ইষ্রা 5 - Chakma Bible

দারিয়াবসর ইধু চিধি

¹ রাজা দারিয়াবসর্ রাজাগিরির দ্বিবজরত্ ভাববাদী হগয় আর ইদ্দোর বংশধর ভাববাদী সফরিয় ইস্রায়েলর গোজেনর্ নাঙে যিহূদা আর যিরূশালেমর্ যিহূদীগুনো ইধু গোজেনর্ দিয়্যে কধা কুয়ো ধুরিলাক্।

² সেক্কে শল্টীয়েলর পুয়ো সরুব্বাবিল আর যোষাদকর পুয়ো যেশূয় যিরূশালেমত্ গোজেনর্ ঘরান আরঅ বানেবাত্যে আঢ্ দিলাক। গোজেনর্ ভাববাদীগুনেয়ো তারারে সাহায্য গরা ধুরিলাক।

³ সেক্কে ইউফ্রেটিস গাঙর্ পোজিম্ পারর্ চাগালাগুনোর শাজন্‌গুরিয়্যে তত্তনয়, শথরবোষণয় আর সিদুগোর্ দাঙর্ পোজিশনর্ কামগুরিয়্যেগুনে যিহূদীগুনো ইধু যেইনে তারারে কলাক্, “উবোসনা-ঘরান আরঅ বানেবাত্যে কন্না তমারে উগুম দিয়্যে?”

⁴ তারা আরঅ কলাক্, “যিগুনে এই বিল্ডিঙান্ বানেয়োন তারার্ নাঙানি কি?”

⁵ মাত্তর্ যিহূদীগুনোর্ বুড়ো নেতাগুনো ইন্দি গোজেনে মনযোগ দিলো। যেদকবিলোন্ সং দারিয়াবস ইধু হবর্ পাঢা ন অলঅ আর তাত্তুন্ লেখ্যে জোব্‌পান পাহ্ ন গেলঅ সেদকবিলোন্ সং নেতাগুনে কামানি থামেই ন দিলাক্।

^6-7 ইউফ্রেটিস গাঙর্ পোজিম্ পারর্ চাগালাগানির্ শাজন্‌গুরিয়্যে তত্তনয়, শথরবোষণয় আর সিধুগোর্ দাঙর্ পোজিশনর্ কামগুরিয়্যেগুনে রাজা দারিয়াবসর ইধু যে চিধিগান পাদেয়্যে সিয়েন এবাবোত্যে: মহারাজ দারিয়াবস, তর্ ভালেদি ওক্।

⁸ মহারাজে যেনে হবর্ পায় যে, আমি যিহূদা রেজ্যত্ দাঙর্ গোজেনর্ ঘরত্ যেইয়্যেই। মানুচ্চুনে দাঙর্ দাঙর্ পাত্তরলোই ঘরান্ বানেয়োন আর দেবাল উগুরে বীম বজাদন্। অমকদ যত্তন্ গুরিনে কামান্ গরা অর্ আর সিয়েন ফলেদে ধোক্ক্যেন উজেই যার্।

⁹ বুড়ো নেতাগুনোরে আমি পিযের্ গুরিলোং, “উবোসনা-ঘরান্ আরঅ বানেবাত্যে কন্না তমারে উগুম দিয়্যে?”

¹⁰ আমি তারার্ নাঙানিয়ো পিযের্ গোজ্যেই যেনে তারার্ নেতাগুনোর্ নাঙানি তরে জানেবাত্যে লিগি রাগেই পারি।

¹¹ জোবত্ তারা আমারে কলাক্, “আমি স্বর্গ আর পিত্‌থিমীর্ গোজেনর্ দাস। আমি সেই উবোসনা-ঘরান আরঅ বানের্ যিয়েন ইস্রায়েলর এক্কো দাঙর্ রাজা ভালোক্ দিন আগেদি বানেইনে থুম্ গোজ্যে।

¹² মাত্তর্ আমা পূরোণি মানুচ্চুনে স্বর্গর গোজেনরে অহুজি গোজ্যন্ বিলিনে তে বাবিলোর্ রাজা কল্‌দীয় নবূখদ্‌নিৎসরর্ এই উবোসনা-ঘরান ভস্ত গোজ্যে আর মানুচ্চুনোরে বন্দী গুরিনে বাবিলোত্ নেযেয়্যে।

¹³ মাত্তর্ বাবিলোর্ রাজা কোরসর রাজাগিরির পত্তম্ বজরত্ তে গোজেনর্ এই ঘরান্ আরঅ বানেবার উগুম দিয়্যে।

¹⁴ এমন কি, তে বাবিলোর্ মন্ডিরোত্তুন্ গোজেন ঘরর্ সেই বেক্ সনা আর রুবোর পিলেগুন নিগিলেই দিয়্যে যিগুন নবূখদ্‌নিৎসরে যিরূশালেমর্ উবোসনা-ঘরত্তুন্ নেযেয়্যে। রাজা কোরসে সিগুন তার্ নেযেয়্যে শাজন্‌গুরিয়্যে শেশ্‌বসরর আঢত্ দিয়্যে।

¹⁵ রাজা তারে কোইয়্যেদে, তে যেনে যিরূশালেমত্ আগ জাগানদই গোজেনর্ ঘরান আরঅ বানায় আর সেই পযাপিরানি নেযেইনে সিয়েনত্ থুবেই থয়।

¹⁶ সেনত্তে শেশ্‌বসরে এইনে যিরূশালেমত্ গোজেনর্ ঘরর্ গড়াগান্ থিদেবর্ গোজ্যে। সেদিন্যেত্তুন্ ধুরি এচ্চ্যে সং সিয়েনর্ বানানার্ কামান্ চলের্, এজঅ থুম্ ন অয়।”

¹⁷ ইক্কিনে মহারাজে যুদি চায় সালে বাবিলোর্ রাজ-সরকারর কাগজপাদি রাগেবার জাগায়ান্ থবাত্তে যেইনে দেগিবাক্ যে, ‍যিরূশালেমত্ গোজেনর্ এই ঘরান বানেবার উগুমান রাজা কোরসে ঘেচ্চ্যেকগুরি দিয়্যে কিনা। সে পরেদি এই বেপারে মহারাজে যিয়েনি ঠিগ্ গুরিবো সিয়েনি যেনে আমারে জানেই দে।