যিহিষ্কেল 48 - Chakma Bibleভূইয়োর্ ভাগ্ 1 সে পরেদি লগেপ্রভু কোইয়্যেদে, গুট্টি অনুসারে দেজর্ ভূইয়োর্ ভাগ্ এবাবোত্যে অবঅ। দেজর্ উত্তোরে দুযির্ দানে এক ভাগ পেবঅ; সিয়েন ভূমধ্য সাগরত্তুন্ হিৎলোনর্ পথ্তান সং লেবো-হমাৎ সং যেবঅ; সিয়েনত্তুন্ যেবঅ পূগেদি দামেস্কর উত্তোরে দুযি কায় হৎসোর-ঐনন সং, অত্তাৎ হমাতর্ দুযি সং। 2 আশের এক্কান ভাগ্ পেবঅ; সিয়েন অবদে পূগেদিত্তুন পোজিমে দান দুযির্ দোগিনে। 3 নপ্তালি এক্কান ভাগ্ পেবঅ; সিয়েন অবদে পূগেদিত্তুন্ পোজিমে আশেরর দুযির্ দোগিণে। 4 মনঃশি এক্কান ভাগ্ পেবঅ; সিয়েন অবদে পূগেদিত্তুন্ পোজিমে নপ্তালির দুযির্ দোগিণে। 5 ইফ্রয়িমে এক্কান ভাগ্ পেবঅ; সিয়েন অবদে পূগেদিত্তুন্ পোজিমে মনঃশি দুযির্ দোগিণে। 6 রূবেণে এক্কান ভাগ্ পেবঅ; সিয়েন অবদে পূগেদিত্তুন্ পোজিমে ইফ্রয়িম দুযির্ দোগিণে। 7 যিহূদা এক্কান ভাগ্ পেবঅ; সিয়েন অবদে পূগেদিত্তুন্ পোজিমেদি রূবেণর্ দুযির্ দোগিণে। 8 যিহূদার দুযির্ দোগিণে পূগেত্তুন্ পোজিমেদি সং থেবঅ সেই জাগায়ান যিয়েন তুমি বিশেষ কামত্তে যুদো গুরি রাগেবা। সিয়েন পাদাজ্যেদি অবদে পোজোশ্ আজার্ মাবেদে কাদি আর লাম্বায় অবদে অন্য গুট্টিগুনো ভাগ ধোক্ক্যেন দেজর্ পূগেদিত্তুন্ পোজিমেদি সং; সেজাগানর্ সংমোধ্যে থেবদে উবোসনা-ঘর। 9 সেই যুদো গোজ্যে জাগানত্তুন্ তুমি এক্কান বিশেষ ভাগ্ লগেপ্রভুরে দিবা; সিয়েন লাম্বাদি অবঅ পোজোশ্ আজার্ মাবেদে কাদি আর পাদাজ্যেদি দশ আজার্ মাবেদেকাদি। 10 ইয়েন অবঅ ধর্মগুরুগুনোত্তে পবিত্র ভাগ্। উত্তোর্ আর দোগিণেদি ইয়েন অবঅ পোজোশ্ আজার্ মাবেদে কাদি লাম্বা আর পোজিমে আহ্ পূগেদি দশ আজার্ মাবেদে কাদি পাদাজ্যে। সিয়েনর্ সংমোধ্যেদি থেবদে লগেপ্রভুর্ ঘরান্। 11 এই বিশেষ ভাগ্কান অবদে মর্ নাঙে যুদো গোজ্যে সাদোক বংশর্ ধর্মগুরুগুনোত্তে। তারা মরে সেবা গরানাত্ বিশ্বেজি এলাক্ আর ইস্রায়েলীয়গুনো সমারে ভান্ন্যেই পধেদি যেইয়্যে লেবীয়গুনো ধোক্ক্যেন তারা ভান্ন্যেই পধেদি ন-যান্। 12 ইয়েন অবঅ দেজর্ পবিত্র ভাগত্তুন্ তারাত্তে এক্কান বিশেষ ভাগ; এ ভাগ্কান থেবঅ লেবীয়গুনোর ভাগর্ দুযি কায়কুরে, আর ইয়েন অবঅ দাঙর্ সুদ্ধো-সাংগ জাগা। 13 ধর্মগুরুগুনোর দুযির্ কায়কুরে লেবীয়গুনে পোজোশ্ আজার্ মাবেদে কাদি লাম্বা আর দশ আজার্ মাবেদে কাদি পাদাজ্যে এক্কান জাগা পেবাক্। 14 লেবীয়গুনে সেই ভূইয়ান বেজানা বা সিয়েনর্ ভাগ্কান বদলাবুদুলি গুরি ন-পারিবাক্। সিয়েন বেগত্তুন্ গম্ ভূই আর সিয়েন অন্যগুন আঢত্ দেনা ন-চুলিবো, কিত্যে সিয়েন লগেপ্রভুর নাঙে পবিত্র। 15 বাদবাগি পাচ্ আজার্ মাবেদে কাদি পাদাজ্যে আর পোজোশ্ আজার্ মাবেদে কাদি লাম্বা চাগালাগান শঅরর্ সাধারন কামত্তে, অত্তাৎ বাড়ি-ঘর আর য়েমান্ চোরেবাত্তে বেবহার গরা অবঅ। শঅরান্ সিয়েনর্ সংমোধ্যে থেবঅ; 16 আর সেই শঅরানর্ চেরোকিত্তে মাপ অবঅ চের্ আজার্ পাচশঅ মাবেদে কাদি গুরি। 17 শঅরর্ চেরোকিত্তে য়েমান্ চোড়েবার জাগা থেবঅ দ্বিশঅ পঞ্চাশ মাবেদে কাদি গুরি। 18 এ শঅরর্ পূগেদি দশ আজার্ মাবেদে কাদি আর পোজিমেদি দশ আজার্ মাবেদে কাদি জাগানত্ যে ফসলানি জোর্মেব সিয়েনি শঅরর্ কামগুরিয়্যেগুনোর্ হানা অবঅ। 19 ইস্রায়েলর্ বেক গুট্টিগুনোত্তুন্ যিগুনে এ শঅরত্ কাম গুরিবাক্ তারা এ ভূইয়ান চাষ গুরিবাক্। 20 সেই যুদো গোজ্যে পুরো জাগায়ান অবঅ পোজোশ্ আজার্ মাবেদে কাদি গুরি এক্কান গুল্ জাগা। এ জাগান ভিদিরে থেবঅ সেই সুদ্ধো-সাংগ ভাগ্কান আর শঅর্ আহ্ সিয়েনর্ কায়কুরে জাগায়ানি। 21-22 সেই যুদো গোজ্যে জাগায়ানর্ পূগেদি আর পোজিমেদি জাগায়ান থেবঅ শাজন্গুরিয়্যে গুনোত্তে। এ দ্বিয়েন জাগার্ উত্তোর-দোগিণে মাব্পান যুদো গোজ্যে জাগান ধোক্ক্যেন পোজোশ্ আজার্ মাবেদে কাদি। এই দ্বিয়েন জাগা দেজর্ পূগেদি আর পোজিমেদি দুযি সং যেবঅ। এবাবোত্যেগুরি শাজন্গুরিয়্যেগুনোর্ জাগানর্ সংমোধ্যে থেবঅ উবোসনা-ঘর সুদ্ধো ধর্মগুরুগুনোর্ জাগা, লেবীয়গুনোর্ জাগা আর শঅরর্ জাগা। শাজন্গুরিয়্যেবোর্ এ জাগায়ান উত্তোরে যিহূদা আর দোগিণে বিন্যামীনর জাগানর্ দুযির্ সংমোধ্যে থেবঅ উবোসনা-ঘর সুদ্ধো ধর্মগুরুগুনোর্ জাগা, লেবীয়গুনোর্ জাগা আর শঅরর্ জাগা। শাজন্গুরিয়্যেবোর্ এ জাগায়ান উত্তোরে যিহূদা আর দোগিণে বিন্যামীনোর্ জাগান সংমোধ্যে থেবঅ। 23 বাদবাগি গুট্টিগুনো ভিদিরে বিন্যামীনে এক ভাগ পেবঅ; সিয়েন অবদে পূগেন্দিত্তুন্ পোজিমে যুদো গোজ্যে জাগানর্ দোগিণেদি। 24 শিমিয়োনে এক্কান ভাগ পেবঅ; সিয়েন অবদে পূগেন্দিত্তুন্ পোজিমে বিন্যামীনর্ দুযিগান দোগিণে। 25 ইষাখরে এক্কান ভাগ্ পেবঅ; সিয়েন অবদে পূগেন্দিত্তুন্ পোজিমে শিমিয়োনর দুযির্ দোগিণে। 26 সবূলূনে এক্কান ভাগ্ পেবঅ; সিয়েন অবদে পূগেন্দিত্তুন্ পোজিমেদি ইষাখরর্ দুযির্ দোগিণে। 27 গাদ এক্কান ভাগ্ পেবঅ, সিয়েন অবদে পূগিন্দিত্তুন্ পোজিমেদি সবূলূনোর্ দুযির্ দোগিণে। 28 গাদ ভাগর্ দোগিণো দুযিগান অলঅ দেজর্ দোগিণো দুযি। সিয়েন তামরত্তুন্ কাদেশর্ মরীবৎ পানিগান সং যেইনে মিসরর্ শুগুনো গাঙ সং ভূমধ্য সাগর সং যেবঅ। 29 এ দেজ্চান ইস্রায়েলর্ গুট্টিগুনোরে সোম্বোত্তি ইজেবে তুমি ভাগ গুরি দিবা, আর ইয়েন অবঅ তারার্ ভাগ্। মুই প্রভু লগেপ্রভু লগেপ্রভু এ কধাগান কঙর্। শঅরর্ গেট্টুন 30-31 “শঅরত্তুন্ বারেদি যেবার কয়েক্কো গেইট্ থেবঅ। ইস্রায়েলর্ গুট্টিগুনোর্ নাঙ ধগে সেই গেইট্টুনোর্ নাঙ্ দিয়্যে অবঅ। সাড়ে চের্ আজার্ মাবেদে কাদি উত্তোরেদি দেবালত্ তিন্নো গেইট্ থেবঅ। সিগুনোর্ নাঙ্ অবঅ রূবেণ-গেইট্, যিহূদা-গেইট্ আর লেবি-গেইট। 32 সাড়ে চের্ আজার্ মাবেদে কাদি পূগেদি দেবালর্ তিন্নো গেদো নাঙ্ অবঅ যোষেফ-গেইট্, বিন্যামীন-গেইট্ আর দান-গেইট্। 33 সাড়ে চের্ আজার্ মাবেদে কাদি দোগিণে দেবাল তিন্নো গেদো নাঙ্ অবঅ শিমিয়োন-গেইট্, ইষাখর-গেইট্ আর সবূলূন-গেইট্। 34 সাড়ে চের্ আজার্ মাবেদে কাদিলোই পোজিমেদি দেবাল তিন্নো গেদো নাঙ্ অবঅ গাদ-গেইট্, আশের-গেইট্ আর নপ্তালি-গেইট্। 35 শঅর চেরোকিত্তে দেবাল মাব্পান অবঅ আদার আজার্ মাবেদে কাদি। সে অক্তত্তুন্ ধুরি শঅরানর্ নাঙ্ অবঅ, ‘লগেপ্রভু ইয়েনত্ আঘে।’ ” |
Copyright © 2021 Bangladesh Bible Society
Bangladesh Bible Society