গালাতীয় 5 - Chakma Bible

খ্রীষ্ট ইধু স্বাধীনতা

¹ খ্রীষ্ট আমারে স্বাধীন গোজ্জ্যে যেন আমি স্বাধীন থেই পারিই। সেনত্যে তুমি থির্ থাগঅ, যেন কেঅ আরঅ তমারে চাগর্ বানেই ন-পারে।

² মুই পৌল তমারে কঙর্, শুনো-যুনি তমার চুনু মাঢা কাবানা অয় সালে তমা ইধু খ্রীষ্টর্ কনঅ দাম নেই।

³ মুই বেক্কুনো ইধু আরঅ এ সাক্ষ্যগান্ দোঙর্, যিবের চুনু মাঢা কাবা অয় তে বেক্‌ রীতি-সুদোমানি পালাদে বাধ্য।

⁴ তুমি যিগুনে রীতি-সুদোম্ পালেইনে গোজেনর্ মানি লোইয়্যে অবাত্যে চর্ তুমি দঅ খ্রীষ্টত্তুন্ জুদো ওই যেয়ো, গোজেন দোয়্যেত্তুন্ সুরি যেইয়ো।

⁵ মাত্তর্ আমারে যে নিদ্দুজি বিলিনে মানি লুয়ো অবঅ, সেই ঘেচ্চ্যেকগুরি বিশ্বেজ্‌চান্দোই পবিত্র আত্মার মাধ্যমে আমি বাজ্জ্যে আঘিই;

⁶ কিয়া যিগুনে খ্রীষ্ট যীশুর্, তারা ইধু চুনু মাঢা কাবানা বা ন-কাবানার্ কনঅ দাম নেই, বরং যে বিশ্বেজ্‌চান কোচ্‌পানার মাধ্যমে কাম গরে সেই বিশ্বেজ্‌চানই আজল জিনিচ্‌।

⁷ তুমি দঅ ভারী গমেডালে চোল্ল্য; মাত্তর্ সত্যর্ বাধ্য অদে কন্না তমারে মানা গুরিলো?

⁸ যে মতামত্‌তান্ তুমি মানি লোইয়ো, যিবে তমারে ডাক্ক্যে সেই গোজেনত্তুন্ সিয়েন ন-এজে।

⁹ এক্কেনাগুরি সদা এক্কো গোদা মোইদ্যের্ তালরে ফুলেই তুলে।

¹⁰ তমা পৌইদ্যেনে প্রভু উগুরে মর্ এ বিশ্বেজ্‌চান আঘে, তুমি আর অন্য কনঅ কধায় কান্ ন-পাদিবা। মাত্তর্ যে তমারে থির্ থেবাত্যে ন-দের্, তে যেই অদঅ সাৎ, তে তার পাওনা সাজা ভুগিবো।

¹¹ ভেইলগ্, মুই যুনি এজঅ প্রচার গরং, মানুচ্চুনোরে চুনু মাঢা কাবানা উচিত সালে কিত্ত্যে মরে এজঅ অত্যেচার্ গরা অর্? ক্রুশো উগুরে খ্রীষ্টর্ মরণর্ মানা দঅ সালে দূর্ ওই যেইয়্যে।

¹² যিগুনে তমারে যাগুলুগোত্ ফেল্ল্যন, মুই চাং তারা যেন নিজোরে এক্কুবারে ফারগ্ গুরি ফেলান্।

পবিত্র আত্মা আর পাপ-খাচ্চ্যত্

¹³ ভেইলগ্, স্বাধীন অবাত্যে দঅ গোজেনে তমারে ডাক্ক্যে। মাত্তর্ তমার পাপ খাচ্চ্যদর্ আওজ্‌চানি পূরেবাত্যে এই স্বাধীনতাগান্ বেবহার ন-গোজ্জ্য। তাত্তুন্ বরং কোচ্‌পানার মনভাব্‌পোই একজন অারেক্ জনরে সেবা গরঅ,

¹⁴ কিয়া বেক্‌ রীতি-সুদোমানি মিলিনে এক কধায় কুয়ো ওইয়্যে, “তর্ পাড়াল্ল্যেগুনোরে নিজো ধোক্ক্যেন কোচ্‌পেবে।”

¹⁵ মাত্তর্ যুনি তুমি একজন আরেকজন সমারে কোল্-কোজ্জ্যে গরঅ সালে উজিয়ার্! এবাবোত্যে গুরিলে তুমি দঅ একজন আরেকজনরে ভস্ত গুরি ফেলেবা।

¹⁶ মুই যিয়েন কঙর্ সিয়েন এবাবোত্যে-তুমি পবিত্র আত্মার্ অধীনোত্ আঢাউদো গরঅ। সিয়েন গুরিলে তুমি পাপ-খাচ্চ্যদর্ আওজ্‌চান পূরেই ন-পারিবা।

¹⁷ পাপ-খাচ্চ্যত্‌তানে যিয়েন চায় সিয়েন পবিত্র আত্মার্ বিরুদ্ধে আর পবিত্র আত্মাগানে যিয়েন চায় সিয়েন পাপ-খাচ্চ্যদর্ বিরুদ্ধে। পাপ-খাচ্চ্যত্‌তানে আর পবিত্র আত্মাগানে একজন আরেকজন বিরুদ্ধে কোইনে তুমি যিয়েন গুরিবাত্যে চঅ সিয়েন ন-গোজ্জ্য।

¹⁸ যুনি তুমি পবিত্র আত্মালোই পরিচালিত অ সালে তুমি রীতি-সুদোমর্ অধীনোত্ নয়।

¹⁹ পাপ-খাচ্চ্যদর্ কামানি গমেডালেই দেগা যায়। সিয়েনি অলঅ-সিনেলী, অসিজি, অ-খাচ্চ্যত্,

²⁰ মূত্তি-পূজো, যাদুবিদ্যে, শত্রুতা, কোল্-কোজ্জ্যে, লুভ্, রাগ, স্বাত্তবাদি, অমিল, দলাদুলি,

²¹ ইংসে, মাত্তল্ অনা, রঅ ছাড়িনে মদ হানা, আর এবাবোত্যে ভালোক্কানি। মুই যেধোক্ক্যেন্ গুরি ইয়েনর্ আঘেদি তমারে উজিয়ার্ গোজ্জ্যং ইক্কিনিয়ো সিয়েন গুরিনে কঙর্, যিগুনে এবাবোত্যে কাম্ গরন গোজেন রেজ্যত্ তারার্ জাগা ন-অবঅ।

²² মাত্তর্ পবিত্র আত্মার্ ফল অলঅ-কোচ্‌পানা, হুজী, শান্তি, সোজ্জ্যগুন, দোয়্যের্ খাচ্চ্যত্, গম খাচ্চ্যত্, বিশ্বেজ্‌বলা,

²³ নম্র আর নিজোরে দঙানা। ইয়েনির্ বিরুদ্ধে কনঅ আইন নেই।

²⁴ যিগুনে খ্রীষ্ট যীশুর্, সিগুনে তারার্ পাপ-খাচ্চ্যত্‌তানরে বেক্‌ কামনা-বাসনা সমত্ ক্রুশোত্ দিইনে শেজ্ গুরি ফেল্ল্যন্।

²⁵ আমি যুনি পবিত্র আত্মার্ মাধ্যমে জিংকানি পেই থেই সালে এজঅ, আমি পবিত্র আত্মার্ অধীনে আঢাউদো গুরিই।

²⁶ আমি যেন মিজে মিজে দেমাগ্ ন-গুরিই আর একজন আরেক জনরে কাঙেলেত্যে আর ইংসে ন-গুরিই।