পত্থম 36 - Chakma Bibleএষৌ বংশগুন 1 ইয়েন্ অলঅ এষৌর, অত্তাৎ ইদোম বংশগুনো কধা। 2 এষৌ কনানীয় মিলেরে লোইয়্যে। সেই মিলেগুন অলাক্ হিত্তীয় এলোনর্ ঝি আদা আর হিব্বীয় সিবিয়োনর নাদিন্, অত্তাৎ অনার ঝি অহলীবামা। 3 ইয়েন্ বাদেয়ো তে ইশ্মায়েলর ঝি, অত্তাৎ নবায়োত বোন বাসমতরেয়ো লোইয়্যে। 4 ইগুন ভিদিরে আদার পেদত্ ইলীফস আর বাসমতর্ পেদত্ রূয়েলর জর্ম ওইয়্যে; 5 আর অহলীবামার্ পেদত্ যিয়ূশ, যালম আর কোরহর জর্ম ওইয়্যে। কনান দেজত্ এষৌর এ বেক্ পুয়োগুনোর্ জর্ম ওইয়্যে। 6 পরে এষৌ তা মোক্কুনোরে, পুয়ো-ঝি গুনোরে আর ঘরর্ বেক্কুনোরে গোরু, ভেড়া, অন্য য়েমানুন্ আর কনান দেজত্ কামেয়ে বেক্ ধন-সোম্বোত্তিগানি লোইনে তা ভেই যাকোবত্তুন্ বোউত্ দূরোত্ আর এক্কান্ দেজত্ গেলঅ। 7 এষৌ আর যাকোবর য়েমান ধন এদক্ বেজ্ এলদে যে, তারার্ পক্ষে এক সমারে বজত্তি গরানা সম্ভব ন-অলঅ; তারা যিয়েনত্ এলাক সিয়েনত্ তারা দ্বিজনর্ য়েমান ঝাগকুন চোরেবাত্তে যগাজ্যে জাগা ন-এলঅ। 8 সেনত্তে এষৌ সেয়ীরো মুড়ো-মুড়ি চাগালাত্ যেইনে গমেডালে বজত্তি গরা ধুরিলো। এষৌর আর এক্কান্ নাঙ্ এলদে ইদোম। 9 ইয়েন অলঅ সেয়ীরো মুড়ো-মুড়ি চাগালাত্ ইদোমীয়গুনোর আগ মানুজ্ এষৌ বংশর কধা। 10 এষৌ পুয়োগুনোর্ নাঙানি ইলীফস আর রূয়েল। ইলীফসে আদার পুয়ো আর রূয়েলে বাসমত পুয়ো। 11 ইলীফস পুয়োগুন অলাক তৈমন, ওমার, সফো, গয়িতম আর কনস। 12 এষৌ পুয়ো ইলীফসর তিম্না নাঙে এক্কো লাঙনি এলঅ। তা পেদত্ অমালেকর জর্ম ওইয়্যে। ইগুন বেক্কুন এষৌর মোক্ আদার নাদিন্। 13 রূয়েল পুয়োগুন্ অলাক নহৎ, শম্ম আর মিসা। ইগুনে এষৌর মোক্ বাসমত নাদিন। 14 সিবিয়োন নাদিন্নোর, অত্তাৎ অনার ঝি অহলীবামা পুয়োগুন্ অলাক যিয়ূশ, যালম আর কোরহ। 15 এষৌর পুয়োগুনো ভিদিরে কয়েকজনে গুট্টির নেতা ওইয়োন। এষৌ দাঙর্ পুয়োবো ইলীফসর যে পুয়োগুন্ নেতা ওইয়োন্ তারা অলাক তৈমন, ওমার, সফো, কনস, 16 কোরহ, গয়িতম আর অমালেক। ইদোম দেজত্ তারা এলাক আদার পুয়ো ইলীফস বংশধর। 17 রূয়েলর যে পুয়োগুন্ গুট্টির্ নেতা ওইয়োন্ তারা অলাক নহৎ, সেরহ, শম্ম আর মিসা। ইগুনে এলাক এষৌর মোক্ বাসমত পুয়ো রূয়েল বংশধর। ইদোম দেজত্ তারা জর্ম ওইয়োন। 18 এষৌ মোক্ অহলীবামার্ যে পুয়োগুন গুট্টির নেতা ওইয়োন্ তারা অলাক যিয়ূশ, যালম আর কোরহ। ইগুনে অলাক্ অনার ঝি অহলীবামার্ পুয়ো। 19 ইগুনে এষৌর, অত্তাৎ ইদোম বংশ আর ভালোক্কুন্ গুট্টির্-নেতা। সেয়ীরো বংশগুনোর্ নাঙানি 20-21 হোরীয় সেয়ীর পুয়োগুনোর্ নাঙানি এলঅ লোটন, শোবল, শিবিয়োন, অনা, দিশোন, এৎসর আর দীশন। ইগুনে ইদোম দেজত্ বজত্তি গোজ্যন্। ইদোম দেজত্ সেয়ীরো এ বেক্ পুয়োগুন হোরীয় গুট্টির নেতা এলাক। 22 লোটন পুয়োগুনোর্ নাঙানি এলঅ হোরী আর হেমম। লোটন বোন্নো নাঙান্ তিম্না। 23 শোবল পুয়োগুনোর্ নাঙানি অল্বন, মানহৎ, এবল, শফো আর ওনম। 24 সিবিয়োনো পুয়োগুনোর্ নাঙানি এলঅ অয়া আর অনা। এ অনাই তা বাব সিবিয়োন গাধাগুন চোরেবাত্তে যেইনে ধূল্যেচর-চাগালা ভিদিরে গরম পানির উইপুদ্ চুগ্ পেয়েগোই। 25 অনার পুয়োবো নাঙান এলঅ দিশোন আর ঝিবোর্ নাঙান অহলীবামা। 26 দিশোন পুয়োবোর্ নাঙান এলঅ হিম্দন, ইশ্বোই, যিত্রণ আর করাণ। 27 এৎসর পুয়োগুনোর্ নাঙান এলঅ বিল্হন, সাবন আর আকন। 28 দীশন পুয়োগুনোর্ নাঙানি এলঅ ঊষ আর অরাণ। 29 হোরীয় সদ্দারুনোর্ নাঙানি এলঅ লোটন, শোবল, সিবিয়োন, অনা, 30 দিশোন, এৎসর আর দীশন। ইগুনে এলাক সেয়ীর, অত্তাৎ ইদোম দেজর হোরীয় জাদর ভালোক্কুন্ গুট্টির নেতা। ইদোম দেজর রাজাগুন্ 31 ইস্রায়েলীয়গুনো ভিদিরে রাজ্ সুদোম্ আরাম্ভ অবার্ আগেদি ইদোম দেজত্ যে রাজাগুনে রাজাগিরি গোজ্যন্ ইয়েন্ অলঅ তারার কধা: 32 বিয়োর পুয়ো বেলা ইদোম রাজা ওইয়্যে; তা রাজধানীর নাঙান এলঅ দিন্হাবা। 33 বেলা মুরি যানার পরেদি তা জাগানত্ বস্রা শঅর সেরহর পুয়ো যোববে রাজা ওইয়্যে। 34 যোববে মুরি যানার্ পরেদি তৈমনীয়গুনো দেজত্ হূশমে তা জাগানত্ রাজা ওইয়্যে। 35 হূশমে মুরি যানার্ পরেদি তা জাগানত্ বদদর্ পুয়ো হদদে রাজা ওইয়্যে। তে মোয়াব দেজ মিদিয়নীয়গুনোরে অদেই দিয়্যে। তা রাজধানীর নাঙান এলঅ অবীৎ। 36 হদদে মরানার পরেদি তা জাগানত্ মস্রেকা শঅরর্ সম্ল রাজা ওইয়্যে। 37 সম্ল মরানার পরেদি তা জাগানত্ সে চাগালার্ গাঙ পারর্ রহোবোৎ শঅরর্ শৌলে রাজা ওইয়্যে। 38 শৌলে মরানার পরেদি তা জাগানত্ অক্বোরর্ পুয়ো বাল্হাননে রাজা ওইয়্যে। 39 অক্বোরর্ পুয়ো বাল্হাননে মরানার্ পরেদি তা জাগানত্ হদরে রাজা ওইয়্যে। তা রাজধানীর নাঙান এলঅ পায়ূ, আর তা মোক্কো নাঙান এলঅ মহেটবেল। তে মট্রেদর্ ঝি আর মেষাহবর্ নাদিন্। 40 এষৌর যিদুক্কুন্ বংশর্ মানুচ্ নানান্ গুট্টি আর চাগালাত্ নেতা এলাক তারা নাঙানি অলঅ তিম্ন, অল্বা, যিথেৎ, 41 অহলীবামা, এলা, পীনোন, 42 কনস, তৈমন, মিব্সর, 43 মগ্দীয়েল আর ঈরম। ইগুনে এলাক্ ইদোমীয়গুনো পূরোণি মানুচ্ এষৌ বংশর মানুচ্ আর ইদোমীয় সদ্দার। দেজর্ যেদক্কানি চাগালাত্ তারা বজত্তি গুরিদাক্ তারা নাঙানি ধগে সে চাগালার্ নাঙানি দিয়া ওইয়্যে। |
Copyright © 2021 Bangladesh Bible Society
Bangladesh Bible Society