যিহিষ্কেল 44 - Chakma Bibleশাজন্গুরিয়্যেগুন, লেবীয়গুন আর ধর্মগুরুগুন 1 সে পরেদি সেই মানুচ্চো মরে উবোসনা-ঘরর পূগেদি মু বারেদি গেদো ইধু ফিরেই আনিলো; গেট্টো বান্যে এলঅ। 2 লগেপ্রভু মরে কলঅ, “এ গেট্টো বান্যে থেবঅ, খুলো ন-অবঅ যেনে কনজনে ইবে ভিদিরেদি সোমেই ন-পারন্। ইবে বান্যে থেবঅ, কিত্যে ইস্রায়েলর গোজেন লগেপ্রভু ইবের্ ভিদিরেদি সোম্মেগোই। 3 বানা শাজন্গুরিয়্যেবো গেদো ভিদিরে বোইনে লগেপ্রভুর মুজুঙোত্ হেই পারিবো। তে শেজ্ গুদিবোদি গেদোত্ সোমেব আর একই পধেদি নিগিলিবো।” 4 সে পরেদি সেই মানুচ্চো মরে উত্তোরে গেদোর্ পধেদি উবোসনা-ঘর মুজুঙোত্ আনিলো। মুই দেগিলুং লগেপ্রভুর ঘরান্ তার মহিমালোই ভুরি যেইয়্যে; সেক্কে মুই মাঢা নিগিরিনে পড়িলুং। 5 সেক্কে লগেপ্রভু মরে কলঅ, ও মান্জ্যর্ পুয়োবো, তুই গমেডালে চাহ্ আর কানেদি শুন্ আহ্ মঅ ঘর পৌইদ্যেনে মুই তরে যেদক্কানি সুদোম্ আর রীদি-সুদোম পৌইদ্যেনে কোম্ সিয়েনি বেক্কানিত্ মনযোগ দে। উবোসনা-ঘরত্ কন্না সোমেই পারিবো আর কন্না সোমেই ন-পারিবো সে পৌইদ্যেনে মনযোগ দে। 6 তুই উল্লোমী জাদ্ ইস্রায়েলরে কঅ, প্রভু লগেপ্রভু কোইয়্যেদে, ও ইস্রায়েলীয়গুন, তমার্ জঘন্য আচার-বেবহারানি যগাজ্যে ওইয়্যে। 7 তমা অন্য জঘন্য আচার-বেবহার লগে তুমি মইধু হানা, তেল্ আর লো উৎসর্ব গুরিবার অক্তত্ মনেদি আর কিয়্যেদি সুন্নত-ন-গোজ্যে বিদেশীগুনোরে মঅ ঘরত্ আনিনে মঅ ঘরান্ অসিজি গোজ্য আর তারার কাম ভিদিরেদি তুমি মর্ সুদোমান বাতিল গোজ্য। 8 মঅ সুদ্ধো-সাংগ পযাপিরানি উগুরে তমার্ যে কাম্ গুরিবার কধা সিয়েনি ন-গুরিনে মঅ ঘরর্ ভারান্ তুমি অন্যগুনো আঢত্ তুলি দুয়ো। 9 যে বিদেশীগুনোর মনানি আর কিয়্যেনি সুন্নত গরা ন-অয় তারা মঅ ঘরত্ সোমেই ন-পারিবাক্; এন্ কি, ইস্রায়েলীয়গুনো ভিদিরে বজত্তি গোজ্যে বিদেশীগুনেয়ো ন-পারিবাক্। 10 ইস্রায়েলীয়গুনে যেক্কে ভান্ন্যেই পধেদি যেইয়োন সেক্কে তারা লগে যে লেবীয়গুনে মরে ছাড়িনে তারার্ মূত্তিগুনো পিজেদি ঘুরি বেড়েইনে মত্তুন্ দূরোত্ সুরি যেইয়োন তারার্ পাপর্ ফল তারাত্তুন্ ভুগো পড়িবো। 11 তো উবোসনা-ঘরর্ গেট্টুন্ রোক্ষ্যে গুরিবার ভারান্ পেইনে আর সিয়েনত্ কাম গুরিনে তারা মঅ ঘরর্ সেবা-কাম গুরি পারিবাক্। তারা পূজ্যে-উৎসর্বর য়েমান কাবি পারিবাক্ আর মানুচ্চুনোত্তে উৎসর্বর অনুষ্ঠান গুরি পারিবাক্ আর মানুচ্চুনোরে সেবা গুরিবাত্তে তারা মুজুঙোত্ থিয়্যেই পারিবাক্। 12 মাত্তর্ তারা মূত্তিগুনো মুজুঙোত্ মানুচ্চুনোরে সেবা গোজ্যন্ আর ইস্রায়েল জাদরে পাপত্ ফেল্যন, সেনত্তে মুই প্রভু লগেপ্রভু শমক্ গোজ্যং, তারার্ পাপর্ ফল তারাত্তুন ভুগো পড়িবো। 13 তারা ধর্মগুরু ইজেবে মরে সেবা গুরিবাত্তে মইধু ন-এবাক্ বা মর্ কনঅ সুদ্ধো-সাংগ বা যদবদে সুদ্ধো-সাংগ জিনিজো ইধু এই ন-পারিবাক্; তারার্ জঘন্য আচার-বেবহারর্ লাজানাগান তারাত্তুন্ ভুগো পড়িবো। 14 তো উবোসনা-ঘর কাম্ আর সিদুগোর্ বেক্ কামর্ ভারান্ মুই তারা উগুরে দিম্। 15 মাত্তর্ ইস্রায়েলীয়গুনে যেক্কে মত্তুন্ ভান্ন্যেই পধেদি যেইয়োন্ সেক্কে সাদোক বংশর্ যে লেবীয়গুনে ধর্মগুরু ইজেবে মঅ ঘরত্ বিশ্বেজ্ গুরিনে তারার্ কামানি গোজ্যন্ তারা মর্ সেবা-কাম্ গুরিবাত্তে মইধু এই পারিবাক্; তারা তেল্ আর লো উৎসর্ব গুরিবাত্তে মঅ মুজুঙোত্ থিয়্যেই পারিবাক্। মুই প্রভু লগেপ্রভু এ কধাগান কঙর্। 16 সিগুনে বানা মঅ ঘরত্ সোমেই পারিবাক্; বানা তারা মর্ সেবা-কামত্তে মঅ টেবিলান ইধু এই পারিবাক্ আর তারা মঅ ঘরর্ বেক কামানি গুরিবাক্। 17 মসীনার পোজাক্ পিনিনে তারা ভিদিরে উদোনর্ গেট্টুনো ইন্দি সোমেবাক্; ভিদিরে উদোন গেট্টুনো ইধু বা উবোসনা-ঘর ভিদিরে সেবা-কামর্ অক্তত্ তারা কনঅ উলোর্ পোজাক্ পিনি ন-পারিবাক্। 18 তারা মাঢাত্ মসীনার পাগড়ী থেবঅ আর তারা মসীনার জাংগি পিনিবাক্; যেনে ঘাম অয় এবাবোত্যে কাবড় তারা ন-পিনিবাক্। 19 তারা যেক্কে বারেদি উদোনত্ থেইয়্যে মানুচ্চুনো ইধু সেক্কে সেবা-কামত্তে তারা যে পোজাক্কানি পিন্নোন্ সিয়েনি খুলিনে সুদ্ধো-সাংগ গুদিবোত্ থোইনে অন্য কাবড়-চুগোর্ পিনিবাক্, যেনে তারার্ পোজাগর্ ছাবাগুন্দোই মানুচ্চুনে মঅ নাঙে যুদো ওই ন-যান্। 20 তারা মাঢাগুনোর্ চুলানি তারা ন-মুড়েবাক্ বা চুল লাম্বা ন-রাগেবাক্ মাত্তর্ চুলানি বাদি গুরি কাবিবাক্। 21 কনঅ ধর্মগুরু আংগুর-রস হেইনে ভিদিরে উদোনত্ ন-সোমেবাক্। 22 রানিমিলে বা নেক্কো যিবেরে ছাড়ি দিয়্যে এবাবোত্যে মিলেরে তারা ন-লবাক্; তারা বানা ইস্রায়েল জাদর্ গাবুজ্যে মিলেরে বা ধর্মগুরুর্ রানি মিলেরে লোই পারিবাক্। 23 মঅ নাঙে যিয়েনি যুদো গরা ওইয়্যে আর যিয়েনি যুদো গরা ন-অয় সিয়েনি ভিদিরে ফারগ্কান কি সিয়েনি তারা মঅ মানুচ্চুনোরে শিক্ষ্যে দিবাক্ আর কুবোন্ সিজি আর কুবোন্ অসিজি সিয়েনি তারারে দেগেই দিবে। 24 কনঅ মামলা-মগদ্দমা অলে ধর্মগুরুগুনে বিচেরগর্ কাম গুরিবাক্ আর মর্ উগুম মজিম্ সিয়েনর রায় দিবাক্। মর্ ঠিগ্ গোজ্যে বেক পরব্পুনোত্তে তারা মর্ রীদি-সুদোমানি আর সুদোমানি পালেবাক্ আর জিরেবার দিনুনোর পবিত্রতাগান রোক্ষ্যে গুরিবাক্। 25 ধর্মগুরুবো কনঅ মরা মান্জ্য ইধু যেইনে নিজোরে অসিজি ন-গুরিবো; মাত্তর্ মা-বাবা, পুয়ো-ঝি, ভেই বা গাবুজ্যে বোনোত্তে নিজোরে অসিজি গুরি পারিবো। 26 সিজি অলে পরেদি তাত্তুন্ সাত দিন বাজ্জ্যেই থাহ্ পড়িবো। 27 সে পরেদি যেদিন্যে তে সেবা-কামত্তে উবোসনা-ঘর ভিদিরে উদোনত্ যেবঅ সেদিন্যে তাত্তুন্ নিজোত্তে পাপ-উৎসর্বর্ অনুষ্ঠান গরা পড়িবো। মুই প্রভু লগেপ্রভু এ কধাগান কঙর্। 28 ধর্মগুরুগুনোর সোম্বোত্তি কদে বানা মুয়ই থেইম্। তুমি ইস্রায়েলীয়গুন তমা দেজত্ তারারে কনঅ সোম্বোত্তি ন-দিবা; মুয়ই ওম্ তারার সোম্বোত্তি। 29 তারা শোজ্য-উৎসর্ব, পাপ-উৎসর্ব আর দুষ-উৎসর্বর্ জিনিস হেবাক্; ইস্রায়েল দেজত্ লগেপ্রভুর নাঙে দিয়্যে বেক্ জিনিস্চানি তারার্ অবঅ; সিয়েনি ছাড়েই আনানা ন-যেবঅ। 30 পত্তমে কাপ্যে নানান্ বাবোত্যে ফসলর্ বেগত্তুন্ গম্ ভাগ্কান আর তমা বেক্ বক্শিজ্চানি ধর্মগুরুগুনোর অবঅ। তমার্ নুয়ো মোইদ্যের্ পত্তম ভাগ্কান তুই তারারে দিবে যেনে তমা পরিবার উগুরে আশিদ্বাদ থায়। 31 মুরি যেইয়্যে বা ঝর্বো য়েমানে কট্টা গোজ্যন্ এবাবোত্যে কনঅ পেগ্ বা য়েমান ধর্মগুরুগুনে ন-হেবাক্। |
Copyright © 2021 Bangladesh Bible Society
Bangladesh Bible Society