ইষ্রা 1 - Chakma Bibleযিহূদীগুনে দেজত্ ফিরি এলাক্ 1 যিরমিয়রে দিইনে কোইয়্যে লগেপ্রভুর কধানি পূরোণ অবাত্যে পারস্যের রাজা কোরসর রাজাগিরির পত্তম্ বজরত্ লগেপ্রভু কোরসর মনত্ এমন আওজ্ দিলো যিয়েনত্যে তে তার্ বেক রেজ্যত্ মুুয়োদি আর লিগিনে এই ফগদাঙান্ গুরিলো: 2 পারস্যের রাজা কোরসে এই কধাগান কোইয়্যেদে, স্বর্গর গোজেন লগেপ্রভু পিত্থিমীর পুরো রেজ্যগান্ মরে দিয়্যে আর যিহূদা দেজর্ যিরূশালেমত্ তাত্তেই এক্কান ঘর বানেবাত্যে মরে নেযা ওইয়্যে। 3 তা মানুচ্চুনো ভিদিরে অত্তাৎ তমা ভিদিরে যে চায় তে যিহূদা দেজর্ যিরূশালেমত্ যেইনে ইস্রায়েলর্ গোজেন লগেপ্রভুর ঘর বানোক্। কিত্যে তে যিরূশালেমত্ আঘে। যিগুনে সিয়েনত্ যেবাক্ তারার্ গোজেনে তারা সমারে থোক্। 4 গোজেনর্ যিদুক্কুন্ মানুচ্ এজঅ বাঁজি আগন তারা যিয়োদোই বজত্তি গুরিদাক্ সাৎ তারা ভিদিরে যিগুনে যিরূশালেমত্ যেবাত্তে চায় তারার্ পাড়াল্যেগুনে যেনে তারার্ সনা-রূবো, জিনিসপাদি আর য়েমান দিইনে সাহায্য গরন্ আর যিরূশালেমত্ গোজেনর্ ঘরত্যে নিজের আওজে বক্শিজ্ দুয়োন। 5 ইয়েন্দোই যিহূদা আর বিন্যামীনর বংশ-নেতাগুনোর, ধর্মগুরুগুনোর আর লেবীয়গুনো ভিদিরে যিগুনো মনত্ গোজেনে দেগা দিলো তারা পত্তিজনে যিরূশালেমত্ লগেপ্রভুর ঘর বানেবাত্যে যেবাত্যে যুুক্কোল্ অলাক্ । 6 তারার্ বেক পাড়াল্যেগুনে রুবোর্ পিলে, সনা, অন্য পযাপিরা, য়েমানপাল আর মংগা মংগা জিনিস দিইনে তারারে সাহায্য গুরিলাক্ আর গোজেনর্ ঘরত্যে নিজোর্ আওজে বক্শিজ্অ দিলাক্। 7-8 ইয়েনিবাদে নবূখদ্নিৎসরে লগেপ্রভুর ঘরর্ যেদক্কানি জিনিস যিরূশালেমত্তুন্ নেযেইনে তার্ দেবেদাবোর্ মন্দিরোত্ থোইয়্যে রাজা কোরসে সিয়েনি ধনভান্ডালর্ রোক্ষ্যেগুরিয়্যে মিত্রদাতরে দিইনে নিগিলেই আনিলো। মিত্রদাৎ এ সিয়েনি যিহূদার শাজন্গুরিয়্যে শেশ্বসর ইদু গুণি দিলো। 9 সেই পযাপিরানির নাঙানি ইয়েনি: ত্রিশ্ছো সোনার গাবালা, এক আজার রূবোর্ গাবালা, ঊনোত্রিশ্চান ছুরি, 10 ত্রিশ্ছো সনার কদরা, নানান্ বাবোত্যে চের্শ দোশ্চো রূবোর্ কদরা আর এক আজার্ অন্য পযাপিরা। 11 যিয়েনত্ বেক্কানিয়ে পাঁচ আজার চের্শ সনা আর রূবোর জিনিস এলঅ। বন্দী অবস্থায় বিদেশত্ বজত্তিগুরিয়্যে মানুচ্চুনে যেক্কেনে বাবিলত্তুন্ যিরূশালেমত্ এলাক্ সেক্কে শেশ্বসরর্ এই বেক পযাপিরানি লগে গুরিনে আনিলো। |
Copyright © 2021 Bangladesh Bible Society
Bangladesh Bible Society