যিহিষ্কেল 4 - Chakma Bible

যিরূশালেম ঘিজ্যে ফোটুবো

¹ তে মরে আরঅ কলঅ, ও মান্‌‌জ্যর পুয়বো, তুই ইক্কিনে এক্কো মাদির্ আরুগ্ নিইনে তঅ মুজুঙোত্ রাগা আর সিবে উগুরে যিরূশালেম শঅরর্ ফোটুবো ছাবা।

² তা চেরোকিত্তে এবাবোত্যেগুরি ঘিজ্যে দেগা: তা বিরুদ্ধে এক্কান অজল্ দেবাল্ বানা, শঅরর্ দেবাল লগে এক্কো উবো দেবাল্ বানা, শঅরর্ বিরুদ্ধে সৈন্যগুনোর তাম্বুল্ টাঙা আর দেবাল চেরোকিত্তে দেবাল্ ভাঙেদে মেশিন্ বজা।

³ সে পরেদি লুয়োর্ এক্কান পাত নিইনে সিয়েন তর্ আর শঅরর্ সংমোধ্যে দেবাল ধোক্ক্যেন রাগা আর তঅ মুয়োন সিয়েন ইন্দি ফিরেই রাগা। সেক্কে শঅরান ঘিরে ওইয়্যে বুঝো যেবঅ; এধোক্ক্যেনগুরি তুই দেগেবেদে যে, শঅরান ঘিরে ওইয়্যে। ইয়েন অবদে ইস্রায়েল জাদত্তে এক্কান চিহ্নো।

⁴ সে পরেদি তুই বাঙেদি ফিরিনে ঘুমেবে আর ইস্রায়েলর পাপর সাজা তঅ নিজো উগুরে নেযেবে। যে কয়দিন তুই এক ডাক্ক্যে গুরি ঘুমেবে সেদক্ দিন তারার্ সাজাগান তুই ভুগিবে।

⁵ তারার্ সাজা পেবার্ বজর সোংখ্যে ইজেব গুরিনে সেদক্ দিন মুই তরে সিয়েন ভুগিবাত্তে দিলুং। সেনত্তে তিনশ নব্বই দিন ইস্রায়েলর সাজা তুই ভুগিবে।

⁶ ইয়েন থুম্ অনার্ পরেদি তুই আরঅ ঘুমেবে; এবেরা ডেনেদি মোক্ক্যে ফিরিনে ঘুমেবে আর যিহূদার পাপর সাজা ভুগিবে। ঘুমেই থেবাত্তে মুই তরে চোল্লিশ দিন দিলুং, এক এক বজরত্তে এক এক দিন।

⁷ তুই যিরূশালেমর ঘিজ্যেগান ইন্দি মুয়োন্ ফিরেবে আর আঢ উগুরেত্তুন্ কাবড়ান সোরেইনে সে শঅরর্ বিরুদ্ধে ভাববাদী ইজেবে কধা কবে।

⁸ তর্ ঘেরাওয়ের দিন থুম্ ন-অনা সং যেনে তুই ইন্দি-উন্দি ফিরি ন-পারচ্ সেনত্তে মুই তরে দুড়িলোই বানি রাগেম্।

⁹ “তুই গম, মোক্ক্যে, শুমি, মসুর ডেল, বাজ্‌‌রা আর জনার লোইনে এক্কো পিলেত্ রাগেবে আর সিগুন্দোই তত্তে রুটি বানেবে। যে তিনশ নব্বই দিন তুই এক মোক্ক্যে গুরি ফিরিনে ঘুমেবে সেক্কে সিয়েনি হেবে।

¹⁰ পত্তিদিন মাবিনে দ্বিশঅ চোল্লিশ গ্রাম হানা সেই দিনুনো ভিদিরে নানান্ সময়োত্ হেবে।

¹¹ ইয়েনি বাদেয়ো আধা লিটারত্তুন্ এক্কানা বেশ্ পানিয়ো নানান্ সময়োত্ হেবে।

¹² কেশ্ বিজি পিদে ধোক্ক্যেন গুরি সেই হানাগান তুই হেবে; মান্‌‌‌জ্যর চোগো মুজুঙোত্ মান্‌‌‌জ্যর ঘু পুড়িনে সিয়েনি সিগিই নেযেবে।

¹³ যিদুক্কুন জাদ ভিদিরে মুই ইস্রায়েলীয়গুনোরে ধাবেই দিম্ তারা ভিদিরে থেবার অক্তত্ তারা এবাবোত্যেগুরি অসিজি হানা হেবাক্।” এ কধাগান লগেপ্রভু কোইয়্যেদে।

¹⁴ সেক্কে মুই কলুং, “ও প্রভু লগেপ্রভু, এবাবোত্যে ন-ওক্। মুই কনদিন্‌অ অসিজি ন-অং। চিগনত্তুন্ ধুরি এজ সং মুই মরা বা ঝার্‌‌‌‌বো য়েমান মারে ফেলেয়্যে কনঅ কিজু ন-হাং। কনঅ অসিজি য়েরা মঅ মুয়োদি কনদিন্‌অ ন-সমে।”

¹⁵ তে কোইয়্যেদে, “আচ্ছা, মান্‌‌‌‌‌জ্য ঘু বদলে মুই তরে গবর ঘু পুড়িনে তঅ রুটিগানি সিগিবার উগুম্ দিলুং।”

¹⁶ সে পরেদি তে মরে কলঅ, ও মান্‌‌‌‌‌‌জ্যর পুয়োবো, মুই যিরূশালেমর হানার্ যুগেই দেনাগান বন্ধ গুরি দিম। মানুচ্চুনে ভান্ন্যেই চিন্তেলোই মাবিনে হানা হেবাক্ আর হতাশালোই মাবিনে পানি হেবাক্,

¹⁷ সেনত্তে হানা আর পানির অভাব অবঅ। তারা একজন আর একজনরে দেগিনে আমক্ অবাক্ আর তারার পাপত্তে তারা ক্ষয় ওই যেবাক্।