ইষ্রা 9 - Chakma Bible

ইষ্রার তবনা গরানা

¹ এ কামানি থুম্ ওই গেলে পরেদি নেতাগুনে মইধু এইনে কলাক্, “ইস্রায়েলীয়গুন আর তারার্ ধর্মগুরুগুন আহ্ লেবীয়গুনে তারার্ দেজত্ বজত্তিগুরিয়্যে অন্য জাদ্‌তুনো ইত্তুন্ নিজোরে যুদো গুরি ন রাগান্। তারা কনানীয়, মিসরীয় আর ইমোরীয়গুনো ধোক্ক্যেন জঘন্য কাম গোজ্যন্।

² তারা নিজোরে আর তারার্ পুয়োগুনোত্যে মোক্ ইজেবে সেই জাদর্ মিলেগুনোরে মানি লোইয়োন, আর এবাবোত্যেগুরি তারার্‌ সুদ্ধো-সাংগ জাদরে সেই জাদ্‌‌তুনো সমারে মিজেই ফেল্যন্। এন্ কি, নেতাগুনে আর দাঙর্ পোজিশনর্ কামগুরিয়্যেগুনে পত্তমে এই অবিশ্বেজর্ পথ্‌‌তান্ দেখ্যন।”

³ এ কধাগান শুনিনে মুই মনত্ দুঘে মর্ উজ্যে কাবড়ানি ফাদি ফেলেলুং আর মর্ মাঢাবো চুলানি আর দাড়িগানি ছিনিনে আমক্ ওইনে বোই রলুং।

⁴ বন্দীদযাত্তুন্ ফিরি এচ্চ্যে এ মানুচ্চুনোর অবিশ্বেজর্ বেপারে যিগুনে ইস্রায়েলর্ গোজেনর্ কধানি ইদোত্ তুলিনে গির্‌গিরে উদিলাক্ তারা পত্তিজনে মইদু এইনে এগত্তর্ অলাক্। সাজোন্যে অক্তত্ উৎসর্বর সময়ো সং মুই সিয়েনত্ আমক্ ওইনে বোই রলুং।

⁵ সে পরেদি সাজোন্যে অক্তত্ উৎসর্বর সময়োত্ মুই মন মরা ওয়্যে দুঘোত্তুন্ ফিরিলুং আর সেই ফাদি যেইয়্যে কাবড় সুমুত্তো আঢু পাদিনে মর্ গোজেন লগেপ্রভুর মুজুঙোত্ দ্বি আঢ্ বাবেই দিইনে এই তবনাগান গুরিলুং,

⁶ ও মর্ গোজেন, তইন্দি মর্ মুয়োন তুলোদে ভারী লাজাঙর্, কিত্যে আমা পাপ্পানি আমা মাঢা উগুরে উঠ্যেগোই আর আমা ‍দুষ্‌‌চানি আগাজত্ লুম্মেগোই।

⁷ আমা পূরোণিমানুচ্চুনোর্ সময়োত্তুন্ ধুরি আরাম্ভ গুরিনে এচ্চ্যে সং আমি বোউত্ পাপ গোজ্যেই। আমা পাপত্যেই আমার আর আমা রাজাগুনোর্ আহ্ আমা ধর্মগুরুগুনোর অন্য রাজাগুনোর্ আঢত্ মোজ্যন্, বন্দীদযা, লুদো খানা আর অসর্মান ওইয়োন, আর এজঅ সেই অবস্থাগান রোইয়্যে।

⁸ মাত্তর্ ইক্কিনে কানক্কনত্তে আমা গোজেন লগেপ্রভু দোয়্যে গুরিনে আমা কিজু মান্‌‌জ্যরে জেদা রাগেয়্যে আর তার্ সুদ্ধো-সাংগ দেজত্ আমারে এক্কান থিদেবর্ গোজ্যে জাগা দিয়্যে। এবাবোত্যেগুরি আমা গোজেনে আমারে হুজি অনাগান্ ফিরেই দিয়্যে আর আমা চাগর্ খাদানাত্তুন্ আমারে এক্কানা পরাণান্ জুড়েই দিয়্যে।

⁹ আমি চাগর্ অলেয়ো আমা চাগর্ খাদানার্ সময়োত্ আমা গোজেনে আমারে ছাড়ি ন যায়। পারস্যের রাজাগুনো মুজুঙোত্ তে আমা উগুরে বিশ্বেজি বেবহারান্ গোজ্যে। তে আমারে জাগেই তুল্যে যেনে আরঅ আমি আমার্ গোজেন ঘরান বানেই পারি আর সিয়েনর্ ভাঙা জাগায়ান ঠিগ্ গুরিই পারি। তে যিহূদা আর যিরূশালেমত্ আমারে গমেডালে থেবার বেবস্থা গোজ্যে।

^10-11 মাত্তর্ ইক্কিনে, ও আমার্ গোজেন, ইয়েনর্ পরেদি আমি কি কোই পারিই? তুই তর্ চাগর্ ভাববাদীগুনোর মাধ্যমে যেদক্কানি উগুম দুয়োচ্ সিয়েন দঅ আমি অগ্রাজ্য গোজ্যেই। তুই কোইয়োচ্চ্যে, যে দেশ্‌‌চান্ তুমি অধিকার গুরিবাত্যে যর্ সিয়েন সিদুগোর্ মানুচ্চুনোর্ অসিজি অনার্ কারনে অসিজি ওইয়োন। তারার্ জঘন্য কাম্‌‌বোই তারা দেজর্ এক দুযিত্তুন্ অন্য দুযি সং অসিজিলোই ভোজ্যে।

¹² সেনত্যেই তমা ঝিগুনোরে তারার্ পুয়োগুনো সমারে বৌ ন দুয়ো বা তমা পুয়োগুনোত্যে তারার্ ঝিগুনোরে ন নেযেয়ো আর কনদিন্অ তারার্ মংগল বা ভালেদির্ চেট্ট্যা ন-গোজ্য। ইয়েন্দোই তুমি বোলী অবা আর ভূইয়োর্ গম গম জিনিস হেই পারিবা আর উমরর্ অধিকার ইজেবে দেজ্‌‌চান্ তমার্ পুয়ো-ঝিগুনোত্যে থোই যেই পারিবে।

¹³ “আমা ভান্ন্যেই কাম আর আমা দাঙর্ পাপত্যে আমা উগুরে ইয়েনি ঘদের্, মাত্তর্ তো ও আমার্ গোজেন, আমা পাপর পাওনা মজিম তুই আমারে কম্ সাজা দুয়োচ্ আর আমার কিজু মান্‌‌জ্যরে বাঁজি থাগদে দুয়োচ্।

¹⁴ আমি কি আরঅ তর্ উগুমানি অমান্য গুরিনে সেই জঘন্য কাম গোজ্যে মানুচ্চুুনো সমারে বৌ বেপারে কধা কবং? সিয়েন গুরিলে দঅ তুই আমা উগুরে এমন রাগ গুরিবে যিয়েনত্যে তুমি আমারে ভস্ত গুরি ফেলেবে আর আমারে কাররে বাঁজি থেবাত্যে ন দিবে।

¹⁵ ও ইস্রায়েলর গোজেন লগেপ্রভু, তুই ন্যায়বলা। আমি এচ্চ্যে সং কিজু মানুচ্ বাঁজি আগিই। তঅ মুজুঙোত্ আমি বেক্কুনে পাপী, আর সেনত্যে আমাত্তুন্ কেয়ই তঅ মুজুঙোত্ থিয়্যেবার্ যগাজ্যে নয়।”