পত্থম 32 - Chakma Bibleএষৌ ইধু যাকোবে 1 যাকোবেয়ো তা পধেদি যাহ্ ধুরিলো। পধথ্ এক্কান জাগাত্ তে গোজেনর্ দূত্তুনোরে দেগিলো। 2 তারারে দেগিনে তে কলঅ, “ইয়েন্ গোজেনর্ ঘর্।” ইয়েনত্তে তে সেই জাগায়ান নাঙান রাগেল মহনয়িম (যিয়েনর্ ভেদ্তান্ “দ্বিয়েন ঘর”)। 3 যাকোবে তা আগে আগে সেয়ীর, অত্তাৎ ইদোম দেজত্ তার্ ভেই এষৌ ইধু কয়েক্কো মানুচ্ পাদেল। 4 তে তারারে কোই দিলো যেন তারা তার্ গিরোজ্ এষৌরে জানেই দুয়োন, তা চাগর্ যাকোবে কোইয়্যেদে, “মুই এদক বিলোন লাবন ইধু এলুং। 5 মর্ গোরু-গাধা, ছাগল-ভেড়া আর চাগর্-চাগরানী বেক্কুন আঘে। মঅ গিরোজ্সো ইধু দোয়্যে পেম্ এ আজা গুরিনে মুই আগেত্তুন্ ধুরি তরে হবর্ দোঙর্।” 6 মানুচ্চুনে ফিরি এইনে যাকোবরে কলাক্, “আমি তঅ ভেই এষৌ মুজুঙোত্ যেইয়্যেই। তে ইক্কুনি চের্শঅ মানুচ্ নিনেই তঅ লগে দেগা গুরিবাত্তে এজের্।” 7 এ কধাগান্ শুনি অমকদ দোরেইনে যাকোব মনান চুলুবুল্যা ওই উদিলো। তে তা সমারে মানুচ্চুন, ছাগল-ভেড়া, গোরু-গাধা আর উট্টুন্ দ্বিবে দলত্ ভাগ্ গুরিলো। 8 তে ভাবিলো, এষৌ যুদি এইনে এক দলরে হামলা গরে সালে অন্য দল্লো ধেই যেই পারিবো। 9 যাকোবে গোজেন ইধু ইয়েন কোইনে তবনা গুরিলো, ও লগেপ্রভু, মর্ আগ মানুচ্ অব্রাহামর গোজেন, মর্ বাপ্পো ইস্হাকর্ গোজেন, তুয়ই দঅ মরে কোইয়োচ্ মঅ দেজত্, মর্ নিজো মানুচ্চুনো ইধু ফিরি যেবাত্তে, আর সিধু তুই মরে ভালেদ্ গুরিবে। 10 তর্ এ চাগর্বোরে তুই যে দোয়্যে আর বিশ্বেজ্ দেগেয়োচ্ মুই তার যগাজ্যে নয়। বানা এক্কো লুদিক্ আদত্ নিইনে মুই এ যর্দন গাঙান্ পার্ ওইয়োং, মাত্তর্ ইক্কুনি মঅ সমারে আঘন্ দ্বিবে দাঙর্ দল। 11 মুই কোজোলী গরং, মর্ ভেই এষৌ আদত্তুন্ তুই মরে রোক্ষ্যে গর। মর্ দর্ লাগেত্তে তে এইনে আমারে মারে ফেলেব, মা-চিগোন্ গুরঅ কাররে বাদ্ ন-দিবো। 12 মাত্তর্ তুই দঅ কোইয়োচ্, মুই হামাক্কায়্ তরে ভালেদ্ গুরিম আর তঅ বংশর্ মানুচ্চুনোরে সাগর পার ধুল্যেচর ধোক্ক্যেন গুরিম্ যিগুন্ গুণিনে শেজ্ গরা ন-যায়। 13 যাকোবে সে রেদোত্ সিদু কাদেল। তার যিয়েনি এলঅ সিয়েনি ভিদিরেত্তুন্ তে তার্ ভেই এষৌত্তে এক্কান্ বোক্শিজ্ ঠিগ্ গুরি রাগেল। 14-15 সিয়েন্ অলঅ, দ্বিশ পাদি ছাগল আর কুড়িবো পাদা ছাগল, দ্বিশ পাদি ভেড়া আর কুড়িবো পাদা ভেড়া, ছঅ সুদ্ধো ত্রিশ্সো দুধ্বলা উট, চোল্লিশ্সো পারি গোরু আর দোশ্সো ঢামাড়া, কুড়িবো গাধী আর দোশ্সো গাধা। 16 সিগুনোরে ভালোক দলত্ ভাগ্ গুরিনে চাগরুনো আদত্ দিইনে তে তারারে কোই দিলো, “পত্তি দল শেজত্ কিজু জাগা থোইনে তুমি মঅ আগে আগে যঅ।” 17 পত্তম দলর্ চাগরবোরে তে উগুম্ দিইনে কলঅ, মর্ ভেই এষৌ লগে দেগা অলে তে যেক্কে পুযোর্ গুরিবো, কুদু যর্? তুই কার মানুচ্? তমা মুজুঙোত্ সেই য়েমানুন্ কার্? 18 সেক্কে তুই কবে, ইগুন্ তঅ চাগর্ যাকোবর্। তে মঅ গিরোজ্ এষৌত্তে এ বোক্শিজ্ছানি পাদেয়্যে, আর তে আমা পিজেদি আঘে। 19 এবাবোত্যেগুরি তে দ্বিপল্লা, তিন পল্লা আর অন্য যে চাগরুনে য়েমান ঝাক্ লোই যাদন্ তারারে বেক্কুনোরে উগুম্ দিলো, এষৌ লগে দেগা অলে তুমিয়ো ঠিগ্ এ কধাগান্ কবা। 20 আর যেরেদি কবা, “তঅ চাগর্ যাকোবে আমা পিজেদি আঘে।” যাকোবে মনে মনে এ চিন্তেগান গরের্, “মর্ আগে আগে যে বক্শিজচানি যার্ সিয়েনিলোই মুই তারে বুঝেই দিম। তা পরেদি যেক্কে তা সমারে মর্ দেগা অবঅ সেক্কে মরে মানি লদে অয়ত তার্ কন আবিত্তি ন-থেবঅ।” 21 সেনত্তে বক্শিজো জিনিস্ছানি তা আগেদি গেলঅ, মাত্তর্ সে রেত্তো তে সিধু কাদেল। যাকোব লগে যুদ্ধো 22 সেই রেদোত্ যাকোবে উদিনে তার্ দ্বিবে মোক্, দ্বিবে চাগরানী আর এগারবো পুয়োরে আঢি আঢি পার্ উয়ো যায়্ এবাবোত্ত্যে এক্কান্ জাগাইন্দি যব্বোক গাঙ উইপারত্ থোই এলগোই। 23 তার্ আর যিয়েনি এলঅ সিয়েনি বেক্কানিয়ো তারা লগে পাদেই দিলো। 24 সেক্কে যাকোবে গায়্ গায়্ থেই গেলঅ। সেক্কে এক্কো মানুচ্ এইনে বেন্যে পহ্র ন-অনা সং তা লগে আঢ্তোই যুদ্ধো গুরিলো। 25 সে মানুচ্চো যেক্কে দেগিলো, তে যাকোবরে ওদেই দি ন-পারের্ সেক্কে আঢ্তোই যুদ্ধো গুরিবার অক্তত্ তে যাকোব রান জোড়াত্ আঘাত্ গুরি দিলো। সেক্কে তা রান আড়্বো অধ জাগাত্তুন্ লুরিলো। 26 সেক্কে সে মানুচ্চো কলঅ, “বেন্যে পহ্র ওই এজের্, এবেরা মরে ইরি দুয়ো।” যাকোবে কলঅ, “মরে বর্ ন-দেনা সং মুই তরে ন-ছাড়িম।” 27 মানুচ্চো কলঅ, “তঅ নাঙান্ কি?” তে কলঅ, “মঅ নাঙান্ যাকোব।” 28 মানুচ্চো কলঅ, “তুই গোজেন আর মান্জ্য লগে যুদ্ধো গুরিনে জিত্যস্ বিলিনে তঅ নাঙান আর্ যাকোব ন-থেবঅ, তঅ নাঙান অবঅ ইস্রায়েল (যিয়েনর্ ভেদ্তান্ ‘যিবে গোজেন লগে যুদ্ধো গরে’)।” 29 যাকোবে তারে কলঅ, “কোজোলী গরং, তুই কঅ তঅ নাঙান্ কি?” তে কলঅ, “তুই মঅ নাঙান্ কিত্তে পুযোর্ গরর্?” এ কধাগান কোইনে তে যাকোবরে বর্ দিলো। 30 সেক্কে যাকোবে সে জাগান নাঙান রাগেল পনূয়েল (যিয়েনর্ ভেদ্তান্ “গোজেন মু”)। তে কলঅ, “মুই গোজেনরে মুজুঙো-মুজুঙি দেগিনেয়ো বাঁজি আগং।” 31 যাকোবে যেক্কে পনূয়েলত্তুন্ যাহ্ ধুরিলো সেক্কে বেলান উদি যেইয়্যে। তা উলুহুল্লো অবস্থাগান্দোই তে লেঙা ধোজ্যে। 32 ইয়েনত্তে ইস্রায়েলীগুনে এজঅ রান জোড়া উগুরে য়েরাগান্ ন-হান্, কিত্তে রান জোড়া উগুরে যাকোবরে আঘাত গরা ওইয়্যে। |
Copyright © 2021 Bangladesh Bible Society
Bangladesh Bible Society