ইষ্রা 4 - Chakma Bible

উবোসনা-ঘরান্ বানাদে মানা

¹ যিহূদা আর বিন্যামীনোর মানুচ্চুনোর শত্রুগুনে শুনিলাক্কে যে, বন্দীগুনে ফিরি এইনে ইস্রায়েলর্ গোজেন নাঙে এক্কান উবোসনা-ঘর বানাদন্।

² সেই শত্রুগুনে যেক্কে সরুব্বাবিল আর বংশর নেতাগুনো ইদু এইনে কলাক্, উবোসনা-ঘর বানেবার কামত্ আমিয়ো তমা সমারে মিজেবং, কিত্যে তমা ধোক্ক্যেন আমিয়ো তমা গোজেনর্ আওজ্ মজিম্ চলিবাত্তে চেট্ট্যা গুরির। আসিরিয়ার রাজা এসর-হদ্দোন আমা ইদু আনিবার পরেত্তুন্ ধুরি গোজেনর্ নাঙে আমি য়েমান-উৎর্সগ গুরি এজির্।

³ মাত্তর্ সরুব্বাবিল, যেশূয় আর ইস্রায়েলর অন্য নেতাগুনে কলাক্, “আমা গোজেনর্ নাঙে ঘর বানেবার কামত্ আমা সমারে তমার কনঅ কুদুম্মো নেই। পারস্যের রাজা কোরসর উগুম মজিম্ ইস্রায়েলর গোজেন লগেপ্রভুর নাঙে আমি নিজেই সিয়েন গুরিবোং।”

⁴ সেক্কে তারার দেজত্ বজত্তি গুরিয়্যে অন্য জাদ্‌‌‌তুনে যিহূদার মানুচ্চুনোরে উচ্চোমিগানি দোঙেই দিবাত্তে আর দর্‌‌‌বুগ্ লাগা ধুরিলাক্ যেনে তারা সেই ঘরান ন বানান্।

⁵ তারার্ বিরুদ্ধে কাম গুরিনে তারার্ উদ্দেশ্যগান বাদ দিবাত্তে তারা পারস্যের রাজার কামগুরিয়্যেগুনোরে টেঙা দিলাক। তারা রাজা কোরসর পুরো রাজাগিরিত্ আর সে পরেদি রাজা দারিয়াবসর রাজাগিরিত্ সেই একই কাম গরা ধুরিলাক্।

পারস্যের অন্য রাজাগুনোর্ সময়োত্ কামত্ মানা গরানা

⁶ অহশ্বেরশর রাজাগিরির আরাম্ভত্ সেই শত্রুগুনে যিহূদা আর যিরূশালেমর্ মানুচ্চুনোর বিরুদ্ধে এক্কান আবিত্তি লিগিনে জানেলাক্।

⁷ পারস্যের রাজা অর্তক্ষস্তর সময়োত্অ বিশ্লম, মিত্রদাৎ, টাবেল আর তার অন্য সমাজ্যেগুনে অর্তক্ষস্ত ইদু এক্কান চিদি লিগিলাক্। সেই চিদিগান্ অরামীয় কধাদি অনুবাদ গুরিনে লেগা অলঅ।

⁸ যিরূশালেমর বিরুদ্ধে রাজা অর্তক্ষস্ত ইদু শাজন্‌‌‌‌গুরিয়্যে রহূম আর লিগিয়্যে শিম্‌শয়র চিদি।

^9-10 (শাজন্‌‌‌‌গুরিয়্যে রহূম আর লিগিয়্যে শিম্‌শয় এই চিদিগান্ লেখ্যে। তারা সমারে আঘন্ বিচের্‌‌‌‌গুরিয়্যেগুন, কামগুরিয়্যেগুন, দাঙর্ পোজিশনবলাগুন্, পরিচালগ্‌‌‌‌কুনে আর এরকীয়, বাবিলীয় আর শূশার এলমীয় মানুচ্চুন আর অন্য মানুচ্চুুনে যিগুনে দাঙর্ আর সর্মানিত অশূরবানিপাল শমরিয়ার আদাম আর শঅরত্ আহ্ ইউফ্রেটিস গাঙর্ পশ্চিম পারর অন্য চাগালাত্ বজত্তি গুরিবাত্তে দিয়্যে।)

¹¹ তারা রাজা অর্তক্ষস্ত ইদু যে চিদিগান্ লেখ্যে সিয়েন এধোক্ক্যেন্: “তর্ চাগরুনে, অত্তাৎ ইউফ্রেটিস গাঙর্ পশ্চিম পারর্ মানুচ্চুনে রাজা অর্তক্ষস্ত ইদু লেখ্যে।

¹² মহারাজর্ জানা দরকার যে, তত্তুন্ যে যিহূদীগুনে আমা ইদু এচ্চ্যন্ তারা যিরূশালেমত্ যেয়োন্ আর উল্লোমী আহ্ বজং শঅরান্ আরঅ বানাদন্; তারা ইয়েনর্ দেবালান্ আর গড়াগান্ ঠিগ্ গরদন্।

¹³ মহারাজর্ আরঅ জানা দরকার যে, যুদি সেই শঅরান্ আর দেবালান্ আরঅ বানা অয় সালে সেই মানচ্চুনে খাজনা, কর্‌ বা শুল্ক ন দিবাক্। সেক্কে রাজার আয়র ক্ষতি অবঅ।

¹⁴ আমি রাজঘরর্ নুন হেই সেনত্তে রাজারে অসর্মানিত অবাত্তে দেগদে আমার্ উজিত্ নয়। সেনত্তে আমি এই হবরান্ রাজার ইদু পাদের্।

¹⁵ ইয়েনত্ রাজা যেনে তার পূরোণী মানুচ্চুনোর্ বিজগ বোইবোত্ তোগেইনে চান্। সেই বোইবো ভিদিরে তুই দেগিবেদে যে, যিরূশালেমান এক্কান উল্লোমী শঅর্; এই শঅরান্ রাজাগুনোর্ আর রেজ্যগানির্ শাজন্‌‌‌‌‌গুরিয়্যেগুনোরে বোউত্ দুঘ্ দুয়োন আর ভালোক্ দিন আগেত্তুন্ ধুরি সেই শঅরত্ বিদ্রোহ ওই এজের্। সেনত্যে সেই শঅরানরে ভস্ত গরা ওইয়্যে।

¹⁶ আমি রাজারে জানের্, এই শঅরান্ যুদি আরঅ বানা অয় আর সিয়েনর্ দেবালানি তুলো অয়, সালে ইউফ্রেটিস গাঙর্ পোজিম্ পারর্ চাগালানিত্ তর্ অধীনোত্ বিলিনে কিচ্ছু ন থেবঅ।”

¹⁷ সেক্কেনে রাজা সেই চিদির্ এই জোব্‌পান পাদেই দিলো: “শাজন্‌গুরিয়্যে রহূম, লিগিয়্যে শিম্‌শয় আর শমরিয়া আর ইউফ্রেটিস গাঙর্ পোজিম্ পারর্ নানান্ চাগালাত্ বজত্তিগুরিয়্যে অন্য দাঙর্ পোজিশনর্ কামগুরিয়্যেগুনো ইদু মুই লেগঙর্। তমার্ ভালেদি ওক্।

¹⁸ যে চিধিগান তুমি আমা ইধু পাদেয়ো সিয়েন অনুবাদ গুরিনে পড়া ওইয়্যে।

¹⁹ মুই উগুম গুরিলে পরেদি সিয়েন বিজিরে ওইয়্যে আর হবর্ পাহ্ যেইয়্যেদে যে, ভালোক্ বজর্ আগেত্তুন্ ধুরি সেই শঅরানে রাজাগুনোর বিরুদ্ধে উল্লোমী গুরি এজের্; আজলে সিয়েন এমন এক্কান শঅর্ যিয়েনর্ মানুচ্চুনে শাজন্ ন মানন্।

²⁰ খেমতাবলা রাজাগুনে ‍যিরূশালেমত্তুন্ ধুরি ইউফ্রেটিস গাঙর্ পোজিম্ পারর্ বেক জাগায়ানিত্ রাজাগিরি গুরি এচ্চ্যন্ আর সিদুগোর্ মানুচ্চুনে তারার্ খাজনা, কর্‌ আর শুল্ক দুয়োন্।

²¹ ইক্কুনি তুমি সে মানুচ্চুনোর্ কামানি বন্ধ গুরিবাত্তে উগুম দুয়ো যেনে মর্ উগুম ন পানা সং সেই শঅরান্ আরঅ তুলো ন অয়।

²² উজিয়ার্, এই কামত্ যেন এলাফেলা গরা ন অয়। কিত্যে রাজ-সরকারর খেতিগান্ বাড়িবাত্তে দিয়্যে অবঅ?”

²³ রাজা অর্তক্ষস্তর চিধিগান্ রহূম, লিগিয়্যে শিম্‌শয় আর অন্য দাঙর্ পোজিশনর্ কামগুরিয়্যেগুনোরে পোড়েই শুনোনার্ লগে লগে তারা যিরূশালেমর যিহূদীগুনো ইধু গেলাক্ আর জোর্ গুরিনে কাম বন্ধ গুরিবাত্তে তারারে বাধ্য গুরিলাক্।

²⁴ এবাবোত্যেগুরি যিরূশালেমর্ গোজেনর্ ঘরর্ কামান্ বন্ধ ওই গেলঅ; পারস্যের রাজা দারিয়াবসর রাজাগিরির দ্বিবজর সং সিয়েন বন্ধ থেলঅ।