যিহিষ্কেল 8 - Chakma Bible

উবোসনা-ঘরত্ মূত্তিপূজো

¹ বন্দীদজাত্ থেবার ছয় বজরর্ ছয় মাসর্ পাচ্ দিনোত্ মুই যেক্কে মঅ ঘরত্ বুয়োই এলুং আর যিহূদার বুড়ো নেতাগুনে মঅ মুজুঙোত্ বুয়োই এলাক্ সেক্কে প্রভু লগেপ্রভুর আঢ্‌‌‌তানি সেই জাগানত মঅ উগুরে এলঅ।

² মুই রিনি চেইনে মান্‌জ্য ধোক্ক্যেন একজনরে দেগিলুং। তা কমরত্তুন্ ধুরি তলেদি সং আগুনো ধোক্ক্যেন লাগের্, আর কমরত্তুন্ ধুরি উগুরে সং চোক্‌চোক্ক্যে ধাতু ধোক্ক্যেন জোল্‌জোল্যে এলঅ।

³ তে আঢ্‌তান বাবেইনে মঅ মাঢাবো চুলানি ধুরিলো। সেক্কে গোজেনর আত্মাগানে মরে আগাজত্ তুলি নেযেল আর গোজেনর দিয়্যে দর্শনর্ ভিদিরে তে মরে যিরূশালেমর উবোসনা-ঘর ভিদিরে উদোনর্ উত্তোরেদি গেদোত্ সোমেবার পথ্‌তানত্ নেযেল। সিয়েনত্ এমন এক্কো মূত্তি এলঅ যিবে গোজেনর রাগ্‌কান তুলি দিয়্যে।

⁴ আর সিয়েনত্ মঅ মুজুঙোত্ এলঅ ইস্রায়েলর গোজেনর মহিমাগান্, যিয়েনি মুই কলগত্ দর্শনর ভিদিরেদি দেখ্যং।

⁵ তে মরে কলঅ, “ও মান্‌‌জ্যর পুয়োবো, তুই উত্তোরেদি রিনি চাহ্।” সেনত্তে মুই সিন্দি রিনি চেলুং আর পূজোবোর্ গেদোত, অত্তাৎ উত্তোরেদি গেদোত্ সোমেবার পথ্‌‌‌তানত্ মুই সেই মূত্তিবোরে দেগিলুং।

⁶ তে মরে কলঅ, “ও মান্‌‌‌‌জ্যর পুয়োবো, তারা যিয়েনি গত্তন্ সিয়েনি কি তুই দেগর্? ইস্রায়েলীয়গুনে ইয়েনত্ কি অমকদ জঘন্য কাম গোজ্যন্ যিয়েনত্তে মত্তুন্ মঅ সুদ্ধো-সাংগ জাগানত্তুন্ দূরোত্ সুরি যাহ্ পুরিবো। মাত্তর্ ইয়েনর পরেদিয়ো তুই আর জঘন্য কাম দেগিবে।”

⁷ সে পরেদি তে মরে উদোনত্ সোমেবার পধেদি নেযেল। মুই রিনি চেইনে দেবালত্ এক্কো গাদ্ দেগিলুং।

⁸ তে মরে কলঅ, “ও মান্‌‌‌‌‌জ্যর পুয়োবো, দেবালর্ সেই গাদ্‌‌‌‌‌তো আর দাঙর্ গর্।” সেনত্তে মুই সে গাদ্‌‌‌‌‌‌তো আর দাঙর্ গুরিলুং আর সিয়েনত্ এক্কান দুয়োর্ দেগিলুং।

⁹ তে মরে কলঅ, “তুই ভিদিরে যেইনে তারা সিয়েনত্ যেদক্কানি ভান্ন্যেই আর জঘন্য কাম্ গোজ্যন সিয়েনি চঅ।”

¹⁰ সেনত্তে মুই ভিদিরে যেইনে রিনি চেলুং আর দেবালর্ বেক্ জাগানিত্ নানান্ বাবোত্যে বুগেদি-আঢি বেড়েয়্যে প্রাণি আর অসিজি এ্যামানর চেঙেরা আর ইস্রায়েলীয়গুনোর বেক মূত্তির চেঙারানি খোদাই গরা আগেদে দেগিলুং।

¹¹ সিগুনো মুজুঙোত্ থিয়্যেই আগন্ ইস্রায়েলীয়গুনোর সত্তুর্ জন নেতা আর তারা ভিদিরে থিয়্যেই আগেদে শাফনর পুয়ো যাসনিয়। তারার্ পত্তিজনর আঢত্ এক্কো গুরি আগর্‌বাট্টির্ টগ্ এলঅ আর সিগুনোত্তুন্ আগর্‌বাট্টির্ ধূমো মেঘ্‌কানি উগুরেদি উদের্।

¹² তে মরে কলঅ, “ও মান্‌‌জ্যর পুয়োবো, ইস্রায়েলীয়গুনোর বুড়ো নেতাগুনে আন্ধারত্ পত্তিজনে নিজোর্ নিজোর্ ঘরত্ মূত্তিগুনো ইধু কি গত্তন্ সিয়েন কি তুমি বুঝি পাজ্য? তারা কদন্, ‘লগেপ্রভু আমারে ন-দেগে, কিত্যে তে দেজ্‌‌‌চান ছাড়ি যেয়েগোই।’”

¹³ তে আরঅ কলঅ, “ইয়োত্তুন্অ বেশ্ জঘন্য কাম্ তুই তারারে গুরিবাত্তে দেগিবে।”

¹⁴ সে পরেদি তে মরে লগেপ্রভুর ঘর উত্তোরেদি গেদোত্ সোমেবার পধত্ আনিলো, আর মুই দেগিলুং মিলেগুনে সিয়েনত্ বোইনে তম্মুষ দেবেদাবোত্তে কানদন্।

¹⁵ তে মরে কলঅ, “ও মান্‌‌‌‌জ্যর পুয়োবো, তুই ইয়েন কি দেগিলে? ইয়েনত্তুন্‌অ বেশ্ জঘন্য জিনিস তুই দেগিবে।”

¹⁶ সে পরেদি তে মরে লগেপ্রভুর ঘর ভিদিরে উদোনত্ নেযেল আর সিদু উবোসনা-ঘরত্ সোমেবার মুয়োনত্ বারান্দা আর পূজোর্ সংমোধ্যে পেরায়্ পোজোশ্‌জন মানুচ্ এলাক্। লগেপ্রভু ঘর ইন্দি পিজেদি ফিরিনে পূগেদি মু গুরি তারা বেলানরে জু জু জানাদন্।

¹⁷ তে মরে কলঅ, “ও মান্‌‌জ্যর পুয়োবো, তুই ইয়েন দেগিলে? যিহূদার মানুচ্চুনে যে জঘন্য কাম্ ইধু গত্তন্ সিয়েন গরানা তারার্ তপ্পে কি এক্কান সামান্য বেপার? তারা অত্যেচারে দেজ্‌‌চান ভোরেই ফেলেয়োন আর আমিঝে মর্ অহুজিগান জাগেই তুল্যন্। চঅ, তারা মরে কি অমকদ অগমান গোজ্যন্।

¹⁸ সেনত্তে মুই রাগে জুলি উদিনে তারা সমারে ইয়েনি বেবহার গুরিম; মুই তারারে মেয়্যেলি চোগেদি রিনি ন-চেম্ বা তারারে রেহাই ন-দিম্। তারা মঅ কান্‌‌জাবা কুরে রঅ ছাড়িলেয়ো মুই তারা কধা ন-শুনিম।”