যিহিষ্কেল 41 - Chakma Bible

¹ সে পরেদি তে মরে উবোসনা-ঘরর্ আজল্ গুদিবোত্ আনিনে দোরোত্ বাজু দ্বিবে মাবিলো; দ্বিকিত্তেদি বাজু পাদাজ্যে এলাক্ ছয় আত্ গুরি;

² উবোসনা-ঘরর্ দেবালান্অ এলঅ ছয় আত্ দাদঅ। দ্বিবে বাজুর্ সংমোধ্যে জাগায়ান এলদে দশ আত্ আর পত্তি বাজু পাচ্ আত্ দাদঅ এলাক্। তে আজল্ গুদিবোয়ো মাবিলো; সিবে চোল্লিশ্ আত্ লাম্বা আর কুড়ি আত্ পাদাজ্যে এলঅ।

³ সে পরেদি তে ভিদিরে গুদিত্ যেইনে সিদু সোমেবার দোরানর্ বাজু দ্বিবে মাবিলো; পত্তি বাজু এলাক্ দি আত্ পাদাজ্যে। দ্বিবে বাজুর্ সংমোধ্যেগানর্ জাগায়ান এলঅ ছয় আত্ আর বাজু লগে বাজেয়্যে দ্বিকিত্তেদি দেবালান্ লাম্বাদি এলঅ সাত আত্ গুরি।

⁴ সে পরেদি তে ভিদিরে গুদিবোর্ মাপ্ নেযেল; সিবে লাম্বাদি এলঅ কুড়ি আত্ আর পাদাজ্যেদি এলঅ কুড়ি আত্ । তে মরে কলঅ, “ইয়েনই দাঙর্ সুুদ্ধো-সাংগ জাগা।”

⁵ সে পরেদি তে উবোসনা-ঘরর দেবালান্ মাবিলো; সিয়েন এলদে ছয় আত্ দাদঅ আর সেই দেবাল বারেদিগান তিন কিত্তেদি দেবালান্ বাস্যেগুরি যে গুদিগুন এলাক্ সিগুন এক এক্কো চের্ আত্ পাদাজ্যে এলাক্।

⁶ সে গুদিগুন এক্কো উগুরে আর এক্কো গুরি তিন তালা এলঅ; পত্তি তালাত্ ত্রিশ্‌ছো গুরি গুদি এলাক্। গুদিগুন ভরান্ রাগেবাত্তে উবোসনা-ঘরর্ দেবাল তিন দাগেদি থাক্ এলাক্। গুদিগুনোর বীম সে থাক্‌‌কুনো উগুরে বোজেয়্যে এলঅ, উবোসনা-ঘরর দেবাল ভিদিরে ভোরেয়্যে ন-এলঅ।

⁷ সেনত্তে উবোসনা-ঘরর্ তিন দাগেদি গুদিগুন পাদাজ্যেদি তলে তালাত্তুন্ উগুরে তালা সং পর পর বাজ্যন্। তলে তালাত্তুন্ দ্বিতালা ভিদিরেদি উগুরে তালা সং এক্কান সিড়ি উঠ্যেগোই।

⁸ মুই দেগিলুং, উবোসনা-ঘরান্ এক্কান অজল্ সং জাগা উগুরে আঘে আর সিয়েনই এলঅ উবোসনা-ঘর আহ্ গুদিগুনোর গড়াগান। সেই গড়াগান এক মাবেদে কাদি, অত্তাৎ ছয় আত্ অজল্ আর গুদিগুনোত্তুন্ পাচ্ আত্ বাজ্যে এজঅ।

^9-10 গুদিগুনোর্ বারেদি দেবালান এলঅ পাচ্ আত্ দাদঅ। উবোসনা-ঘরর গড়াত্তুন্ ধর্মগুরুগুনোর ঘরানি সং কুড়ি আত্ মেলা জাগা এলঅ।

¹¹ উবোসনা-ঘরর কায়কুরে গুদিগুনোত্ সোমেবাত্তে উত্তোরেদি এক্কান আর দোগিণেদি আর এক্কান দোর্ এলঅ আর সেই দ্বিয়েন দোর্ মেলা জাগান ইন্দি মুয়োন গোজ্যে এলঅ। গড়াগানর্ সেই পাচ্ আত্ বাড়েয়্যে ভাগ্‌‌কান এলদে দোরোর্ দ্বিয়েন ইধু যেবার পথ্‌তান।

¹² উবোসনা-ঘরর পোজিমেদি মেলা জাগানত্ শেজ্ দুযিত্ এক্কান পাক্কাঘর্ এলঅ। সিয়েন সত্তুর্ আত্ পাদাজ্যে আর নব্বই আত্ লাম্বা এলঅ। সিয়েনর চেরোকিত্তে দেবালানি এলঅ পাচ্ আত্ দাদঅ।

¹³ সে পরেদি তে উবোসনা-ঘরান্ মাবিলো; সিয়েন এলদে লাম্বাদি একশ আত্ আর উবোসনা-ঘরত্তুন্ মেলা জাগা আর পিজেদি দেবাল্ সুদ্ধো বিল্ডিঙান লাম্বাদি এলদে একশ আত্।

¹⁴ পূগেদি উবোসনা-ঘরর্ মুজুঙোত্ যে খুলো জাগায়ান্ এলঅ সিয়েন লাম্বাদি এলদে একশ আত্।

^15-16 সে পরেদি তে দ্বিকিত্তেদি ভিদিরে পথ্ সুদ্ধো পোজিমেদি বিল্ডিঙান মাবিলো; সিয়েন লাম্বাদি এলদে একশ আত্। উবোসনা-ঘরর আজল্ গুদিবো, ভিদিরে গুদিবো আর উদোন ইন্দি মুয়োন-গোজ্যে বারান্দার দেবালানি গাজ তক্তালোই নাঢি দিয়্যে এলঅ। সেই তিনান্ জাগাত্ সোমেবার মুয়োত্ দ্বিকিত্তেদি খুদোগুন আর জালি দিয়্যে বেক্ জানালানিয়ো তক্তালোই নাঢি দিয়্যে এলঅ। জানালাগুনোত্ গাজ পাল্লা এলঅ।

^17-18 সোমেবার মুয়োন উগুরে দেবাল সুদ্ধো আজল্ গুদিবোর আর ভিদিরে গুদিবোর বেক্ দেবাল তক্তা উগুরে করূব আর খাজোর্ গাজ নক্‌শা গোজ্যে এলঅ; এক্কো খাজোর্ গাজ আর এক্কো করূব পর পর সাজেয়্যে এলঅ। পত্তি করূবোর দ্বিয়েন গুরি মু এলঅ,

¹⁹ এক্কো মান্‌জ্যর মু আর এক্কো সিংহ মু; মান্‌জ্যর মু এক্কান খাজোর্ গাজ ইন্দি আর সিংহ মুয়োন অন্য খাজোর্ গাজ ইন্দি। গোদা উবোসনা-ঘরানর্ দেবাল চেরোকিত্তে ইগুন নক্‌শা গোজ্যে এলঅ।

²⁰ পত্তি গুদির্ দেবাল তলেত্তুন্ ধুরি আরাম্ভ গুরিনে সোমেবার মুয়োন উগুরে জাগান সং বেক্ জাগানিত্ করূব আর খাজোর্ গাজ নক্‌শা গোজ্যে এলঅ।

²¹ আজল্ গুদিবোর্ দোরান ফ্রেমান চের্‌কোণা এলঅ আর দাঙর্ সুদ্ধো-সাংগ জাগানর্ দোরান্‌অ এক্কুই এলঅ।

²² আজল্ গুদিবোত্ তিন আত্ অজল, দ্বিআত্ লাম্বা আর দ্বিআত্ পাদাজ্যে গাজর্ এক্কো পূজো এলঅ; ইবের্ চের্‌কোণা, গড়া আর চেরোকিত্তেদি এলঅ গাজ্‌চোই বানেয়্যে। তে মরে কলঅ, “ইয়েন অত্তে সেই টেবিলান যিয়েন লগেপ্রভুর মুজুঙোত্ আঘে।”

²³ আজল্ গুদিবো আর দাঙর্ সুদ্ধো-সাংগ জাগানত্ এক্কো গুরি দ্বিয়েন পাল্লার দোর্ এলঅ।

²⁴ পত্তি দোর্ দ্বিয়েন তক্তালোই বানেয়্যে; তক্তা দিয়্যেন কব্‌‌জা উগুরে ঘুরে।

²⁵ আজল্ গুদিবোর্ দোরো হেবা দ্বিবে উগুরে দেবাল ধোক্ক্যেন করূব আর খাজোর্ গাজ নক্‌‌শা গোজ্যে এলঅ। বারান্দাত্ সোমেবার মুয়ো ছাল তলেদি এক্কো বীম্ এলঅ।

²⁶ বারান্দার জালি দিয়্যে জানালানির্ দ্বিকিত্তেদি আর ফ্রেমানিত্ খাজোর্ গাজ নক্‌‌শা গোজ্যে এলঅ। ইগুন বাদেয়ো উবোসনা-ঘরর বীমুনোত্ আর কায়কুরে গুদিগুনোত্অ খাজোর্ গাজ নক্‌‌শা গোজ্যে এলঅ।