পত্থম 20 - Chakma Bible

অব্রাহাম আর রাজা অবীমেলক

¹ পরেদি অব্রাহামে মম্রিত্তুন্‌ নেগেভ নাঙে দোগিণে ধূল্যেচর-চাগালা মোক্ক্যেন্দি গেলঅ। সিয়েনত্‌ তে কাদেশ শঅর আর শূরর সংমোধ্যে এক্কান জাগাত্‌ বজত্তি গরা ধুরিলো। সিয়েনত্তুন্‌ তে কয়েক দিনোত্তে গরার শঅরত্‌ যেইনে থেলঅ।

² সিদু তে তার্ মোক্‌ সারারে আরঅ নিজোর্‌ বোন বিলিনে চিনেই দিলো। সেনত্তে সিদুগোর রাজাবো অবীমেলকে মানুচ্‌ পাদেইনে সারারে তাইধু নেযেল।

³ মাত্তর্‌ রেদোত্‌ গোজেনে অবীমেলকরে স্ববনত্‌ দেগা দিইনে কলঅ, “যে মিলেবোরে তুই আন্ন্যস্‌, তার নেক্‌ আঘে। তারে আনানার্ কারনে তুই মরণান ডাগি আন্ন্যচ্‌।”

⁴ মাত্তর্‌ অবীমেলকে সেক্কেয়ো সারা ইধু ন-যায়; সেনত্তে জোবত্‌ তে কলঅ, “প্রভু, দুযি ন-অলেয়ো কি এক্কো জাদরে তুই ভস্ত গুরি ফেলেবে?

⁵ সে মানুচ্চো দঅ নিজেই মরে কোইয়্যে, সিবে তার বোন, আর সে মিলেবোয়ো কলঅ, সিবে তার্ ভেই। মুই সরল মনে এ কামান গোজ্যং; সিয়েনবাদে বারেন্দিয়ো মঅ বেবহার ভিদিরে কনঅ দুজ্ ন-এলঅ।”

⁶ গোজেনে স্ববনত্ তারে কলঅ, “অয়, মুই হবর্ পাং তুই সরল মনে এ কামান গোজ্যস্। মুই তরে সেনত্তে তা কিয়্যেনত্‌ বাঁজিবাত্তে ন-দুয়োং আর মঅ বিরুদ্ধে পাপ কামত্তুন্‌ তরে দোঙেই রাগেয়োং।

⁷ ইক্কিনে তুই তারে তা নেক্কো ইধু ফিরেই দে। মানুচ্চো এক্কো ভাববাদী। তে তত্তেই তবনা গুরিবো, আর সেক্কে তঅ পরাণান্‌ রোক্ষ্যে পেবঅ। মাত্তর্‌ যুদি তারে ফিরেই ন-দুয়োচ্‌, সালে মনত্ রাগেচ্‌, তুই আর তঅ মানুচ্চুনে মরন আঢত্তুন্‌ রেহাই ন-পেবাক্।”

⁸ সেক্কে অবীমেলকে বেন্যেপোত্যে উদিনে তা অধীনোত্‌ যিগুনে কাম গরন্‌ তারারে বেক্কুনোরে ডাগিনে বেক্কানি জানেল। এ কধানি শুনিনে তা মানুচ্চুনে অমকদ দোরেলাক্‌।

⁹ সেক্কে অবীমেলকে অব্রাহামরে ডাগিনে কলঅ, তুই আমা লগে ইয়েন্‌ কেধোক্ক্যেন বেবহার গুরিলে? মুই তইধু কি দুজ্‌ গোজ্যং, তুই মরে আর মঅ রেজ্যগানরে এদক্‌ পাপত্‌ ফেলেয়োচ্‌? এধোক্ক্যেন বেবহার গরানা তর্‌ উচিত্‌ ন এলঅ।

¹⁰ অবীমেলকে আরঅ কলঅ, “তুই কি মনে গুরিনে এ কামান্‌ গুরিলে?”

¹¹ জোবত্‌ অব্রাহামে কলঅ, “মুই ভাবি চেয়োং, এ জাগানর্‌ মানুচ্চুনোর গোজেন-দর্‌ বিলিনে কনঅ কিচ্ছু নেই। সেনত্তে মঅ মোক্কোরে পেবাত্তে তারা অয়্‌ত মরে মারে ফেলেবাক্।

¹² সিয়েন্‌ বাদেয়ো তে মর্‌ বোনঅ অয়্‌, মাত্তর্‌ মা যুদো অলেয়ো আমি দ্বিজনে এক্কো বাবঅ ঝি-পুয়ো, যুদিয়ো ইক্কিনে তে মর্‌ মোক্‌।

¹³ গোজেনে যেক্কে মরে মঅ বাবঅ ঘরত্তুন্‌ নিগিলে আনিলো সেক্কে মুই মঅ মোক্কোরে কোইয়োং, তুই যে মরে কোচ্‌পাজ্‌ সিয়েন এবাবোত্যেগুরি দেগেচ্‌। আমি যিয়েনত্‌ যেদং চাত্‌, তুই মরে তঅ ভেই বিলিনে চিনেই দিজ্‌।”

¹⁴ ইয়েন পরেদি অবীমেলকে কয়েক্কো ভেড়া, গোরু আর চাগর-চাগরানী অব্রাহামরে দিলো, আর সে লগে তা মোক্‌ সারারেয়ো তাইধু ফিরেই দিলো।

¹⁵ পরেদি তে অব্রাহামরে কলঅ, “চাহ্, মর্‌ পুরো দেজ্‌ছান দঅ তঅ মুজুঙোত্‌ আঘে। তর্‌ যিয়েনত্‌ হুজি সিয়েনত্‌ তুই বজত্তি গুরিচ্‌।”

¹⁶ সে পরেদি তে সারারে কলঅ, “চাহ্, মুই তঅ উগুরে যে অন্যেয় গোজ্যং সিয়েন্‌ তর্‌ মানুচ্চুনো ইধু যেনে গুমোর্ থায় সেনত্তে তঅ ভেইবোরে এক আজার্‌ রুবো কত্তা দোঙর্‌। ইয়েন্দোই বেক্কুনো মুজুঙোত্‌ ফগদাঙ্‌ অবদে, তুই কনঅ দুজ্ ন-গরচ্‌।”

¹⁷ ইয়েন পরেদি অব্রাহামে গোজেন ইধু তবনা গুরিলো। সেক্কে গোজেনে অবীমেলকরে, তা মোক্ আর তার অন্য মিলেগুনোরে গম্‌ গুরিলো। সেক্কে তারা পুয়ো-ছা পেবার্‌ খেমতাগান্ ফিরি পেলাক্‌।

¹⁸ অব্রাহাম মোক্ সারাত্তে লগেপ্রভু অবীমেলক ঘরর্‌ বেক্‌ মিলেগুনোরে পুয়ো-পুদেবার খেমতাগান্ এক্কুবারে বন্দ গুরি দিলো।