পত্থম 21 - Chakma Bibleইস্হাকর জর্ম 1 লগেপ্রভু তা কধা মজিম্ সারা ইন্দি মনযোগ দিলো আর তে তাত্তে যিয়েনি গুরিবো বিলি এগেম্ গোজ্যে সিয়েনি গুরিলো। 2 সেক্কে সারা পিদিলী অলঅ। অব্রাহামর বুড়ো বয়জত্ সারা পেদত্ তা পুয়োবোর্ জর্ম অলঅ। গোজেনে যে অক্তবো কধা কোইয়্যে সে অক্তবোত্ তার জর্ম অলঅ। 3 অব্রাহামে সারা পেদত্ এ পুয়োবো নাঙান্ রাগেল ইসহাক। 4 গোজেন উগুম্ মজিম্ অব্রাহামে আস্টো দিনোত্ তা পুয়ো ইসহাকরে চুনুগুলোবোর্ মাঢাগান্ কাবা বাজেই দিলো। 5 অব্রাহাম বয়জ্ যেক্কে একশঅ বজর্ সেক্কে তা পুয়ো ইস্হাকর জর্ম অলঅ। 6 সারা কলঅ, “গোজেনে মর্ মুয়োনত্ আজি ফুদেই দিলো, আর সে কধাগান শুনিনে অন্যগুনো মুয়োদ্অ আজি ফুদিবো।” 7 তে আরঅ কলঅ, “সারা যে গুরোবোরে বুগো দুধ্ হাবেব এ কধাগান ইয়েন আগেদি কন্না অব্রাহামরে কোই পারিদো? অদচ তার এ বুড়ো বয়জত্ তা গুরবো মঅ করত্ এলঅ।” হাগার আর ইশ্মায়েলরে নিগিলেই দেনা 8 ইস্হাকে দাঙর্ অনার পরেদি যেদিন্যে তারে মাবো দুধ ছাড়ি দিয়া অলঅ সেদিন্যে অব্রাহামে এক্কান দাঙর্ হানা দিলো। 9 সারা দেগিলোদে, মিশরীয় হাগার পেদত্ অব্রাহামর যে গুরোবো জর্মেয়্যে তে ইস্হাকরে নিইনে তামাজা গরের্। 10 এ অবস্থা দেগিনে তে অব্রাহামরে কলঅ, “পুয়োবো সুমুত্তো সে চাগরানীবোরে নিগিলেই দুয়ো, কিত্তে সে পুয়োবো মঅ পুয়ো ইস্হাক লগে ধন-সোম্বোত্তির গিরোজ্ ওই ন-পারিবো।” 11 চিগোন চিজি ইশ্মায়েলর এ বেপারান্দোই অব্রাহাম মনর্ অবস্থা অমকদ ভাঙি পুড়িলো । 12 মাত্তর্ গোজেনে তারে কলঅ, “তঅ চাগরানী আর তা পুয়োবোর কধা ভাবিনে তুই মনান খারাব্ ন-গুরিচ্। সারা তরে যিয়েন্ কোইয়্যে তুই সিয়েনই গর্, কিত্তে ইস্হাক বংশবো তর্ বংশ বিলিনে ধরা অবঅ। 13 মাত্তর্ সেই চাগরানীবো পুয়োবোরে দিইনেয়ো মুই এক্কো জাদরে তুলিম, কিত্তে তেয়ো দঅ তর্ পুয়ো।” 14 সেক্কে অব্রাহামে বেন্যেপোত্যে উদিনে কিজু হানা আর পানি ভোজ্যে এক্কো চাম থৈল্যে হাগার করত্ তুলি দিলো। সে পরেদি পুয়োবোরে তা আদত্ দিইনে তারে বিদেয়্ গুরি দিলো। সিয়েনত্তুন্ নিগিলেনে হাগারে বের্-শেবার ধূল্যেচর ভূইয়ো-চাগালাত্ ঘুরি ঘুরি থেলঅ। 15 থৈল্যেবো পানিগান যেক্কে ফুরেল সেক্কে সেই পুয়োবোরে এক্কো ঝুবোত্ তলে ঘুমোত্ পোড়েল। 16 সে পরেদি এক্কো শেল্ মারিলে যিদ্দুরোত্ যায় আন্দাজ গুরি তে সিদ্দুর্ দুরোত্ যেইনে রলঅ। “পুয়োবো মরণান যেনে মত্তুন্ দেগা ন-পড়ে,” মনে মনে এ কধাগান কোই কোই সিয়েনত্ বোইনে তে গুজুরি গুজুরি কানা ধুরিলো। 17 মাত্তর্ পুয়োবোর্ কানানিগান গোজেন কানত্ যেইনে লুমিলোগোই। সেক্কে গোজেন দূত্তো স্বর্গত্তুন্ হাগাররে ডাগিনে কলঅ, “হাগার, তর্ কি ওইয়্যে? ন-দোরেচ্, কিত্তে পুয়োবো যিয়েনত্ আঘে সিয়েনত্তুন্ তা কানানিগান গোজেন কানত্ যেইনে লুম্মেগোই। 18 তুই উদিনে পুয়োবোরে তুলিতালাই জুরো গর্, কিত্তে মুই তারে দিইনে এক্কো দাঙর্ জাদ্ বানেম্।” 19 সে পরেদি গোজেনে হাগার চোখ্কুন্ খুলি দিলো, সেক্কে তে এক্কো পানিলোই ভোজ্যে কুয়ো দেগিলো। সে কূয়োবো ইধু যেইনে তে তার্ চাম থৈল্যেবো ভুরি নেযেনে পুয়োবোরে পানি হাবেল। 20 গোজেনে সেই পুয়োবোরে দেগাশুনো গরা ধুরিলো, আর তে দাঙর্ ওয়া ধুরিলো । তে ধূল্যেচর-চাগালাত্ বজত্তি গুরিদো আর শেল্-ধনু মারানা কামত্ কাবিল্ ওই উদিলো। 21 পারণ নাঙে এক্কান ধূল্যেচর-চাগালাত্ তে বজত্তি গরা ধুরিলো। মিসর দেজ এক্কো মিলে লগে তা মাবো তারে মেলা গুরি দিলো। অব্রাহাম আর অবীমেলকর চুক্তি 22 সে অক্তত্ অবীমেলক আর তার বেগঅ দাঙর্ সেনাপতি ফীখোলে অব্রাহাম ইধু এইনে কলঅ, “দেগা যাত্তে, তর্ বেক্ কামানির ভিদিরেদি গোজেনে তঅ সমারে আঘে। 23 সেনত্তে গোজেন নাঙে তুই ইক্কিনে মইধু এ শমত্তান্ গর্, মঅ লগে বা মঅ পুয়োগুনোর্ লগে, মঅ বংশধরুনোর্ কারর লগে তুই কনঅ ছলনার কাম্ ন গুরিবে। মুই যে বাবোত্যে গুরি তঅ লগে বিশ্বেজ্ গুরিনে বেবহার গোজ্যং, ঠিগ্ সেবাবোত্যে গুরি তুয়ো মঅ লগে আর যে দেজত্ তুই্ বিদেশী ওইনে বজত্তি গরর্ সে দেজ মানুচ্চুনো লগে গমেডালে বেবহার গুরিবে।” 24 অব্রাহামে কলঅ, ঠিগ্ আঘে, মুই শমত্ গরঙর্। 25 মাত্তর্ তে এক্কো কূয়ো পৌইদ্যেনে নালিজ্ গুরিনে অবীমেলকরে কলঅ, তা চাগরুনে সিবে জোর্ গুরিনে তা মুজুঙোত্তুন্ কারি নেযেয়োন। 26 জোবত্ অবীমেলকে কলঅ, “এ কামান্ কন্না গোজ্যে সিয়েন্ দঅ মুই হবর্ ন-পাং। আগেদি দঅ তুই এ কধাগান মরে ন-কচ্। এচ্চ্যে মুই এ কধাগান শুনিলুং।” 27 সে পরেদি অব্রাহামে কয়েক্কো ভেড়া আর গোরু আনিনে অবীমেলকরে দিলো আর তারা দ্বিজনে এক্কান চুক্তি গুরিলাক্। 28 পরেদি অব্রাহামে তা ভেড়া পালত্তুন্ সাত্তো পাদি ভেড়া ছঅ যুদো গুরি নিলো। 29 ইয়েন্ দেগিনে অবীমেলকে তারে পুযোর্ গুরিলো, “বেপারান্ কি? এ সাত্তো যুদো গোজ্যে পাদিভেড়া ছঅ অত্তগান কি?” 30 অব্রাহামে কলঅ, “তুই ইগুনোরে গুজি-লঅ। এ কূয়োবো যে মুই খুজ্যং ইগুন্ তার্ প্রমাণ।” 31 সেনত্তে সে জাগাগান নাঙান্ অলঅ বের্-শেবা (যিয়েনর ভেদ্তান্ “শমত্ গোজ্যে কূয়ো”), কিত্তে ইয়োদোই তারা দ্বিজনে শমত্ খেইয়োন্। 32 বের্-শেবাত্ এ চুক্তিবো গরানার পরেদি অবীমেলক আর তার বেগদাঙর্ সেনাপতি ফীখোলে তারা দেজত্, অত্তাৎ পলেষ্টীয়গুনো দেজত্ ফিরি গেলাক্। 33 অব্রাহাম বের্-শেবাত্ লগেপ্রভুরে, অত্তাৎ যিবের আরাম্ভ আর থুম্ নেই সে গোজেনরে তা যগাজ্যে সর্মান্ দিলাক্। তে সিয়েনত্ এক্কো ঝাউ গাজ্ লাগেল। 34 অব্রাহামে পলেষ্টীয়গুনো দেজত্ বেশ্ কয়েক বজর্ বজত্তি গুরিলো। |
Copyright © 2021 Bangladesh Bible Society
Bangladesh Bible Society