যিহিষ্কেল 5 - Chakma Bible

¹ ও মান্‌‌‌‌‌‌‌জ্যর পুয়োবো, ইক্কিনে তঅ মাঢাবোর চুলানি আর দাড়িগানি কাবিবাত্তে তুই এক্কান ধারেয়্যে ছুরিলোই সিয়েন নাপিদো ক্ষুর ধোক্ক্যেন্ বেবহার গুরিবে। সে পরেদি পাল্লালোই চুলানি তিন ভাগ গুরিবে।

² যেক্কে শঅরর্ ঘিরি থোইয়্যে দিনুন্ থুম্ ওই যেবঅ সেক্কে সেই চুলোর তিন ভাগর্ এক ভাগ চুল নিইনে শঅর ভিদিরে পুড়িবে। তিন ভাগর এক ভাগ চুল নিইনে ছুরিলোই শঅর চেরোকিত্তে সিয়েনি কুজি কুজি গুরি কাবিবে, আর তিন ভাগর্ এক ভাগ চুল নিইনে বোইয়্যেরত্ উড়েই দিবে। যেরেদি খুলো তলোয়ারলোই মুই মানুচ্চুনোরে লোড়েম্।

³ মাত্তর্ কিজু চুল থোইনে সিয়েনি তঅ কাবড় ভাজত্ গুজেই থবে।

⁴ সে পরেদি আরঅ কিজু চুল নিইনে আগুনোত্ ফেলেইনে পুড়ি দিবে। সিয়োত্তুন আগুনান্ পুরো ইস্রায়েল জাদ ভিদিরে ছিদি যেবঅ।

⁵ মুই প্রভু লগেপ্রভু কঙর্, ইয়েন অলঅ যিরূশালেম। তারে মুই জাদ্‌‌তুনো সংমোধ্যে থিদেবর্ গোজ্যং; তা চেরোকিত্তে রোইয়্যেদে নানান্ দেজ্।

⁶ মাত্তর্ তে তার ভান্ন্যেয়ত্তে মর্ সুদোমানি বিরুদ্ধে তা চেরোকিত্যে নানান্ জাদে আর দেজত্তুন্অ বেশ উল্লোমী গোজ্যস্। তে মর্ সুদমানি এলাফেলা গোজ্যে আর মানি ন-চলে।

⁷ সেনত্তে মুই প্রভু লগেপ্রভু কঙর্, ও যিরূশালেম, তঅ চেরোকিত্তে দেজ্‌‌‌চানিত্তুন্ তুই আরঅ বেশ্ ভান্ন্যেই ওইয়োচ্। তুই মঅ নিয়মানি ন-মানচ্ আর মর্ সুদোমানিয়ো ন-পালাচ্। এমন কি, তর্ চেরোকিত্তে জাদ্‌‌‌‌তুনোর সুদোম্ মজিম্‌অ ন-চলচ্। ‌‌‌

⁸ সেনত্তে মুই নিজে তঅ বিরুদ্ধে, আর তঅ জাদ্‌‌‌‌তুনোর চোগো মুজুঙোত্ মুই তরে সাজা দিম্।

⁹ তর্ বেক্ জঘন্য মূত্তিগুনোত্তে মুই তঅ উগুরে যিয়েনি গুরিম সিয়েনি মুই আগে কনদিন্‌অ ন-গরং আর কনদিন্‌অ ন-গুরিম।

¹⁰ সিয়েনর ফলে তঅ ভিদিরে বাব্‌পুনে তারার্ পুয়ো-ঝিগুনোর য়েরানি হেবাক্ আর পুয়ো-ঝিগুনে তারার্ বাব্‌পুনোর্ য়েরানি হেবাক্। মুই তরে সাজা দিম্ আর তর্ বাঁজি থেইয়্যে মানুচ্চুনোরে চেরোকিত্তে ছিদি দিম্।

¹¹ সেনত্তে মুই প্রভু লগেপ্রভু মঅ জিংকানিগান নাঙে কঙর্, তর্ বেক বাজে মূত্তি আর জঘন্য কামানিলোই তুই মঅ ঘরান অসিজি গোজ্যস্ বিলিনে মুই নিজে মঅ দোয়্যেগান সোরেই নেযেম্; মুই তঅ উগুরে মেয়্যে গুরি রিনি ন-চেম্ বা তরে রেহাই ন-দিম্।

¹² তঅ তিন ভাগর্ এক ভাগ মানুচ্ তঅ ভিদিরে অয় বানালোই ন-অয় ভাদরাদে মুরিবাক্; তিন ভাগর্ এক ভাগ্ দেবাল বারেদি যুদ্ধোত্ মুরিবাক্ আর তিন ভাগর্ এক ভাগরে মুই চেরোকিত্তে ছিদি দিম্ আহ্ খুলো তলোয়ারলোই লোড়েম।

¹³ ইয়েনি গরানার্ পরেদি মর্ অমকদ বেজার্ অনাগান্ থুম্ অবঅ; তারা উগুরে মর্ রাগ্‌‌কান পুরোপুরি ঢালি দেনার পরেদি মুই শান্ত ওম্। সেক্কে তারা হবর্ পেবাক্ যে, মর্ রিবেঙর্ জ্বালায় মুই লগেপ্রভু এই কধানি কোইয়োং।

¹⁴ “ও যিরূশালেম, তঅ চেরোকিত্তে জাদ্‌‌‌তুনো ভিদিরেত্তুন্ যিগুনে তঅ কায়-কুরেদি যান্ মুই তারার্ চোগো মুজুঙোত্ তরে এক্কান ভস্তর্ জাগা আর ঠাট্টা-মশকারির্ মানুচ্ বানেম্।

¹⁵ মুই যেক্কে অমকদ অহুজি, রাগে আর অমকদ গেইল্‌‌‌লোই তরে সাজা দিম্ সেক্কে তর্ চেরোকিত্তে জাদ্‌‌‌তুনে তরে দেগিনে আমক্ অবাক্; তুই তারা ইধু অবে নিন্দে আর ঈচ্ গরা হেইয়্যে মানুচ্ আর এক্কো উজিয়ার কধা ধোক্ক্যেন।

¹⁶ তরে ভস্ত গুরিবাত্তে মুই তঅ উগুরে মর্ ভাদরাদর্ দর্‌‌‌গরেপারা সেল্‌‌‌লো মারিম। মুই তঅ উগুরে সেই ভাদরাদ্ আরঅ বাড়েই দিম্ আর তর্ হানার যুগেই দেনাগান বন্ধ গুরি দিম্।

¹⁷ তঅ বিরুদ্ধে মুই ভাদরাদ্ আর চিৎনপুজ্যে য়েমান পাধেই দিম্; তারা তরে পুয়ো-ছা নেইয়্যে গুরিবাক্। ভানা আর লো ঝরানা তঅ মাধ্যমে যেবঅ আর মুই তঅ বিরুদ্ধে যুদ্ধো আনিম। মুই লগেপ্রভু এ কধাগান কলুং।”