গালাতীয় 1 - Chakma Bibleগালাতীয়গুনো ইধু পৌলর্ চিধি 1 মুই পৌল খ্রীষ্টর্ এক্কো প্রচারক। এ প্রচারক-পদ্তান কনঅ মান্জ্যত্তুন্ বা কনঅ মান্জ্যর্ ভিদিরেত্তুন্ মুই ন-পাং, বরং যীশু খ্রীষ্ট আর বাবা গোজেন, যিবে খ্রীষ্টরে মরণত্তুন্ জেদা গুরিনে তুল্ল্যে, তারার্ মাধ্যমে মুই সিয়েন পেয়োং। 2 মুই আর মঅ লগে যিদুক্কুন্ বিশ্বেজি ভেই আঘন, আমি বেক্কুনে গালাতিয়া মন্ডলীগুনো ইধু লিগির্। 3 আমার বাবা গোজেন আর প্রভু যীশু খ্রীষ্ট তমারে দোয়্যে গোরোক্ আর শান্তি দান গোরোক্। 4 আমার গোজেন আর বাবার্ আওজ্ মজিম খ্রীষ্ট আমা পাপত্যে নিজো জিংকানিগান দিয়্যে, যেন তে ইক্কুনু এ ভান্ন্যেই জগদর্ আঢত্তুন্ আমারে রোক্ষ্যে গুরি পারে। 5 উমরত্যে গোজেনর্ বাঈনী ওক্। আমেন। গম হবর্ বানা এক্কান 6 খ্রীষ্টর্ দোয়্যেলোই যিবে তার্ নিজোর্ মানুচ্ অবাত্যে তমারে ডাক্ক্যে, তুমি এদক যাদিমাদি তারে ইরি দিইনে অন্য বাবোত্যে গম হবর্ ইন্দি লুঙি পোজ্য দেগিনে মুই আমক্ অঙর্। 7 আসলে সিয়েন দঅ কনঅ গম হবর্ নয়। তো কিজু মানুচ্ আঘন যিগুনে তমারে থির্ থেবাত্তে ন-দেদন্, আর খ্রীষ্ট পৌইদ্যেনে গম হবর্ বুদুলিবাত্যে চাদন্। 8 মাত্তর্ যে গম হবরান্ আমি তমা ইধু প্রচার গোজ্জ্যেই সিয়েনত্তুন্ যুদো কনঅ গম্ হবর্ যুনি তমা ইধু প্রচার গরা অয়, সিয়েন আমি নিজে গুরিই বা কনঅ স্বর্গদূতে গরে, মাত্তর্ তা উগুরে অভিশাব্ পোড়োক্। 9 মুই যেধোক্ক্যেন আগেয়ো কোইয়োং সেধোক্ক্যেন গুরি ইক্কিনেয়ো আরঅ কঙর্, যে গম হবরান্ তুমি মানি লোইয়ো সিয়েনত্তুন্ যুদো কনঅ গম্ হবর্ যুনি কেঅ প্রচার গরন্ সালে তা উগুরে অভিশাব্ পোড়োক্। 10 মুই ইয়েনত্ কার প্রশংসা পেবার চেষ্টা গরঙর্, মান্জ্যর না গোজেনর্? না কি মান্জ্যরে হুজী গুরিবার চেষ্টা গরঙর্? মুই যুনি এজঅ মান্জ্যরে হুজী গুরিবার চেষ্টা গরং সালে দঅ মুই খ্রীষ্টর্ চাগর নয়। পৌলে কেধোক্ক্যেন গুরি প্রচারক্ অলঅ 11 ভেইলগ্, মুই তমারে জানাঙর্, মুই যে গম হবরান্ প্রচার গোজ্জ্যং সিয়েন কনঅ মান্জ্যর বানেইয়্যে কধা নয়। 12 মুই কনঅ মান্জ্যত্তুন্ সিয়েন ন-পাং বা কেঅ মরে সিয়েন ন-শিগায়, বরং যীশু খ্রীষ্ট নিজেই মইধু সিয়েন ফগদাং গোজ্জ্যে। 13 যিহূদী ধর্ম পালেবার্ অক্তত কেধোক্ক্যেন গুরি মুই জিংকানি কাদেদুং সিয়েন দঅ তুমি শুন্ন্য। আর তুমি ইয়েন্অ শুন্ন্যদে, কি সাংগাদিক্ গুরি মুই গোজেন মন্ডলীগুনো উগুরে অত্যেচার্ গত্তুং আর সিগুন ভস্ত গুরিবার্ চেষ্টা গত্তুং। 14 মঅ বয়জর্ বোউত যিহূদীত্তুন্অ মুই সে ধর্মত্ ভালোদ্ দূর্ উজেই যাঙর্। ইয়েন বাদে মঅ পূরোণি মানুচ্চুনোত্তুন যেদক্কানি সুদোম এচ্চ্যে সেই পৌইদ্যেনেয়ো মুই অমকদ উচ্চোমি এলুং। 15 মাত্তর্ গোজেনে মর্ জর্মর সময়ত্তুন্ ধুরি মরে বেঈ লোইনে থোইয়্যে আর তার্ দোয়্যেলোই প্রচারক অবাত্যে তে মরে ডাক্ক্যে। 16 মুই যেন অযিহূদীগুনো ইধু খ্রীষ্ট পৌইদ্যেনে গম হবর্ প্রচার গরং, ইয়েনত্যে গোজেনে যেক্কে তার্ আওজ্ মজিম তা পুয়োবোরে মইধু ফগদাং গুরিলো সেক্কে মুই কনঅ মান্জ্য লগে সল্লা ন-গরং। 17 এন্ কি, যিগুনে মঅ আগেদি প্রচারক ওইয়োন মুই যিরূশালেমত্ তারা ইধুয়ো ন-যাং। সেক্কে মুই আরব দেজত্ যেইয়োং আহ্ যেরেদি আরঅ দামেস্ক শঅরত্ ফিরি এচ্চ্যং। 18 ইয়েনর্ তিন বজর্ বাদে মুই পত্তম বার পিতর সমারে দেগা গুরিবাত্যে যিরূশালেমত্ যেইয়োং। আর সিধু তা সমারে পনর্ দিন এলুং। 19 সেক্কে প্রভুর্ ভেই যাকোবে বাদে অন্য কনঅ প্রচারক লগে মর্ দেগা ন-অয়। 20 গোজেনে সাক্ষী, মুই তমা ইধু যিয়েন লেগঙর্ সিয়েনর্ কিচ্চু মিজে নয়। 21 সে পরেদি মুই সিরিয়া আর কিলিকিয়া ভিদিরে নানান্ জাগাত যেইয়োং। 22 যিহূদিয়ার খ্রীষ্টীয় মন্ডলীগুনে মরে ন-চিনিদাক্। 23 তারা বানা এ কধাগান্ শুন্ন্যন্, “যে মানুচ্চো আমা উগুরে অত্যেচার গত্ত তে ইক্কিনে খ্রীষ্ট উগুরে বিশ্বেজর্ কধা প্রচার গরের্, অদচ সিয়েন তে আগে ভস্ত গুরিবাত্যে চেইয়্যে।” 24 আর তারা মত্যেই গোজেনর্ বাঈনী গরা ধুরিলাক্। |
Copyright © 2021 Bangladesh Bible Society
Bangladesh Bible Society