পত্থম 13 - Chakma Bibleঅব্রাম আর লোটে ফারগ্ অলাক্ 1 সেক্কে অব্রামে তা মোক্কো আর তার বেক্কানি লোইনে মিসর দেজত্তুন্ নিগিলিনে নেগেভ নাঙে দোগিনে ধূল্যেচর-চাগালান্দি গেলাক্, আর লোটেয়ো তা সমারে গেলঅ। 2-4 অব্রামে জদবদে মাজন্ এলঅ। তার ভালোক্কুন য়েমান আর সনা রূবো এলঅ। পরেদি তে নেগেভত্তুন্ সুরি যাদে যাদে বৈথল সং গেলঅ। এধোক্ক্যেনগুরি তে বৈথেল আর অয়র সংমোধ্যে সে জাগানত্ যেইনে লুমিলো যিয়েনত্ তে আগেদি তাম্বুল তাঙেইয়্যে আর পত্তম ডালিপূজো বানেইয়্যে। সিয়েনত্ তে লগেপ্রভুরে তার যগাজ্যে সর্মান দিলো। 5 লোট, যিবে অব্রামর সমারে যেইয়্যে, তার নিজোর্অ বোউত্ গোরু, ভেড়া, ছাগল আর তাম্বুল এলঅ। 6 মাত্তর্ জাগায়ান্ এধোক্ক্যেন ন-এলঅ যেনে তারা দ্বিজনে এক্কান জাগাত্ বজত্তি গুরি পারন্। য়েমান আর তাম্বুল তারা দ্বিজনর এদক্ বেশ্ এলঅ, সিয়েনিলোই তারা এক্কান জাগাত্ থানা সম্ভব ন-অলঅ। 7 সেনত্তে অব্রাম আর লোট য়েমান চোরেয়্যেগুনো ভিদিরে কোল্-কোজ্যে দেগা দিলো। সিয়েনবাদে সে অক্তত্ কনানীয় আর পরিষীয়গুনেয়ো সে দেজত্ বজত্তি গুরিদাক্। 8 সেক্কে অব্রাম লোটরে কলঅ,“চাহ্, আমি দ্বিজনে সদর্ কুদুম্মো। সেনত্তে আমা ভিদিরে আর আমা য়েমান চোরেয়্যেগুনো ভিদিরে কনঅ কোল্-কোজ্যে ন-অনা উচিত্। 9 গোদা দেজ্ছান্ দঅ তঅ মুজুঙোত্ পড়ি আঘে। সেনত্তে আয়, আমি ফারগ্ ওই যেই। তুই বাঙেন্দি বেঈ ললে মুই ডেনেন্দি যেম্, আর ডেনেন্দি বেঈ ললে মুই বাঙেন্দি যেম্।” 10 সেক্কে লোটে রিনি চেইনে দেগিলো যর্দনর্ বেক্ সংজাগানত্ বোউত্ পানি আঘে আর জাগায়ান্ চাদে পেরায় লগেপ্রভুর বাগান ধোক্ক্যেন, আর সিয়েন্ ন-অলেয়ো প্রায় সোয়রত্ যেবার পদত্ মিসর দেজছান ধোক্ক্যেন। সেক্কেয়ো লগেপ্রভু সদোম আর ঘমোরা শঅরান্ ভস্ত গুরি ন-ফেলায়। 11 সেক্কে লোটে যর্দনর্ বেক্ সং জাগায়ান নিজোত্তে বেঈ লোইনে পূগেদি সুরি গেলঅ। এবাবোত্যেগুরি তারা একজন আরেক জনত্তুন্ ফারগ্ ওই গেলাক্। 12 অব্রামে কনান দেজত্ আর লোটে সে সংজাগানর্ শঅরানির্ সংমোধ্যে বজত্তি গরা ধুরিলো। লোটে সদোম শঅর ইধু তাম্বুলান ফেলেল। 13 সদোম মানুচ্চুনে অমকদ বজং এলাক্ আর লগেপ্রভু মুজুঙোত্ তারা জদবদে পাপ গুরিলাক্। অব্রাম হিব্রোণত্ গেলঅ 14 লোটে ফারগ্ ওই যেবার পরেদি লগেপ্রভু অব্রামরে কলঅ, “তুই যে জাগানত্ থিয়েই আগচ্ সিয়েনত্তুন্ উত্তোর-দোগিণ্ আর পূগ্-পোজিমে একবার রিনি চাহ্। 15 যেদক্কানি জাগা তুই দেগিবে সিয়েনি মুই তরে আর তঅ বংশবোরে উমরত্তে দিম্। 16 মুই তঅ বংশর মানুচ্চুনোরে পিত্থিমীর ধূল্যেচর-ধোক্ক্যেন গুণি ন-পুরেইয়্যে গুরিম। পিত্থিমীর ধূল্যেচরুন যুদি কনজনে গুণিনে শেজ্ গুরি পারন্ সালে তঅ বংশবোর মানুচ্চুনোরেয়ো গুণো যেবঅ। 17 গোদা দেজ্ছান তুই একপল্লা ঘুরি আয়, কিত্তে এ দেজ্ছান মুই তরে দিম্।” 18 সেক্কে অব্রামে তা তাম্বুলান তুলি নেযেল আর হিব্রোণ চাগালার্ মম্রি নাঙে এক্কো মান্জোর্ এলোন ঝার কুরে সিয়েন ঠাঙেল। সিয়েনত্অ তে লগেপ্রভুর নাঙে এক্কো ডালিপূজো বানেল। |
Copyright © 2021 Bangladesh Bible Society
Bangladesh Bible Society