তারারে উবদেজ্‌ দিইনে কলঅ, “খুন-খারাবি গুরিবাত্তে ন-যেয়ো। তা কিয়্যেত্‌ আত্‌ নঅ তুলিনে বরং তারে এ ধূল্যেচর-চাগালার্ এ গাত্তো ভিদিরে ফেলেই দুয়ো।” পরেদি যোষেফরে তারা আদত্তুন্‌ উদ্ধোর্‌ গুরিনে বাবা আদত্‌ গোজেই দিবো মনে গুরিনে তে এ কধাগান্‌ কলঅ।

²³ যোষেফে তা ভেইয়ুনো মুজুঙোত্ এইনে লুমোনার্ লগে লগে তারা কারি নেযেইনে তা কিয়্যেত্তুন্‌ সে আত্‌পুরো লাম্বা সুলুম্মো খুলি নিলাক্।

²⁴ সে পরেদি তারা তারে ধুরিনে সে গাদ্‌তো ভিদিরে ফেলে দিলাক্। গাত্তোত্‌ কনঅ পানি ন-এলঅ, সিবে সুদো এলঅ।

যোষেফরে বিজি দিয়া অলঅ

²⁵ ইয়েন পরেদি যোষেফ ভেইয়ুনে হানা-বিনে হেবাত্তে বুয়োইনে দেগিলাক্ গিলয়দত্তুন্‌ একদল ইশ্মায়েলীয় বেবসা গুরিয়্যে এত্তন্। উদো পিদিত্‌ গুরি তারা তুম্‌বাচ্‌ মজলা, গুগ্‌গুলু আর গন্ধরসছোই মিসর দেজত্‌ যাদন্।

²⁶ সেক্কে যিহূদা তা ভেইয়ুনোরে কলঅ, “ধোজ্য, ভেইবোরে মারে ফেলেইনে আমি কধাগান্‌ লুগেলং। সেক্কে আমা লাভ্‌পান্‌ কি?

²⁷ সিবে দঅ আমা নিজো ভেই, আমার এক এড়া। সেনত্তে তারে আত্‌ ন-বাজেইনে বরং এজঅ, আমি তারে ইশ্মায়েলীগুনো ইধু বিজি দিই।” ভেইয়ুনে তা কধাগান্‌ মানিলাক্।

²⁸ সে মিদিয়নীয় বেবসায়ীগুনো মুজুঙোত এত্তে ন এত্তে ভেইয়ুনে যোষেফরে গাদত্তুন্‌ টানি তুলিলাক আর কুড়ি কত্তা রূবোলোই ইশ্মায়েলীগুনো ইধু তারে বিজি দিলাক্। সে বেবসায়ীগুনে যোষেফরে মিসরত্‌ নেযেলাক্।

^29-30 পরেদি রূবেণে সে গাত্তো ইধু যেইনে যোষেফরে ন-দেগিনে দুগে তা কাবড়ান ফাদি ফেলেইনে ভেইয়ুনো মুজুঙোত যেইনে কলঅ, “যোষেফে দঅ সে গাদ্‌তোত্‌ নেই। মুই ইক্কিনে কি গুরিম?”

³¹ তারা সেক্কে এক্কো ছাগল কাবিনে সে লুয়োগান্দোই যোষেফ সেই সুলুম্মো ভুরেলাক্।

³² পরেদি তারা সে সুলুম্মো তারা বাব্‌পো ইধু যেইনে কলাক্, “আমি ইবে পেইয়্যেই। তুই গমে ডালে চাহ্ সুলুম্মো কি তঅ পুয়োবোর্‌।”

³³ যাকোবে সুলুম্মো চিনি পারিনে কলঅ, “এ সুলুম্মো মঅ পুয়োবোর্‌। তারে কনঅ ঝাড়্‌বো য়েমানে হেইয়োন্। য়েমান্নো যে তারে কত্তা কত্তা গুরি শেজ্‌ গোজ্যে সিয়েন হামাক্কাই।”

³⁴ যাকোবে তা কাবড়ানি পাদিনে কমরত্‌ বস্তা পিনিনে তা পুয়োবোত্তে ভালোক্‌ দিন সং আবিলেচ্ গুরিলো।

³⁵ তার অন্য বেক্‌ পুয়ো-ঝি গুনে তারে বুঝেবার্‌ চেলাক্, মাত্তর্‌ কনঅ বুঝোনার কধা তে নঅ শুনিলো। তে কলঅ, “আবিলেচ্ গত্তে গত্তে মুই মরণ জাগাত্‌ মঅ পুয়োবো ইধু যেম।” এবাবোত্যেগুরি যাকোবে যোষেফত্যে কানিলো।

³⁶ ইন্দি মিদিয়নীয়গুনে যোষেফরে মিসরত্‌ নেযেইনে পোটীফর ইধু বিজি দিলাক্। পোটীফরে এলঅ ফরৌণর এক্কো চাগর, তা সৈন্যগুনোর্‌ বেগঅ নেতাবো।