ইষ্রা 8 - Chakma Bible

ইষ্রা সমারে ফিরি এচ্চ্যে বংশ-নেতাগুনোর্ নাঙানি

¹ রাজা অর্তক্ষস্তর রাজাগিরির্ সময়োত্ যিদুক্কুন্ বংশ-নেতা মঅ সমারে বাবিলত্তুন্ ফিরি এচ্চ্যন্ তারার্ নাঙানি:

² পীনহসর বংশ ভিদিরে গের্শোম; ঈথামরর বংশ ভিদিরে দানিয়েল; দায়ূদ বংশ ভিদিরে শখনিয়র বংশধর হটূশ;

³ পরোশর বংশ ভিদিরে সখরিয় আর তা সমারে নাঙ্ লেখ্যে একশ পঞ্চাশ জন;

⁴ পহৎ-মোয়াবর বংশ ভিদিরে সরহিয়র পুয়ো ইলীহৈনয় আর তা সমারে দ্বিশ জন;

⁵ সত্তূর বংশ ভিদিরে যহসীয়েলর পুয়ো শখনিয় আর তা সমারে তিনশ জন;

⁶ আদীন বংশ ভিদিরে যোনাথনর পুয়ো এবদ আর তা সমারে পঞ্চাশ জন;

⁷ এলম বংশ ভিদিরে অথলিয়র পুয়ো যিশায়াহ আর তা সমারে সত্তুর জন;

⁸ শফটিয়র বংশ ভিদিরে মীখায়েলর পুয়ো সবদিয় আর তা সমারে আশি জন;

⁹ যোয়াবর বংশ ভিদিরে যিহিয়েলর পুয়ো ওবদিয় আর তা সমারে দ্বিশ আদার জন;

¹⁰ বানির বংশ ভিদিরে যোষিফিয়র পুয়ো শলোমীত আর তা সমারে একশ ষায়েট জন;

¹¹ বেবয়র বংশ ভিদিরে বেবয়র পুয়ো সখরিয় আর তা সমারে আটেশজন;

¹² অস্‌গদ বংশ ভিদিরে হকাটনর পুয়ো যোহানন আর তা সমারে একশ দশ জন;

¹³ অদোনীকামর বংশ ভিদিরে যিগুনে বেগ যেরেদি ফিরি এচ্চ্যন্ তারার্ নাঙানি অলঅ ইলীফেলট, যিয়ূয়েল আর শময়িয় আহ্ তারা সমারে ষায়েটজন;

¹⁴ বিগ্‌বয়র বংশ ভিদিরে ঊথয় আর সব্বূদ আর তারা সমারে সত্তুরজন।

যিরূশালেমত্ ফিরি এযানা

¹⁵ অহবার ইন্দি বেই যেইয়্যে ছড়া ইন্দি মুই এ মানুচ্চুনোরে এগত্তর্ গুরিলুং আর সেই জাগানত্ আমি তাম্বুল ফেলেইনে তিন দিন রলং। মানুচ্চুনোরে আর ধর্মগুরুগুনো ভিদিরে তোগেইনে মুই কনঅ লেবীয়রে ন দেগিলুং।

¹⁶ সেক্কে মুই ইলীয়েষর, অরীয়েল, শময়িয়, ইল্‌নাথন, যারিব, ইল্‌নাথন, নাথন, সখরিয় আর মশুল্লম নাঙে নেতাগুনোরে আর যোয়ারীব আহ্ ইল্‌নাথন নাঙে দ্বিজন মাষ্টররে ডাগিনে পাদেলুং।

¹⁷ এ মানুচ্চুনোরে মুই কাসিফিয়াত্ বজত্তি গুরিয়্যে নেতা ইদ্দো আর তা বংশর উবোসনা-ঘর ইধু এ কধাগান কবাত্তে পাদেই দিলুং, “তুমি আমার গোজেন ঘরর্ সেবা-কামত্তে আমা ইধু মানুচ্ লোই আন্।”

¹⁸ আমা গোজেনর্ ভালেদির্ আঢ্ আমা উগুরে এলঅ বিলিনে তারা ইস্রায়েলর পুয়ো লেবি-গুট্টির মহলি বংশ ভিদিরেত্তুন্ শেরেবিয় নাঙে এক্কো কাবিদ্যেং মান্‌জ্যরে আর তা পুয়োগুনোরে আহ্ ভেইয়ুনোরে ব্ক্কেুনোরে মিলিনে আদারজনরে আমা ইধু আনিলাক্।

^19-20 ইয়েনবাদে তারা হশবিয়রে আর মরারির বংশধরুনো ভিদিরেত্তুন্ যিশায়াহ আর তা ভেইয়ুনোরে আহ্ তা পুয়োগুনোরে মিলিনে কুড়িজনরে আর উবোসনা-ঘরর্ সেবাগুরিয়্যেগুনো ভিদিরে দ্বিশ কুড়ি জনরে আনিলাক্। দায়ূদ আর তা কামগুরিয়্যেগুনে এই সেবাগুরিয়্যেগুনোর্ পূরোণি মানুচ্চুনোরে ঠিগ্ গোজ্যন্ যেনে তারা লেবীয়গুনোরে সাহায্য গুরি পারন্। এই দ্বিশ কুড়িজনর্ নাঙানি লেগা অলঅ।

²¹ পরেদি মুই অহবার ছড়া ইধু আমাত্যে উবোস্ থানাগান্ ফগদাং গুরিলুং যেনে আমি আমা গোজেন মুজুঙোত্ নিজোরে লোঙেই পারিই আর আমা ঝি-পুয়োগুনোরে আর বেক্ সোম্বোত্তিগানোই গমেডালে যাত্রা গুরি পারিই।

²² পধত্ আমা শত্রুগুনো আঢত্তুন্ আমারে রোক্ষ্যে গুরিবাত্তে রাজা ইধু সৈন্য আর ঘোড়া বাহিনী চেবাত্তে মুই লাজেলুং, কিত্যে আমি রাজারে কোইয়্যেদে, “যিগুনে গোজেনর্ আওজ্ মজিম চলন্ তারার্ পত্তিজন উগুরে তার্ ভালেদির্ আঢ্ আঘে, মাত্তর্ যিগুনে তারে ছাড়িনে যান্ তার্ রাগ্‌কান্ আর সাজাগান্ তারার্ বেক্কুনো উগুরে লামি এজে।”

²³ সেনত্তে আমি উবোস্ থেলং আর এ বেপারে আমি গোজেন ইধু কোজোলী গোজ্যেই আর তে আমা তবনাগানর্ জোব্ দিলো।

²⁴ সে পরেদি মুই বারজন আজল্ ধর্মগুরুরে আর তারা সমারে শেরেবিয়, হশবিয় আর তারার্ দশজন লেবীয় ভেইয়োরে যুদো গুরিলুং।

²⁵ মুই তারা ইধু সেই সনা, রূবো আর পিলেগুন মাবিনে নিগিলেই দিলুং যিগুন রাজা আর তা সল্লাদিয়্যেগুনে, কামগুরিয়্যেগুনে আর সিয়েনত্ আঝিল্ ওইয়্যে বেক্ ইস্রায়েলীয়গুনে আমা গোজেন ঘরত্তে দান গোজ্যন্।

²⁶ মুই তারা ইধু ঊনেশ আজার্ পাচশ কেজি রূবো, তিন আজার্ কেজি রূবোর্ পিলে আর তিন আজার্ কেজি সনা দিলুং।

²⁷ ইগুনবাদে সাড়ে ছয় কেজি মাবর্ কুড়িবো সনার্ পিলে আর সনা ধোক্ক্যেন অকমদ মংগা দোল্ দ্বিবে পালিশ গোজ্যে পিদলর্ পিলে দিলুং।

²⁸ মুই তারারে কলুং, “তমার আর এই বেক্ পিলেগুন লগেপ্রভুর নাঙে যুদো গরা ওইয়্যে। ইগুনবাদে এই সনা আর রূবোগানি তমার পূরোণি মানুচ্চুনোর গোজেন লগেপ্রভুর নাঙে নিজোর্ আওজে দান গোজ্যে।

²⁹ তুমি যেদক্ বিলোন্ যিরূশালেমত্ লগেপ্রভুর ঘরর্ ভান্ডাল-ঘরত্ আজল্ ধর্মগুরুগুনোর্, লেবীয়গুনোর আর ইস্রায়েলর বংশ-নেতাগুনো মুজুঙোত্ মাবি ন দুয়ো সেদক্ বিলোন্ সং সিয়েনি উজিয়ারে রোক্ষ্যে গুরিবা।”

³⁰ ইয়েনর্ পরেদি ধর্মগুরুগুনে আর লেবীয়গুনে যিরূশালেমত্ আমা গোজেনর্ ঘরত্ নিবাত্তে মাপ্যে সনা, রূবো আর পিলেগুন গুজি ললাক্।

³¹ পত্তম্ মাজর্ বার দিনোত্ আমি যিরূশালেমত্ যেবাত্তে অহবা ছড়াত্তুন্ যাত্রা গুরিলোং। আমা গোজেনর্ আঢ্ আমা উগুরে এলঅ আর পধত্ শত্রু আর ডাগেদ আঢত্তুন্ আমারে রোক্ষ্যে গুরিলো।

³² এবাবোত্যেগুরি আমি যিরূশালেমত্ লুমিনে তিন দিন সিধু জিরেলং।

³³ সে পরেদি চের্ দিনোত্ আমি আমার্ গোজেন ঘর ভিদিরে সেই সনা, রূবো আর পিলেগুন মাবিনে ধর্মগুরু ঊরিয়র পুয়ো মরেমোতর্ আঢত্ দিলোং। মরেমোত সমারে এলদে পীনহসর বংশধর ইলীয়াসর আর তারা সমারে এলদে যেশূয়র পুয়ো যোষাবদ আর বিন্নুয়ির পুয়ো নোয়দিয়। ইগুনে দ্বিজনে লেবীয় এলাক্।

³⁴ বেক্ জিনিস্‌চানি গুণিনে আর মাবিনে দিয়্যে অলঅ আর সে অক্তত্ সিয়েনির্ নাঙানি আর মাব ইজেব্‌পান লিগি রাগা অলঅ।

³⁵ বন্দীদজাত্তুন্ ফিরি এচ্চ্যে মানুচ্চুনে ইস্রায়েলর গোজেনর্ নাঙে পুজ্যে-উৎসর্বর অনুষ্ঠান গুরিলাক্। তারা পুরো ইস্রায়েল জাদত্যে বারবো বলদ্, ছিয়েনব্বইবো ভেড়া, সাতাত্তুরবো ভেড়া ছঅ আর পাপ-উৎসর্বত্তে বারবো ছাগল দিলাক্। ইগুন বেক্কুন্ লগেপ্রভুর নাঙে পুজ্যে-উৎসর্ব ইজেবে দিয়্যে অলঅ।

³⁶ তারা ইউফ্রেটিস গাঙর্ পোজিম্ পারর্ রেজ্যগানির্ আর জেলার্ শাজন্‌গুরিয়্যেগুনো ইধু রাজার উগুমান লুমেই দিলাক্। সেই উগুমান পেইনে তারা মানুচ্চুুনোরে সাহায্য গুরিলাক্ আর গোজেনর্ ঘরর কামত্অ সাহায্য ‍গুরিলাক্।