পত্থম 34 - Chakma Bibleদীণার হিত্যেবো 1-2 লেয়ার পেদত্ দীণা নাঙে যাকোবর্ যে মিলেবো জর্ম ওইয়্যে তে একদিন্ সিদুগোর্ মিলেগুনো লগে দেগা গুরিবাত্তে নিগিলিনে শিখিম নাঙে এক্কো মান্জ্য চোগোত্ পড়িলো। এ শিখিমে এলঅ হিব্বীয় জাদর সদ্দার্ হমোর পুয়ো। শিখিমে তারে ধুরি নেযেইনে বলেজোরে তা ইজ্জোত্ বর্বাত গুরি দিলো। 3 দীণা উগুরে তার অমকদ টান্ এলঅ। তে তারে কোচ্পেল আর তা মুজুঙোত কোচ্পানার কধা কলঅ। 4 পরেদি শিখিমে তা বাপ্পো হমোররে কলঅ, “এ মিলেবো লগে মর্ জড়া বানিবার যুক্কোল্ গরঅ।” 5 শিখিমে যে তাহ্ ঝি দীণার ইজ্জোত্তান বর্বাত গুরি দিয়্যে সে কধাগান যাকোব কানত্ গেল। মাত্তর্ তা পুয়োগুনে সেক্কে য়েমান ঝাক্কোই মাদত্ এলাক, সেনত্তে তারা ফিরি ন এজানা সং তে জুরো গুরি রলঅ। 6 শিখিমো বাব্পো হমোরে যাকোব লগে কধা কবাত্তে শঅরত্তুন্ নিগিলি এলঅ। 7 এ ভিদিরে কধাগান্ শুনিনে যাকোব পুয়োগুনে মাদত্তুন্ ফিরি এলাক। তারা যেবাবোত্যে মনত্ দুঘ্ পেলাক্ সেবাবোত্যে অমকদ রাগঅ অলাক্, কিত্তে যাকোব ঝিবোর্ ইজ্জোত্তান বর্বাত্ গুরি দিইনে শিখিমে ইস্রায়েল উগুরে এক্কান্ অগমান কাম্ গোজ্যে, যিয়েন্ গোজ্যে সিয়েনর কনঅ উচিত্ ন এলঅ। 8 মাত্তর্ হমোরে যাকোব আর তা পুয়ো-গুনোরে কলঅ, “তঅ ঝিবো উগুরে মঅ পুয়োবোর্ পরানর্ টান আঘে। মঅ পুয়োবো লগে তঅ ঝিবো বৌ দে। 9 আমা লগে তুমি বৌ দেদি সুদোমান আরম্ভ গরঅ। তমা মিলেগুন আমারে দুয়ো আর আমা মিলেগুন তুমি নেযঅ। 10 তুমি আমা ভিদিরে বজত্তি গরঅ। গদা দেজ্ছান দঅ তমা মুজুঙোত্ পড়ি আঘে। তুমি ইধু থাগঅ, হুজি মনে আদা-উদো গরঅ আর ধন-সোম্বোত্তির্ গিরোজ্ অ।” 11 ইয়েন্ বাদে শিখিমেয়ো মিলেবোর্ বাপ্পো আর ভেইয়ুনোরে কলঅ, “মঅ উগুরে যুদি তমার্ দোয়্যে অয়্, সালে তুমি মঅ মুজুঙোত যিয়েন্ চঅ মুই সিয়েন দিম। 12 এ মেলাগানত্ ধাবা আর বক্শিজ্ ইজেবে তুমি যা দাবি গুরিবা মুই সিয়েনি দিম্। তুমি বানা মিলেবো মত্তে বৌ দুয়ো।” 13-14 শিখিমে তারার্ বোন দীণার ইজ্জোত্তান বর্বাত্ গোজ্যে বিলি যাকোব পুয়োগুনে তারে আর তা বাপ্পো হমোররে চালাগি গুরি এ জোবপান্ দিলাক্, “আমি এ কামান্ গুরি নঅ পারিই। যিবের চুনু গুলোবোর্ মাদাগান কাবা ন-অয়্ এবাবোত্যে কার লগে আমা বোন্নোর্ জড়া বানি দেনা আমা পক্ষত্তুন্ অমকদ অসর্মান কাম। 15 মাত্তর্ এক্কান্ কাম্ গুরিলে আমি সিয়েনত্ রাজি ওই পারিই। সিয়েন্ অলঅ, তমা বেক্ মরত্তুনোরে চুনু গুলোবোর্ মাদাগুন কাবি দিইনে আমা ধোক্ক্যেন ওয়া পুড়িবো। 16 সালে আমা মিলেগুন তমারে দিবোং আর তমা মিলেগুনোরে আমি নিবোং; আর আমি তমা লগে এক জাদ্ ওইনে বজত্তি গুরিবোং। 17 মাত্তর্ যুদি তুমি আমা কধা ন শুনো আর চুনু গুলো মাদাগুন কাবানা ন-মান, সালে আমা মিলেবো নেযেইনে আমি ইয়োত্তুন্ যেবংগোই।” 18 তারার্ এ কধাগান্দোই হমোর আর তা পুয়ো শিখিমে হুজি অলাক। 19 পরিবার ভিদিরে বেগত্তুন্ সর্মানী মানুচ্ শিখিমে আর্ দেরি ন-গুরিনে কধাগান্ মানি নেযেল, কিত্তে যাকোব ঝিবো উগুরে তার্ জদবদে টান্ এলঅ। 20 সেনত্তে শঅর গেদো দোরান ইধু যেইনে হমোরে আর তা পুয়ো শিখিমে সিদুগো মানুচ্চুনোরে কলাক্, 21 “এ মানুচ্চুন্ আমা সমাজ্যে। আমা দেজত্ তারার্ থেবাত্তে বোউত্ জাগায়ো আঘে। তারা ইধু থাদোক্ আর হুজি মনে যিন্দি-সিন্দি বেড়াদোক্। এজঅ, আমি তারা মিলেগুন্ লোই আর আমা মিলেগুন তারারে দিই। 22 বানা এক্কান্ কাম্ গুরিলে তারা আমা লগে বজত্তি গুরিনে এক জাদ্ অবার্ রাজী আগন্। সিয়েন্ অলঅ, তারা ধোক্ক্যেন আমা মরত্তুনোর চুনুগুলো গুনোর্ মাদাগুন কাবা পুরিবো। 23 তারার্ গোরু ভেড়া, সয়-সোম্বোত্তি আর বেক্ য়েমান ঝাক্ আমা ভিদিরে থেবঅ। সেনত্তে এজঅ, আমি তারা কধানি রাজি ওই। সালে তারা আমা লগে বজত্তি গুরিবাক।” 24 সেক্কে শঅর মরদ্ পুয়োগুনে বেক্কুনে হমোর আর তা পুয়ো শিখিমো কধালোই রাজি অলাক, আর তারা বেক্কুনে চুনুগুলো গুনোর্ মাদাগুন কাবিলাক্। 25 ইয়েন তিন দিনোত্ যেক্কে মরত্তুনে বেজ্ পিড়েলোই দুখ্ পাদন্ সেক্কে দীণার নিজোর্ ভেই, অত্তাৎ যাকোবর্ দ্বিবে পুয়ো শিমিয়োন আর লেবি তলোয়ারলোই শঅরত্ সোমেইনে বেক্ মরত্তুনোরে মারে ফেলেলাক্। এবাবোত্যে কিজু অবঅ বিলি শঅর কারঅ মনত্ কনঅ সন্দেহ ন-এলঅ। 26 তারা হমোর আর তা পুয়োবোরেয়ো মারে ফেলেলাক্ আর শিখিম ঘরত্তুন্ দীণারেয়ো আনিলাক্। 27 যে শঅরত্ তারা বোন্নোর্ ইজ্জোত্তান বর্বাত্ গুরি দিয়্যে ওইয়্যে যাকোবর্ অন্য পুয়োগুনে সিদু সোমেইনে মরাগুন দেগিলাক্ আর শঅরান্ লুদেলাক্। 28 শঅর ভিদিরে আর বারেদি মানুচ্চুনোর যিদক্কুন্ গোরু ভেড়া আর গাধা এলাক তারা সিগুনো নেযেলাক্ 29 তারা সিগুনোর্ বেক্ ধন-সোম্বোত্তিগানি আর তারা পুয়ো-ঝি আর তারা মোক্কুনোরে লুদেই আনিলাক্; এন্ কি, তারা ঘর ভিদিরে যিয়েনি এলঅ সিয়েনিয়ো বাদ্ ন-পড়িলো। 30 যাকোবে পরেদি শিমিয়োন্ আর লেবিরে কলঅ, “তুমি এ দেজ মানুচ্চুনো মুজুঙোত, বিশেজ্ গুরি কনানীয় আর পরিষীয়গুনো মুজুঙোত্ জগন্য কাম্ গুরিনে দজাদ্ ফেলেয়্য। মঅ মানুচ্চুনে জনেদি কম। তারা এগত্তর্ ওইনে মরে হাম্লা গুরিবাক্, আর সেক্কে পরিবার্ সুমুত্তো মুই মুরি যেম্।” 31 সেক্কে শিমিয়োন্ আর লেবি কলাক্, “মাত্তর্ আমা বোন্নোরে কি কারঅ বেশ্যে বিলি মনে- গরানা উচিত?” |
Copyright © 2021 Bangladesh Bible Society
Bangladesh Bible Society