ইষ্রা 10 - Chakma Bible

ইষ্রায়েলীয়গুনোর্ পাপ স্বীগের্

¹ ইষ্রা যেক্কে গোজেন ঘর মুজুঙোত্ উবোত্ পুন্দুরী ওইনে তবনা গরের্ আর পাপ স্বীগের্ গরের্ আর কানের্ সেক্কে ইস্রায়েলীয়গুনোর মরদ্, মিলে আর পুয়ো-ঝিগুনোর এক্কো দাঙর্ দল তাইধু এগত্তর্ ওইয়োন। তারায়ো অমকদ কান্নোন্।

² সেক্কে এলমর এক্কো বংশধর যিহীয়েলর পুয়ো শখনিয় ইষ্রারে কলঅ, “আমা দেজত্ বজত্তিগুরিয়্যে অন্য জাদর্ মিলেগুনোরে লোইনে আমি আমা গোজেন ইধু অবিশ্বেজি ওইয়্যেই; মাত্তর্ সিয়েন অলেয়ো ইস্রায়েলীয়গুনোর্ ইক্কিনিয়ো আশা আঘে।

³ ইক্কিনে এজঅ, আমা গোজেন মুজুঙোত্ আমি এ এগেমান্ গুরিই, আমার গিরোজ্ তর্ সল্লা মজিম আর আমা গোজেনর্ উগুমানরে যিগুনে দরান্ তারার্ সল্লা মজিম আমি এ মিলেগুনোরে আর তারার্ ঝি-পুয়োগুনোরে বাদ দিবোং। রীদি-সুুদোম মজিম সিয়েন গরা ওক্।

⁴ তুই উঠ; এ বেপারে কাম গরানা দঅ তর্ দায়িত্ব। আমি তরে সাহায্য গুরিবোং, সেনত্যে তুই সাহসী ওইনে কাম গর্।”

⁵ সেক্কে ইষ্রা উদিলো আর সেই কধা মজিম কাম গুরিবাত্যে আজল্ ধর্মগুরুগুনোরে, লেবীয়গুনোরে আর সিধু এগত্তর্ ওইয়্যে ইস্রায়েলীয়গুনোরে শমক্ হাবেল। তারা বেক্কুনে শমক্ হেলাক্।

⁶ সে পরেদি ইষ্রা গোজেনর্ ঘর মুজুঙোত্তুন্ ইলীয়াশীবর পুয়ো যিহোহাননর ঘুদিবোত্ গেলঅ। তে সিয়েনত্ হানা বা পানি কিচ্ছু ন হেলঅ, কিত্যে বন্দীদযাত্তুন্ ফিরি এচ্চ্যে মানুচ্চুনোর অবিশ্বেজত্যে তে আবিলেচ্ গুরিলো।

⁷ বন্দীদযাত্তুন্ ফিরি এচ্চ্যে বেক্ মানুচ্চুনে যেনে যিরূশালেমত্ এইনে এগত্তর্ অন্ সেনত্যে যিহূদা আর যিরূশালেমর বেক্ জাগানিত্ এক্কান ফগদাং গরা অলঅ।

⁸ যে কনজনে তিন দিনো ভিদিরে আঝিল্ ন অবাক্, দাঙর্ পোজিশনর্ কামগুরিয়্যে আর বুড়ো নেতাগুনোর্ সল্লা মজিম তার্ বেক্ সোম্বোত্তিগানি আক্‌‌‌সো দিয়্যে অবঅ আর বন্দীদযাত্তুন্ ফিরি এচ্চ্যে মানুচ্চুনোরে সমাজত্তুন্ নিগিলেই দিয়্যে অবঅ।

⁹ তিন দিনো ভিদিরে যিহূদা আর বিন্যামীন চাগালার্ বেক্ মানুচ্চুনে যিরূশালেমত্ এগত্তর্ অলাক্। নয় মাজত্ কুড়ি দিনোর্ দিন্নোত্ বেক মানুচ্চুনে গোজেনর্ ঘর মুজুঙো চক্করবোত্ বোইনে সে বেপারানত্যে আর অমকদ ঝড়ানত্যে গির্‌‌‌‌গিরাদন্।

¹⁰ সেক্কে ধর্মগুরু ইষ্রা উদিনে থিয়্যেইনে তারারে কলঅ, “তুমি অবিশ্বেজি ওইয়ো, অন্য জাদর্ মিলেগুনোরে লোইনে তুমি ইস্রায়েলীয়গুনোর্ পাপ সমারে আর পাপ মিজেয়ো।

¹¹ ইক্কিন তুমি তমার্ পূরোণি মানুচ্চুনোর গোজেন লগেপ্রভু ইধু পাপ স্বীগের গুরিনে তার্ আওজ্ মজিম কাম গরঅ। তমা দেজত্ বজত্তিগুরিয়্যে মানুচ্চুনোর আর অন্য জাদর্ মিলেগুনোত্তুন্ নিজোরে যুদো গরঅ।”

¹² সেক্কে বেক্ মানুচ্চুনে অমকদ জোরে কলাক্, “তুই ঠিগ্ কধা কোইয়োজ্; তুই যেবাবোত্যে কোইয়োচ্ সেবাবোত্যেগুরি আমাত্তুন্ গরা পুরিবো।

¹³ মাত্তর্ মানুচ্ ভালোক্কুন্ আর ইক্কিনে অমকদ ঝড় পড়ের্, সেনত্যেই আমি বারেদি থিয়্যেই থেই ন-পারির্। সিয়েনবাদে এ বেপারে মীমাংসা এক বা দ্বিদিনো ভিদিরে ওই ন পারে, কিত্যে আমি ভালোকজনে এ পাপ্পান গোজ্যেই।

¹⁴ আমা দাঙর্ পোজিশনর্ কামগুরিয়্যেগুনে যেনে পুরো সমাজর নেতা অন্। সে পরেদি আমার নানান্ আদাম আর শঅর ভিদিরে যিগুনে অন্য জাদর্ মিলেরে লোইয়োন্ তারা পত্তিজনে তারার্ বুড়ো নেতাগুনোরে আর বিচেরগ্‌কুনোরে লোইনে এক্কো ঠিগ্ সময়োত্ যিরূশালেমত্ এজোদোক্। সেক্কে এই পাপ্পানত্যে আমা গোজেনর্ দর্‌গরেপারা রাগ্‌কান্ আমাত্তুন্ যেবগোই।”

¹⁵ এই কধাগানর্ বিরুদ্ধে থিয়্যের বানা অসাহেলর পুয়ো যোনাথন আর তিক্‌বর পুয়ো যহসিয়; তারার্ পক্ষে এলদে মশুল্লম আর লেবীয় শব্বথয়।

¹⁶ বন্দীদযাত্তুন্ ফিরি এচ্চ্যে মানুচ্চুনে সেই কধামজিম্ কামানি গুরিলাক্। ধর্মগুরু ইষ্রা পত্তি বংশত্তুন্ নেতা বেঈ ললঅ। দশ মাজর্ পত্তম্ দিনোত্ তারা সেই বেপারে উদো লবাত্যে বজিলাক্।

¹⁷ যিগুনে অন্য জাদর্ মিলেগুনোরে লোইয়োন্ তারার্ বেক্কুুনোর উদো লবার্ কামান্ তারা যেরেদি বজরর্ পত্তম মাজর্ পত্তম্ দিনোত্ থুম গুরিলাক্।

অন্য জাদর্ মিলেগুনোরে লোইয়্যে মানুচ্চুনোর্ নাঙানি

¹⁸ যিগুনে অন্য জাদর্ মিলেগুনোরে লোইয়োন তারার্ নাঙানি ইয়েনি: ধর্মগুরুগুনো ভিদিরে যোষাদকর পুয়ো যেশূয়র আর তা ভেইয়ুনোর্ বংশধরুনো ভিদিরে মাসেয়, ইলীয়েষর, যারিব আর গদলিয়।

¹⁹ ইগুনে বেক্কুনে নিজোর্ নিজোর্ মোগ্‌কুনোরে ছুড়্ কাবোজ্ দিবাক্ বিলিনে এগেম্ গুরিলাক্ আর তারার্ দুষত্তে তারা পত্তিজনে পালত্তুন্ এক্কো গুরি ভেড়া লোইনে দুষ উৎসর্বর অনুষ্ঠান গুরিলাক্।

²⁰ ইম্মেরর বংশধরুনো ভিদিরে হনানি আর সবদিয়।

²¹ হারীমর বংশধরুনো ভিদিরে মাসেয়, এলিয়, শময়িয়, যিহীয়েল আর উষিয়।

²² পশহূরর বংশধরুনো ভিদিরে ইলীয়ৈনয়, মাসেয়, ইশ্মায়েল, নথনেল, যোষাবদ আর ইলিয়াসা।

²³ লেবীয়গুনো ভিদিরে যোষাবদ, শিমিয়ি, কলায়, অত্তাৎ কলীট, পথাহিয়, যিহূদা আর ইলিয়েষর।

²⁴ গানগেইয়্যেগুনো ভিদিরে ইলীয়াশীব। চুগিদারুনো ভিদিরে শল্লুম, টেলম আর ঊরি।

²⁵ অন্য ইস্রায়েলীয়গুনো ভিদিরে- পরিয়োশর বংশধরুনো ভিদিরে রমিয়, যিষিয়, মল্কিয়, মিয়ামীন, ইলিয়াসর, মল্কিয় আর বনায়।

²⁶ এলমর বংশধরুনো ভিদিরে মত্তনিয়, সখরিয়, যিহীয়েল, অব্দি, যিরেমোৎ আর এলিয়।

²⁷ সত্তূর বংশধরুনো ভিদিরে ইলিয়ৈনয়, ইলিয়াশীব, মত্তনিয়, যিরেমোৎ, সাবদ আর অসীসা।

²⁸ বেবয়র বংশধরুনো ভিদিরে যিহোহানন, হনানিয়, সব্বয় আর অৎলয়।

²⁹ বানির বংশধরুনো ভিদিরে মশুল্লম, মল্লূক, অদায়া, যাশূব, শাল আর যিরমোৎ।

³⁰ পহৎ-মোয়াবর বংশধরুনো ভিদিরে অদ্‌ন, কলাল, বনায়, মাসেয়, মত্তনিয়, বৎসলেল, বিন্নূয়ী আর মনঃশি।

³¹ হারীমর বংশধরুনো ভিদিরে ইলিয়েষর, যিশিয়, মল্কিয়, শময়িয়, শিমিয়োন,

³² বিন্যামীন, মল্লূক আর শমরিয়।

³³ হশূমর বংশধরুনো ভিদিরে মত্তনয়, মত্তত্ত, সাবদ, ইলীফেলট, যিরেময়, মনঃশি আর শিমিয়ি।

³⁴ বানির বংশধরুনো ভিদিরে মাদয়, অম্রাম, ঊয়েল,

^35-37 বনায়, বেদিয়া, কলূহূ, বনিয়, মরেমোৎ, ইলিয়াশীব, মত্তনিয়, মত্তনয়, যাসয়,

^38-40 বানি, বিন্নূয়ী, শিমিয়ি, শেলিমিয়, নাথন, অদায়া, মকদ্‌বয়, শাশয়, শারয়,

^41-43 অসরেল, শেলিমিয়, শমরিয়, শল্লুম, অমরিয় আর যোষেফ। নবোর বংশধরুনো ভিদিরে: যিয়ীয়েল, মত্তিথিয়, সাবদ, সবীনঃ, যাদয়, যোয়েল আর বনায়।

⁴⁴ ইক্কুনে বেক্কুনে অন্য জাদর্ মিলেরে লোইয়োন আর কনঅ কনঅ মোগোর্ পেদত্অ ঝি-পুয়ো এলাক্।