ইষ্রা 7 - Chakma Bibleইষ্রা যিরূশালেমত্ গেলঅ 1 এই বেক্ ঘটনাগানির পরেদি পারস্যের রাজা অর্তক্ষস্তর রাজাগিরির্ সময়োত্ ইষ্রা বাবিলত্তুন্ এলঅ। ইষ্রা সরায়র পুয়ো, সরায় অসরিয়র পুয়ো, অসরিয় হিল্কিয়র পুয়ো, 2 হিল্কিয় শল্লুমর পুয়ো, শল্লুম সাদোকর পুয়ো, সাদোক অহীটূবর পুয়ো, 3 অহীটূব অমরিয়র পুয়ো, অমরিয় অসরিয়র পুয়ো, অসরিয় মরায়োতর পুয়ো, 4 মরায়োৎ সরহিয়র পুয়ো, সরহিয় উষির পুয়ো, উষি বুক্কির পুয়ো, 5 বুক্কি অবীশূয়র পুয়ো, অবীশূয় পীনহসর পুয়ো, পীনহস ইলিয়াসরর পুয়ো আর ইলিয়াসরে এলদে আজল্ ধর্মগুরু হারোণর পুয়ো। 6-7 ইষ্রা এলদে এক্কো ধর্ম-মাষ্টর্। ইস্রায়েলর গোজেন লগেপ্রভুর দিয়্যে মোশির রীদি-সুদোম বেপারে তার দোল্ জ্ঞান এলঅ। তার গোজেন লগেপ্রভুর আঢ্তানি তা উগুরে এলঅ বিলিনে তে যাহ্ চেদঅ রাজা তারে সিয়েনি দিদো। রাজা অর্তক্ষস্তর রাজাগিরির্ সাত বজরত্ যেক্কে ইষ্রা যিরূশালেমত্ এচ্চ্যে সেক্কে তা সমারে কিজু ইস্রায়েলীয় এচ্চ্যন্। তারা ভিদিরে এলাক্ ধর্মগুরু, লেবীয়, গানগেইয়্যে আর উবোসনা-ঘরর্ চুগিদার আর সেবাগুরিয়্যে। 8-9 গোজেনর্ ভালেদির্ আঢ্ ইষ্রা উগুরে এলঅ বিলিনে তে পত্তম্ মাজর্ পত্তম্ দিনোত্ বাবিলোত্তুন্ যাত্রা গুরিনে পাঁচ মাজর্ পত্তম্ দিনোত্ যিরূশালেমত্ এইনে লুম্মোন্দি। 10 ইষ্রা লগেপ্রভুর রীদি-সুদোম পড়িবার, সিয়েনি পালেবার আর তার্ সুদোম আহ্ উগুম ইস্রায়েল দেশত্ শিক্ষ্যে দিবাত্তে নিজোরে গোজেই দিলো। ইষ্রা ইদু রাজা অর্তক্ষস্তর চিধি 11 যিবে ইস্রায়েলরে দিয়্যে লগেপ্রভুর বেক্ উগুম আর সুদোমানি বেপারে শিক্ষ্যে লাভ গোজ্যে সেই ধর্মগুরু আহ্ ধর্ম-মাষ্টর্ ইষ্রা ইদু রাজা অর্তক্ষস্ত এই চিধিগান লেখ্যে: 12 স্বর্গর গোজেনর্ রীদি-সুদোমর্ মাষ্টর্ ধর্মগুরু ইষ্রার ইধু মুই রাজাগুনোর্ রাজা অর্তক্ষস্ত লেগঙর্। তর্ ভালেদি ওক্। 13 মুই ইক্কিনে এই উগুমান গরঙর্, মঅ রেজ্যর্ যিদুক্কুন্ ইস্রায়েলীয় আর তারার্ ধর্মগুরুগুন আর লেবীয়গুনে তঅ সমারে যিরূশালেমত্ যেবাত্তে চায় তারা যেই পারন্। 14 তঅ আঢত্ তমা গোজেনর্ যে রীদি-সুদোমানি আঘে সেই মজিম্ যিহূদা আর যিরূশালেমর অবস্থাগান্ কেজান্ সিয়েনর্ হবর্ নিবাত্তে রাজা আর তার সাতজন সল্লাদিয়্যে তরে সিধু পাধাদন্। 15 ইস্রায়েলর গোজেন, যিবে যিরূশালেমত্ বজত্তি গরে তারে রাজা আর তার সল্লাদিয়্যেগুনে যেদক্কানি সনা-রূবো নিজোর্ আওজে দেদন্ সিয়েনি তুই নেযেবে। 16 ইয়েনিবাদে যেদক্কানি সনা-রূবো তুই বাবিলত্তুন্ পেবে আর ইস্রায়েলীয়গুনে আর তারার্ ধর্মগুরুগুনে যিরূশালেমত্ তারার্ গোজেনর্ ঘরত্যে যিয়েনি নিজোর্ আওজে দিবাক্ তুই সিয়েনি বেক্কানি নেযেবে। 17 সেই সনা-রূবোলোই বলদ গোরু, ভেড়া আর ভেড়া ছঅ আর তা সমারে শোজ্য-উৎসর্ব আর ঢাল্যে-উৎসর্বর্ জিনিস গমেডালে চেইনে কিনিবা আর যিরূশালেমত্ তমা গোজেনর্ ঘরর্ পূজোবো উগুরে সিয়েনি উৎসর্ব গুরিবা। 18 সে পরেদি তুই আর তর্ যিহূদী ভেইয়ুনে বাদবাগি সনা-রূবোনিলোই তমা গোজেনর্ আওজ্ মজিম্ যিয়েনি গম মনে গরঅ সিয়েনি গুরিবা। 19 তমা গোজেন ঘরত্ উবোসনাত্তে যিদুক্কুন্ পিলে তমা আঢত্ দিয়্যে অলঅ সিগুন তুই যিরূশালেমর গোজেন মুজুঙোত্ আঝিল্ গোরেবে। 20 ইয়েনিবাদে তমা গোজেন ঘরত্তে আর যিয়েনি দরকার সিয়েনির খরচ তুই রাজভান্ডালত্তুন্ লোইনে দিবে। 21 ইক্কিনে মুই রাজা অর্তক্ষস্ত ইউফ্রেটিস গাঙর্ পোজিম্ পারর্ বেক ধনভান্ডালর্ চুগিদারুনোরে এই উগুমান দুয়োঙর্, স্বর্গর গোজেনর্ রীদি-সুদোমর্ মাষ্টর ধর্মগুরু ইষ্রা তমা ইধু যিয়েনি চেবঅ সিয়েনি তুমি গমেডালে দিবা। 22 তুমি তারে তিন আজার্ নয়শ কেজি রূবো, আদার আজার কেজি গম, দ্বিআজার দ্বিশ লিটার আংগুর-রস, দ্বিআজার দ্বিশ লিটার তেল আর যেত্তমান্ নুন্ দরকার সিয়েন দি পারিবো। 23 স্বর্গর গোজেনে যেধোক্কেন্ গুরি উগুম দিয়্যে সেবাবোত্যেগুরি স্বর্গর গোজেনর্ ঘরত্তে যেনে বেক্কানি যত্তন্ গুরিনে গরা অয়। রাজা আর তা পুয়োগুনোর রেজ্যর্ বিরুদ্ধে যেনে তার্ রাগ্কান্ ফগদাং ন অয়। 24 আমি তমারে আরঅ কোত্তে, গোজেনর্ সেই ঘরর কনঅ ধর্মগুরু, লেবীয়, গানগেইয়্যে, চুগিদার্, সেবাগুরিয়্যে বা অন্য কনঅ কামগুরিয়্যে উগুরে কনঅ খাজানা, কর্ বা শুল্ক বোজেবার্ খেমতা তমার্ নেই। 25 ও ইষ্রা, গোজেনর্ বেপারে তর্ যে জ্ঞানান্ আঘে সেই মজিম্ তুই ইউফ্রেটিস গাঙর্ পোজিম্ পারর্ বেক মানুচ্চুনোরে বিচেরত্যে এমন কামগুরিয়্যে আর বিচেরক্ নেযেবে যিগুনে তর্ গোজেনর্ দিয়্যে রীদি-সুদোম জানন্। যিগুনে সিয়েনি ন জানন্ তুমি তারারে সিয়েনি শিক্ষ্যে দিবা। 26 যিগুনে তুমি গোজেনর্ রীদি-সুদোম বা রাজার আইন ন মানিবা তারারে গমেডালে সাজা দিয়্যে পুরিবো। সেই সাজাগান্ মরণ বা দেজত্তুন্ দূর্ গুরি দেনা বা সোম্বোত্তি বাজেয়াপ্ত গরানা বা জেলোত্ বন্দী গরানা। ইষ্রা গোজেনর্ বাঈনী গুরিলো 27 আমা পূরোণি মানুচ্চুনোর গোজেন লগেপ্রভুর বাঈনী ওক্। যিরূশালেমত্ লগেপ্রভুর ঘর উগুরে এবাবোত্যেগুরি সর্মান দেগেবার মনভাব তেয়ই রাজার্ মনত্ জাগেয়্যে। 28 রাজা আর তার্ সল্লাদিয়্যেগুনোর্ আর তার্ বেক্ খেমতাবলা কামগুরিয়্যেগুনো মুজুঙোত্ তেয়ই মরে তার্ অমকদ কোচ্পানাগান্ দেগেয়্যে। মঅ উগুরে মর্ গোজেন লগেপ্রভুর আঢ্ এলঅ বিলিনে মুই সাহস পেলুঙ আর মঅ সমারে যিরূশালেমত্ ফিরি যেবাত্তে ইস্রায়েলীয়গুনো ভিদিরেত্তুন্ নেতাগুনোরে এগত্তর্ গুরিলুং। |
Copyright © 2021 Bangladesh Bible Society
Bangladesh Bible Society