ইষ্রা 6 - Chakma Bible

দারিয়াবসর উগুম

¹ রাজা দারিয়াবসে উগুম দিলে পরেদি মানুচ্চুনে বাবিলোর রাজ-সরকারর কাগজ্‌পাদি থবার্ জাগানত্ যেইনে সিয়েনি তোগেইনে দেগিলাক্।

² ইয়েনত্ মাদীয় রেজ্যর্ অক্‌মথা নাঙে রাজধানীত্ এক্কান গুচ্চ্যেই রাগেয়্যে বোই পাহ্ গেলঅ। সিয়েনত্ এ কধাগান লেগা এলঅ: স্মারক লিপি

³ রাজা কোরসর রাজাগিরির্ পত্তম বজরত্ যিরূশালেমর্ গোজেনর্ ঘর বেপারে তে এই উগুমান দিলো: “য়েমান উৎসর্গর জাগা ইজেবে উবোসনা ঘরান আরঅ বানা ওক্ আর সিয়েনর্ গড়াগান্ দরমরগুরি থিদেবর্ গরা ওক্। সিয়েন অবঅ ষায়েট আঢ্ অজল্ আর ষায়েট আঢ্ পাদাজ্যে।

⁴ সিয়েনত্ থেবাক্ তিন সুর্ দাঙর্ দাঙর্ পাত্তর উগুরে এক সুর্ তক্তা। রাজার ধনভান্ডালত্তুন্ বেক খরচ্চানি দিয়্যে ওক্।

⁵ ইয়েনবাদে নবূখদ্‌‌নিৎসরে যিরূশালেমর্ উবোসনা-ঘরত্তুন্ যেদক্কানি সনা-রূবোর পিলে বাবিলোত্ নেযেয়োন সিয়েনিয়ো আরঅ গোজেনর্ ঘরত্ ঠিগ্ জাগাত্ রাগা ওক্।”

⁶ সেক্কে রাজা দারিয়াবসে এই জোব্‌‍‌‍‍পান দিলো: “ইউফ্রেটিস গাঙর্ পোজিম্ পারর্ চাগালানির্ শাজন্‌‍‍‍‌‍‍‍গুরিয়্যে তত্তনয় আর শথরবোষণয় আহ্ সিদুগোর্ অজল্ পোজিশনর্ কামগুরিয়্যেগুন, তুমি ইক্কুনি সেই জাগানত্তুন্ দূরোত্ থেবা।

⁷ গোজেনর্ এই ঘরর্ কামত্ তুমি মানা ন গুরিবে। যিহূদীগুনোর শাজন্‌‍‍‍‌‍‍‍গুরিয়্যে আর তারার্ বুড়ো নেতাগুনে গোজেনর্ সেই ঘরান আগ জাগানদই আরঅ বানাদোক্।

⁸ ইয়েনিবাদেয়ো গোজেনর্ সেই ঘরান্ বানেবার কামত্ যিহূদীগুনোর্ বুড়ো নেতাগুনোত্তে তমার্ যিয়েনি গরা পুরিবো সেই বেপারে মুই উগুম দুয়োঙর্। সেই কামান্ যেনে বন্ধ ওই ন যায় সেনত্যে সেই মানুচ্চুুনোত্তুন্ পুরো খরচপাদিগানি রাজভান্ডালত্তুন্ দিয়্যে পুরিবো, অত্তাৎ ইউফ্রেটিস গাঙর্ পোজিম্ পারর্ চাগালাগানির্ রাজখাজানাত্তুন্।

⁹ স্বর্গর গোজেনর্ নাঙে পূজ্যে-উৎসর্গত্তে যিরূশালেমর্ ধর্মগুরুগুনোর্ বলদ্ গোরু, ভেড়া আর ভেড়ার্ ছঅ আর গম, নুন, আংগুর-রস আর তেল, অত্তাৎ যিয়েনি দরকার সিয়েনি দিয়্যে পুরিবো। তারার চাইদ্যে ধোক্ক্যেন পত্তিদিন ইয়েনি খামাক্কায় দিয়্যে অবঅ,

¹⁰ যেনে তারা স্বর্গর গোজেনর্ নাঙে গুজি লইদ্যেবাবোত্যে উৎসর্বর অনুষ্ঠান গুরি পারন আর রাজা আহ্ রাজার্ পুয়োগুনোর্ ভালেদিত্যে তবনা গুরি পারন।

¹¹ মুই আরঅ উগুম দুয়োঙর্, যুুদি কেঅ এই উগুমান অমান্য গরে সালেন্ তা ঘরত্তুন্ এক্কান তক্তা নিগিলেই আনিনে সিয়েন্দোই তারে এফুর-উফুর্ গরা অবঅ। তার্ এই অন্যেয়ানত্যে তা ঘরান্ এক্কান আঢং-কজরার্ কুড় বানা অবঅ।

¹² কনঅ রাজা বা কনঅ জাদে যুদি এই উগুমান অমান্য গুরিনে যিরূশালেমর্ সেই উবোসনা-ঘরান ভস্ত গুরিবাত্যে যায় সালেন্ গোজেনে, যিবে সিয়েনত্ বজত্তি গরে তে যেনে তারে ভস্ত গরে। মুই দারিয়াবস এই উগুমান দুয়োঙর্। ইয়েন যেনে যত্তন্ গুরিনে পালন্ গরা অয়।

উবোসনা-ঘরর্ কাম থুম্ অনা

¹³ রাজা দারিয়াবসে সেই উগুমান পাদেয়্যে বিলিনে ইউফ্রেটিস গাঙর্ পোজিম্ পারর্ চাগালানির্ শাজন্‌‍‍‍‍গুরিয়্যে তত্তনয়, শথরবোষণয় আর সিদুগোর্ দাঙর্ পোজিশনর্ কামগুরিয়্যেগুনে সিয়েন যত্তন্ গুরিনে পালেলাক্।

¹⁴ ভাববাদী হগয় আর ইদ্দোর বংশধর সখরিয় গোজেনর্ কধা মজিম্ উচ্চোমি দের্ আর তা সমারে সমারে যিহূদীগুনোর বুড়ো নেতাগুনে গাথনি কামান্ গমেডালে চালেই যাহ্ ধুরিলাক্। ইস্রায়েলর্ গোজেনর্ উগুম মজিম্ আর পারস্যের রাজা কোরস, দারিয়াবস আর অর্তক্ষস্তর উগুমে তারা উবোসনা-ঘরান্ বানেবার কামান্ থুম্ গুরিলাক্।

¹⁵ রাজা দারিয়াবসর রাজাগিরির ছয় বজরত্ অদর মাজর্ তিন দিনোত্ উবোসনা-ঘরর্ কামান্ থুম অলঅ।

¹⁶ সে পরেদি ইস্রায়েলীয়গুনে, অত্তাৎ ধর্মগুরুগুনে, লেবীয়গুনে আর বন্দীদজাত্তুন্ ফিরি এচ্চ্যে বাদবাগি মানুচ্চুনে হুজিয়ে-রাজিয়ে গোজেনর্ ঘরান্ থিদেবর্ গুরিলাক্।

¹⁷ গোজেনর্ ঘরান থিদেবর্ গুরিবাত্যে তারা একশত্ বলদ্ গোরু, দ্বিশত্ ভেড়া আর চেরশত্ ভেড়ার্ ছঅ উৎসর্গ গুরিলাক্। ইয়েনবাদে বেক্ ইস্রায়েলর পাপ-উৎসর্বত্যে ইস্রায়েলর্ গুট্টির মানুচ্ মজিম তারা বারবো ছাগল উৎসর্ব গুরিলাক্।

¹⁸ মোশির বোইবোত্ যেবাবোত্যে লেগা এলঅ সেই মজিম্ যিরূশালেমত্ গোজেনর সেবা-কামত্যে ধর্মগুরুগুনোরে আর লেবীয়গুনোরে নানান্ দলত্ নেযা অলঅ।

উদ্ধোর-পরব্

¹⁹ বন্দীদযাত্তুন্ ফিরি এচ্চ্যে মানুচ্চুনে পত্তম্ মাজর্ চৌদ্দ দিনোত্ উদ্ধোর-পরপ্পো পালেলাক্।

²⁰ ধর্মগুরু আর লেবীয়গুনে নিজোরে সিজি গুরিলাক্, সেক্কে তারা বেক্কুনে সিজি অলাক্। লেবীয়গুনে নিজোত্তে, বন্দীদযাত্তুন্ ফিরি এচ্চ্যে বেক্ মানুচ্চুনোত্যে আর তারার্ ধর্মগুরু ভেইয়ুনোত্যে উদ্ধোর-পরবর্ ভেড়া গদ্দান্ দিলাক্।

²¹ বন্দীদযাত্তুন্ ফিরি এচ্চ্যে ইস্রায়েলীয়গুনে আর দেজত্ বজত্তি গুরিয়্যে ইস্রায়েলীয়গুনে যিগুনে ইস্রায়েলর গোজেন লগেপ্রভুর আওজ্ মজিম চলিবাত্যে তারার্ অযিহূদী পাড়াল্যেগুনোর্ ফিবলা খাচ্চ্যেগত্তুন্ নিজোরে যুদো গোজ্যন্ তারা বেক্কুনে একসমারে সেই য়েরাগান্ হেলাক্।

²² সাত দিন সং তারা হুজিয়ে-রাজিয়ে সদানেইয়্যে রুটির পরব্ পালেলাক্। তারা হুজিয়ে ভর্‌‍‍‍‍‍পুণোং ওইয়োন, কিত্যে আসিরিয়ার রাজা যেনে ইস্রায়েলর গোজেনর্ ঘরর্ কামত্ তারারে সাহায্য গুরে সেনত্যে লগেপ্রভু তা মনান্ বুদুলি দিয়্যে।