যিহিষ্কেল 46 - Chakma Bible

¹ মুই প্রভু লগেপ্রভু কঙর্, ভিদিরে উদোনর্ পূগেদি মু গুরি গেট্টো ছয়দিন কাম্ বন্ধ থেবঅ, মাত্তর্ জিরেবার দিনোত্ আর আঙোস্যে দিনোত্ সিবে খুলো অবঅ।

² সেক্কে শাজন্‌গুরিয়্যেবোর্ বারেত্তুন্ গেদোত্ সোমেবার গুদিবোদি সোমেইনে গেদো খুদোবোর্ কায়কুরে থিয়্যে পড়িবো। ধর্মগুরুগুনে তার পূজ্যে-উৎসর্ব আর উদোলোলি-উৎসর্বর্ অনুষ্ঠান গুরিবাক্। গেদোত্ সোমেবার মুয়োনত্ তে উবোসনা গুরিবার পরেদি নিগিলি যেবঅ, মাত্তর্ সাজোন্যে সং গেইট্ খুলো থেবঅ।

³ মানুচ্চুনেয়ো জিরেবার দিনোত্ আর আঙোস্যেত্ সেই গেদো বারেদি লগেপ্রভুর উবোসনা গুরিবাক্।

⁴ জিরেবার দিনোত্ শাজন্‌গুরিয়্যেবোর্ লগেপ্রভুর নাঙে পূজ্যে-উৎসর্বত্তে ছবুয়ো ভেড়া ছঅ আর এক্কো পাদা ভেড়া আনা পড়িবো; বেক্কুন যেন গম্ অন।

⁵ পাদা ভেড়াবোত্তে শোজ্য-উৎসর্বত্তে আদার কেজি মোইদ্যে দিয়্যে পড়িবো আর ভেড়া ছগুনো লগে যেত্তমান্ হুজি সেত্তমান্ মোইদ্যে দি পারিবে; পত্তি আদার কেজি মোইদ্যেত্তে পৌনে চের্ লিটার গুরি তেল্ দিয়্যে পড়িবো।

⁶ আঙোস্যে দিনোত্ তাত্তুন্ এক্কো দামাড়া গোরু আর ছবুয়ো ভেড়া ছঅ আর এক্কো পাদা ভেড়া উৎসর্ব গরা পড়িবো; বেক্কুন যেন গম্ অন্।

⁷ গোরুবো লগে তাত্তুন্ আদার কেজি মোইদ্যে, পাদা ভেড়া লগে আদার কেজি মোইদ্যে আর ভেড়া ছবুয়ো লগে যেত্তমান্ হুজি সেত্তমান মোইদ্যে শোজ্য-উৎসর্ব ইজেবে দিয়্যে পড়িবো; পত্তি আদার কেজি মোইদ্যেত্তে পৌনে চের্ লিটার গুরি তেল্ দিয়্যে পড়িবো।

⁸ শাজন্‌গুরিয়্যেবোর্ গেদোত্ সোমেবার গুদিবো ইন্দি ভিদিরে সমা পড়িবো আর একই পধেদি সিয়োত্তুন্ নিগিলিনে এজা পড়িবো।

⁹ ঠিগ্ গোজ্যে বেক পরবর্ সময়োত্ দেজ মানুচ্চুনে যেক্কে উবোসনাত্তে লগেপ্রভু ইধু এবাক্ সেক্কে যে কনজনে উত্তোর্ গেদোদি সোমেব তে দোগিণো গেদোদি নিগিলি যেবঅ আর যে দোগিণো গেদোদি সোমেব তে উত্তোর গেদোদি নিগিলি যেবঅ। মান্‌‌জ্যে যে গেদোদি সোমেবাক্ সে গেদোদি নিগিলি ন-যেবাক্, মাত্তর্ পত্তি জনত্তুন্ সোমেবার্ গেদো উল্টো ইন্দি গেদোদি নিগিলিনে যাহ্ পড়িবো।

¹⁰ ভিদিরে যেবার্ অক্তত্ শাজন্‌গুরিয়্যেবোর মানুচ্চুনো লগে ভিদিরে যাহ্ পড়িবো আর বারেদি যেবার অক্তত্ মানুচ্চুনো সমারে নিগিলিনে যাহ্ পড়িবো।

¹¹ পরব্ আর ঠিগ্ গোজ্যে হানার্ অক্তত্ এক্কো গোরুত্তে আদার আড়ি মোইদ্যে, ভেড়াত্যে আদার আড়ি মোইদ্যে আর ভেড়া-ছগুনোত্তে যেত্তমান্ হুজি সেত্তমান মোইদ্যে দিয়্যে পড়িবো; পত্তি আদার আড়ি মোইদ্যে লগে পৌনে চের্ লিটার গুরি তেল্ দিয়্যে পড়িবো।

¹² শাজন্‌গুরিয়্যেবো যেক্কে লগেপ্রভুর নাঙে নিজোর্ আওজে কনঅ উৎসর্ব গুরিবাত্তে চায়-সিবে পূজ্যে-উৎসর্ব ওক্ বা উদোলোলি-উৎসর্ব ওক্-সেক্কে তাত্তে পূগেদি মু গেইট্টো খুলি দিয়্যে পড়িবা। জিরেবার দিনো ধোক্ক্যেন গুরি তে তার্ পূজ্যে-উৎসর্ব বা উদোলোলি-উৎসর্বর অনুষ্ঠান গুরিবো। পরেদি তে বারেদি গেলে গেইট্টো বন্ধ গরা অবঅ।

¹³ লগেপ্রভুর নাঙে পূজ্যে-উৎসর্বত্তে তমাত্তুন্ পত্তিদিন এক্কো গুরি এক বজরর্ তুদো নেইয়্যে ভেড়া ছঅ উৎসর্ব গরা পড়িবো; পত্তিদিন বেন্যে তমাত্তুন্ সিয়েন গরা পড়িবো।

¹⁴ ইয়েনি বাদেয়ো ইবে লগে পত্তি বেন্যেমাদান্ তমাত্তুন্ শোজ্য-উৎসর্বর্ জিনিস্‌অ দিয়্যে পড়িবো; ইয়েনত্ থেবঅ তিন কেজি মোইদ্যে আর সিয়েনত্ মুলিবাত্যে সোয়া এক লিটার তেল। লগেপ্রভুর নাঙে এ শোজ্য-উৎসর্বর্ অনুষ্ঠান এক্কান জিংকানিবরর্ উগুম।

¹⁵ এবাবোত্যেগুরি অক্তমাজিম্ পূজ্যে-উৎসর্বত্তে পত্তি বেন্যেমাদান্ সেই ভেড়া-ছবো আর শোজ্য-উৎসর্বত্তে মোইদ্যে আর তেল্ যুগেই দিয়্যে পড়িবো।

¹⁶ “‘মুই প্রভু লগেপ্রভু আরঅ কঙর্, যুনি শাজন্‌গুরিয়্যেবো তা সোম্বোত্তি তার কনঅ পুয়োরে কনঅ জাগা দান গরে সালে সিয়েন তা বংশধরুনোর্‌অ গজগত্ থেবঅ। তারা সেই সোম্বোত্তির্ অধিকারী অবাক্।

¹⁷ মাত্তর্ যুনি তে তার্ সোম্বোত্তিত্তুন্ তার কনঅ চাগররে কনঅ জাগা দান গরে সালে সেই চাগর্‌বো সিয়েন ফিরি পেবার্ বজরবো সং রাগেই পারিবো। শাজন্‌গুরিয়্যেবোর সোম্বোত্তি বানা তার্ পুয়োগুনে পেবাক্; সিয়েন তারার্ অবঅ।

¹⁸ মানুচ্চুনোরে ধাবেই দিইনে শাজন্‌গুরিয়্যেবো তারার্ কনঅ সোম্বোত্তি গজক্ গুরি ন-পারিবো। তে বানা তার্ নিজো সোম্বোত্তিত্তুন্ তা পুয়োগুনোরে দি পারিবো যেনে মঅ মানুচ্চুনো ভিদিরেত্তুন্ কনজনে তার সোম্বোত্তির্ গিরোজ্ অনাগান্ ন-আরান্।’”

¹⁹ সে পরেদি সে মানুচ্চো মরে গেদো কায়কুরে সোমেবার পধেদি ধর্মগুরুগুনোর্ উত্তোরেদি মু সুদ্ধো-সাংগ বিল্ডিঙান মুজুঙোত্ আনিলো। তে মরে বিল্ডিঙানর্ পোজিমেদি থুম দুযিত্ এক্কান জাগা দেগেল।

²⁰ তে মরে কলঅ, “ইয়েন সেই জাগা যিয়েনত্ ধর্মগুরুগুনে দুষ্-উৎসর্ব আর পাপ-উৎসর্বর য়েরা উজিবাক্ আর শোজ্য-উৎসর্বর্ জিনিস্‌চানি সিগি নেযেবাক্ যেনে সেই সুদ্ধো-সাংগ জিনিসচানি বারেদি উদোনত্ আনা ন-অয়, কিত্যে সাধারন কনঅ মানুচ্ সিগুন বাযিলে তে লগেপ্রভুর নাঙে যুদো ওই যেবঅ।”

²¹ সে পরেদি তে মরে বারেদি উদোনত্ আনিনে তার্ চের্‌‌বো কোণাত্ ঘুরেইনে আনিলো, আর মুই পত্তি কোণাত্ আহ্ এক্কান গুরি চিগোন্ উদোন দেগিলুং।

²² দেবাল্-ঘিজ্যে সেই চিগোন উদোনানির্ মাব্‌‌পান এলদে চল্লিশ আত্ লাম্বা আর ত্রিশ আত্ পাদাজ্যে। পত্তি উদোন্ একই মাবর্ এলঅ।

²³ সেই চেরান্ উদোনর্ পত্তি ভিদিরের্ চেরোকিত্তে দেবাল লগে লাগেয়্যে পাত্তর তাক্ এলঅ আর সেই তাক্কো তলে চেরোকিত্তে চুলো এলঅ।

²⁴ তে মরে কলঅ, “ইগুন্ অলঅ চুলো; যিগুনে উবোসনা-ঘরর্ সেবা-কাম গরন্ তারা সিয়েনত্ মানুচ্চুনোত্তে উৎসর্বর জিনিস্‌চানি উজিবাক্।”