ইষ্রা 3 - Chakma Bible

পূজোবো আরঅ বানা অলঅ

¹ ইস্রায়েলীয়গুনে নিজোর্ নিজোর্ আদামত্ আর শঅরত্ বজত্তি গরানা আরাম্ভ গরানার্ পরেদি সাত মাজত্ বেক মানুচ্চুনে একসমারে মিলিনে যিরূশালেমত্ এগত্তর্ অলাক্।

² সে পরেদি যোষাদকর্ পুয়ো যেশূয় আর তা সমাজ্যে ধর্মগুরুগুন আর শল্টীয়েলর্ পুয়ো সরুব্বাবিল আর তা সমাজ্যেগুনে পূজ্যে-উৎসর্বর অনুষ্ঠানত্যে গোজেনর্ মানুচ্ মোশির রীদি-সুদোমর লেগা মজিম্ ইস্রায়েলর্ গোজেনর্ পূজোবো বানেলাক্।

³ তারার্ চেরোকিত্যে মানুচ্চুনোরে তারা দোরেলেয়ো আগ গড়াগান উগুরে তারা পূজোবো বানেলাক্ আর তা উগুরে বেন্যেমাদান্ আর উৎসর্বর সময়োত্ লগেপ্রভুর নাঙে পূজ্যে উৎসর্বর অনুষ্ঠান গরা ধুরিলাক্।

⁴ সে পরেদি তারা বোইবোর কধামজিম্ নাঢা মান্‌‍‍জ্যর্ ঘরর্ পরব্ পালেলাক্ আর পত্তি দিনোর্ ঠিগ সংখ্যে মজিম্ পূজ্যে-উৎসর্গর অনুষ্ঠান গুরিলাক্।

⁵ সে পরেত্তুন্ ধুরি তারা পত্তিদিন পুজ্যে-উৎসর্গ, আঙোচ্যের্ পুজ্যে-উৎসর্গ, লগেপ্রভুর নাঙে ঠিগ্ গোজ্যে পরবর্ পুজ্যে-উৎসর্গ আর নিজোর্ আওজে আন্যে পুজ্যে-উৎসর্গর অনুষ্ঠান্ গরা ধুরিলাক্।

⁶ যুদিয়ো সেক্কেনে লগেপ্রভুর ঘরর্ গড়াগান্ গাড়া ন অয় তো তারা সাত্ মাজর্ পত্তম দিনোত্তুন্ ধুরি লগেপ্রভুর নাঙে পূজ্যে-উৎসর্বর অনুষ্ঠান গরা ধুরিলাক্।

উবোসনা-ঘরান্ আরঅ বানা অলঅ

⁷ তারা রাজমিস্ত্রি আর গাজমিস্ত্রিরে টেঙা দিলাক্ আর সীদোন আর সোরর মানুচ্চুনোরে হানা, আংগুর-রস আর তেল দিলাক্ যেনে তারা পারস্যের রাজা কোরসের অনুমতি মজিম্ লেবাননত্তুন্ যাফো সং বড় গাঙ পধেদি এরস গাজ আনি পারিদাক্।

⁸ যিরূশালেমত্ গোজেনর্ ঘরত্ ‍লুমিবার পরেদি দ্বিবজরত্ দ্বিমাজত্ শল্টীয়েলর পুয়ো সরুব্বাবিল, যোষাদকর পুয়ো যেশূয় আর তারার্ বাদবাগী ভেইয়ুনে কাম গুরিবাত্তে আরাম্ভ গুরিলাক্। এই ভেইয়ুনে অলাক্ ধর্মগুরু, লেবীয় আর অন্য বেক্ মানুচ্চুন যিগুনে বন্দীদযাত্তুন্ যিরূশালেমত্ ফিরি এচ্চ্যন্। কুড়ি বজর্ আর তাত্তুন্ বেশ বয়জর্ লেবীয়গুনোরে লগেপ্রভুর ঘর বানেবার কামত্ দেগাশুনো গুরিবাত্তে নেযা অলঅ।

⁹ যেশূয় আর তার্ পুয়োগুনে আর ভেইয়ুনে, হোদবিয় বংশর কদ্‌মীয়েলে আর তার পুয়োগুনে এগত্তর্ ওইনে যিগুনে গোজেনর্ ঘরত কাম গোজ্যন্ তারারে দেগাশুনো গরা ধুরিলাক্। ইগুনে বেক্কুনে লেবীয় এলাক্।

¹⁰ রাজমিস্ত্রিগুনে যেক্কে লগেপ্রভুর ঘরর্ গড়াগান থিদেবর্ গুরিলাক্ সেক্কে ইস্রায়েলর রাজা দায়ূদোর উগুম মজিম্ লগেপ্রভুরে বাঈনী গুরিবাত্তে ধর্মগুরুগুনে তারার্ ঠিগ গোজ্যে পোজাক্কানি পিনিনে তূরীলোই আর লেবীয়গুনো ভিদিরেত্তুন্ আসফর পুয়োগুনে ঝোন্‌‌ঝোনিলোই যে যিগুনোর্ জাগানত্ থিয়্যেলাক্।

¹¹ লগেপ্রভুরে বাঈনী আর ভালেদির্ গীত্ গাদে গাদে তারা গেলাক্, তে ভালেদিগুরিয়্যে, ইস্রায়েল উগুরে তার্ কোচ্‌‌‌পানাগান্ উমরত্যে থিদেবর্ গোজ্যে। লগেপ্রভুর ঘরর গড়াগান্ থিদেবর্ গরা ওইয়্যে বিলিনে বেক্ মানুচ্চুনে অমকদ রঅ ছাড়িনে লগেপ্রভুরে বাঈনী গুরিলাক্।

¹² মাত্তর্ ভালোকজনে যেক্কেনে হুজিয়ে রঅ ছাড়ি উদিলাক্ সেক্কে যিগুনে আগ উবোসনা ঘরান্ দেখ্যন সেধোক্ক্যেন বোউত্ বুড়ো ধর্মগুরু, লেবীয় আর বংশর নেতা এই উবোসনা-ঘরর গড়াগান থিদেবর্ গত্তে দেগিনে রঅ ছাড়ি ছাড়ি কানা ধুরিলো।

¹³ মানুচ্চুনে এদক্ রঅ ছাড়িলাক্কে যে, কুবো হুজির রঅ আর কানানার্ রঅ কনজনে সিয়েন বুঝি ন পারিলাক। বোউত্ দূরোত্তুন্ সেই রঅগুন শুনো যেইয়্যে।